استانادا قر پرەزيدەنتى جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا جانە «اكەلەر وداعى» قوعامدىق بىرلەستىگى رەسپۋبليكالىق اكەلەر فورۋمىن وتكىزىپ جاتىر, دەپ حابارلايدى egemen.kz Baq.kz - كە سىلتەمە جاساپ.
فورۋم تاۋەلسىزدىكتىڭ 25 جىلدىعىنا ارنالعان «25 پايدالى ءىس» اكتسياسى شەڭبەرىندە ۇيىمداستىرىلعان. جيىن بالا تاربيەسىندەگى اكە ءرولىن دارىپتەۋگە ارنالعان. اكەلەر فورۋمى رەسپۋبليكالىق دارەجەدە العاش رەت وتۋدە.
«وتان, وتباسى, وت اعاسى» – ەگىز ۇعىمدار. بۇل فورۋمنىڭ باستى ماقساتى – وتباسىنداعى اكەنىڭ الاتىن ورنىن كەڭىنەن ناسيحاتتاۋ. بۇگىنگى فورۋمعا ەلىمىزدىڭ ۇزدىك اكەلەرى جينالدى. ايەلى كۇيەۋىن, بالاسى اكەسىن سىيلاۋى ۇلتتىڭ اماندىعىن ساقتاپ قالۋىنا تىكەلەي ىقپال ەتەدى», – دەدى قر ورتالىق سايلاۋ كوميسسياسىنىڭ مۇشەسى, ۇلتتىق كوميسسيا توراعاسىنىڭ ورىنباسارى ءلاززات سۇلەيمەن.
فورۋمعا پارلامەنت دەپۋتاتتارى, ۇلتتىق كوميسسيا مۇشەلەرى, قوعام قايراتكەرلەرى, حالىقارالىق جانە ۇكىمەتتىك ەمەس ۇيىم جەتەكشىلەرى قاتىسۋدا. شارا سوڭىندا ءار ايماقتان كەلگەن ۇلگىلى اكەلەر ديپلومدارمەن ماراپاتتالادى.