بۇل تۋرالى قازاقستان مۇسىلماندارى ءدىني باسقارماسىنا (قمدب) قاراستى ءدىني وقۋ ورىندارى باسشىلارىنىڭ باس مۇفتيگە ەسەپ بەرۋ جيىنىندا قمدب ءدىني ءبىلىم جانە عىلىم ءبولىمىنىڭ مەڭگەرۋشىسى باقتىباي بەيسەنباەۆ حابارلادى. ونىڭ مالىمدەۋىنشە, ورتا جانە جوعارى ءبىلىمدى ماماندار دايىندايتىن ءدىني وقۋ ورىندارىنا بارلىعى 373 وقۋ گرانتى جەرگىلىكتى جانە مەملەكەتتىك بيۋدجەتتەن بولىنگەن.
«2016-2017 وقۋ جىلىنا جوعارى ءبىلىمدى ماماندار دايىندايتىن الماتىداعى «نۇر مۇباراك» ۋنيۆەرسيتەتىنە 198 گرانت ءبولىندى. ونىڭ 190-ى – باكالاۆرعا, 5-ەۋى – ماگيستراتۋراعا, 3-ەۋى PhD دوكتورانتۋراعا ءبولىندى. ال وڭتۇستىك قازاقستان وبلىسىنداعى «شىمكەنت» جانە «سارىاعاش» مەدرەسە-كوللەدجدەرىنە 175 وقۋ گرانتى ءبولىندى. مەدرەسە شاكىرتتەرى ارنايى شاكىرتاقى الادى», – دەپ مالىمدەدى ب. بەيسەنباەۆ.
«وزدەرىڭىز جاقسى بىلەسىزدەر, ءدىني باسقارما «قازىرگى زاماننىڭ ۇزدىك 500 اعارتۋشى يمامى» جوباسىن قولعا الدى. يمام-مولدالاردىڭ ءبىلىمىن ۇدايى جەتىلدىرىپ وتىرۋ – ءبىزدىڭ باستى نازارىمىزدا. ويتكەنى, بۇگىنگى ءدىن قىزمەتكەرى ۋاقىت تالابىنان استە قالىس قالماۋى ءتيىس. ءبىز قازىرگى يمامداردان ۇنەمى وزدەرىن دامىتىپ, جەتىلدىرىپ, ءدىني ءھام زايىرلى بىلىممەن سۋسىنداپ وتىرۋىن تالاپ ەتەمىز. 2 جىلدىڭ كولەمىندە يمامدارىمىزدىڭ 80 پايىزىن اتتەستاتسيادان وتكىزىپ, ءبىلىم دەڭگەيىن انىقتاپ, سىناقتان سۇرىنگەندەردى قايتا وقىتىپ جاتىرمىز. مىقتى ءدىني كادر مەدرەسەدە قالىپتاسادى. سوندىقتان سىزدەردىڭ جۇمىستارىڭىز ۇلكەن ماڭىزعا يە. ال ۋنيۆەرسيتەتىمىز بەن مەدرەسەمىزگە وقۋ گرانتتارىنىڭ بەرىلۋى – مەملەكەتتىڭ ۇلكەن قولداۋى, قامقورلىعى ەكەنىن ۇمىتپاۋىمىز كەرەك», – دەپ اتاپ ءوتتى باس مۇفتي ەرجان قاجى مالعاجى ۇلى.
بۇگىندە ءدىني باسقارماعا قاراستى 1 ۋنيۆەرسيتەت, 1 يمامداردىڭ ءبىلىمىن جەتىلدىرۋ ينستيتۋتى, 9 مەدرەسە, 2 قاريلار ورتالىعى جۇمىس ىستەيدى. اتالعان ءدىني وقۋ ورىندارىندا 2856 شاكىرت ءبىلىم الۋدا. اتاپ ايتقاندا, «نۇر مۇباراك» ۋنيۆەرسيتەتىندە – 1130 ستۋدەنت, 9 مەدرەسەدە – 1321 شاكىرت, قاريلار ورتالىقتارىندا – 225 شاكىرت, ءبىلىم جەتىلدىرۋ جانە دايىندىق كۋرستارىندا 180 شاكىرت ءدارىس تىڭدايدى.
ال 9 مەدرەسەنىڭ 3-ەۋى («ۇشقوڭىر», «شىمكەنت», «سارىاعاش») كوللەدج دەڭگەيىنە كوتەرىلدى. قالعان مەدرەسەلەر كوللەدج دەڭگەيىنە كوتەرىلۋ باعىتىندا ءتيىستى تالاپتاردى ورىنداپ, قاجەتتى قۇجاتتاردى راسىمدەۋ ۇستىندە. وندا ءدىني پاندەرمەن قوسا زايىرلى پاندەر دە وقىتىلادى. مەدرەسە-كوللەدجدى بىتىرگەن تۇلەكتەر ءدىني سالادا, سونىمەن قاتار مەملەكەتتىك سالادا دا قىزمەت ەتە الادى.
ايگەرىم توقسانبەك