مەدعات قۇلجانوۆتىڭ قۇلشىنىسى
وسىدان التى جىل بۇرىن ۇلىبريتانيانىڭ استاناسى لوندون شاھارىنداعى ەڭ تانىمال Royal Festival Hall كونتسەرت زالىندا كارل دجەنكينستىڭ جەتەكشىلىگىمەن كورولدىك سيمفونيالىق وركەستردىڭ اۋقىمى كەڭ كونتسەرتى زور مارتەبەمەن ءوتتى. ساحنا تورىندە «شاكارىم» سيۋيتاسى ەرەكشە ەكپىنمەن ورىندالدى. ول قازاقتىڭ ۇلى اقىن-كومپوزيتورىنىڭ شىعارمالارى جەلىسىمەن جازىلعان تۋىندى ەدى. سودان سوڭ سيۋيتا الەمنىڭ باسقا دا ونەر وردالارىندا جانە شاكارىمنىڭ تۋعان جەرى – قازاقستاندا دا اسقاق شىرقالدى. بۇدان كەيىن ىلە-شالا «اباي» سيمفونيالىق تۋىندىسى دۇنيەگە كەلدى. مىنە, وسىلايشا مەتسەنات مەدعات قۇلجانوۆتىڭ ەسىمى العاش رەت كوپشىلىككە كەڭىنەن تانىلدى. الايدا, ول تۋرالى اقپارات ينتەرنەتتە كوپ جازىلعان ەمەس. بۇل كىسىمەن جاقىنىراق تانىسۋ ءۇشىن ونىڭ ءجۇرىپ وتكەن جولىنا تەرەڭىرەك ءۇڭىلىپ, وزىمىزشە زەرتتەۋ جۇرگىزدىك. اقىرى مەدعاتپەن تانىسۋدىڭ ءساتى الماتىدا ءتۇستى. اتىمتاي جومارت جان جىلدىڭ تەك بىرنەشە ايىن ارۋ قالا الماتىدا عانا وتكىزىپ, ءتيىستى شارۋاسىن تىندىرۋدى ادەتكە اينالدىرعان. سونىمەن مەدعات قۇلجانوۆ دەگەن كىم ءوزى؟
باستاپقىدا بيزنەسمەن-مۇنايشى قۇرىلىس سالاسىندا شىڭدالىپ-شىنىعىپ وسكەن ەكەن. جاس كەزىندە پوليتەحنيكالىق ينستيتۋتتىڭ ينجەنەرلىك-قۇرىلىس فاكۋلتەتىن ءبىتىرىپ, الماتى, ەكىباستۇز, قاپشاعاي قالالارىنداعى قۇرىلىسقا قاتىسىپ, تالاي عيماراتتا وزىندىك قولتاڭباسىن قالدىرىپتى. جۇمىس ىستەپ ءجۇرىپ اسپيرانتۋرانى دا ءتامامداپ تاستاپتى. ءدام-تۇز بۇيىرتىپ ەكىباستۇزعا جول تارتىپتى. «ەكىباستۇزەنەرگوقۇرىلىس» باسقارماسىنىڭ باستىعى قىزمەتىنە تاعايىندالىپ, قىرۋار ءىستىڭ باسى-قاسىندا جۇرگەنى ءالى كۇنگە ۇمىتىلعان جوق. ال الماتىعا قايتىپ ورالعاننان كەيىن «كازورتتەحستروي» جوبالاۋ ينستيتۋتىنىڭ ءبولىم مەڭگەرۋشىلىگىنە بەكىپ جۇكتەلگەن جۇمىستىڭ تياناقتى تىندىرىلۋىنا ۇلەس قوستى.
ول كەزدە ونىڭ جاسى وتىز سەگىزدە ەدى. «قاجەتتى ۋاقىتتا قاجەتتى جەردە بولعانىما ءالى كۇنگە قۋانامىن, – دەپ ەسكە الادى ءوزى تۋرالى مەدعات كارىم ۇلى. – ءبىز سول تۇستا تۇرعىن ءۇي قۇرىلىسىنداعى جاڭا باعىت – ءبىرتۇتاس قۇيما ءۇي قۇرىلىسىن قولعا الىپ باستاعان ەدىك. مۇنداي تەحنولوگيا تۇرعىن ءۇي قۇرىلىسىندا العاش رەت قولدانىلدى. ىرگەتاستى شەگەندەۋ تەحنولوگياسىنىڭ اۆتورى بەلگىلى قۇرىلىسشى ميحايل زاگورودنەۆ دەگەن تاماشا ازامات بولاتىن. ال ءبىز تۇرعىن ءۇي قۇرىلىسىن سالۋ كەزىندە ونىڭ ادىستەمەسىن ەنگىزۋگە قۇلشىنا كىرىستىك. جاڭانىڭ اتى جاڭا ەمەس پە, تاڭسىق دۇنيەنى ىسكە اسىرۋعا اسىق بولىپ, ۋاقىتىمىزدىڭ كوبىن قۇرىلىستا وتكىزدىك».
شىن مانىسىندە بۇل ءىس بولاشاق كاسىپكەر ءۇشىن ماڭىزدى وقيعاعا اينالدى. جاڭالىق جەردە جاتسىن با. جۇمىسى دوڭگەلەنىپ, تاسى تاۋعا دومالادى. اتالعان جوباعا جوعارى قىزمەتتەگىلەر دە قىزىعۋشىلىق تانىتتى. «ءالى ەسىمدە, الگى قۇرىلىس باستالعاننان سوڭ بىزگە كسرو مەملەكەتتىك قۇرىلىس كوميتەتىنىڭ توراعاسى يۋري باتالين باستاعان بەدەلدى دەلەگاتسيا كەلدى. ونىڭ قۇرامىندا سول كەزدەگى قازاق كسر مينيسترلەر كەڭەسىنىڭ توراعاسى نۇرسۇلتان نازارباەۆ پەن رەسپۋبليكا قۇرىلىس ءمينيسترى نيكولاي ماكيەۆسكي دە بار ەدى. كەلگەن ادامدار جاڭا تەحنولوگيانى قىزۋ تالقىلاپ جاتتى. ءبىز بولساق, نۇرسۇلتان ابىش ۇلىمەن ەلىمىزدەگى جالپى احۋال تۋرالى پىكىرلەسىپ, وي بولىستىك, ءسويتىپ قالىپتاسقان جايتقا ابدەن قانىقتىق», دەپ وتكەن كۇندەر تۋرالى سىر شەرتتى مەدعات قۇلجانوۆ. 1988 جىلى م.گورباچەۆ نارىقتىق ەكونوميكانىڭ جاڭا باعىتى – كووپەراتيۆ قوزعالىسىن ۇيىمداستىرۋ تۋرالى جارلىققا قول قويدى. وسىدان كەيىن مەدعاتتىڭ ومىرىندە ەڭ قىزىقتى ءارى ماڭىزدى كەزەڭ باستالىپ, الداعى تاعدىرىن تۇبەگەيلى وزگەرتىپ جىبەردى. مەدعات كارىم ۇلى كووپەراتيۆ تۋرالى ەستىسىمەن تاۋەكەلگە بەل بايلاپ, العىرلىق پەن تاباندىلىققا سۇيەنىپ ءوز ءىسىن اشۋعا ءوتىنىش جازدى. «باسىندا ماعان كۇلە قاراعاندار كوپ بولدى. كەز كەلگەننىڭ قولى جەتە بەرمەيتىن باسقارما باستىعى قىزمەتىنەن باس تارتىپ, قايداعى ءبىر كۇماندى ىسكە دەن قويعانى نەسى, دەپ اياعىمنان شالعاندار كەزدەستى. مەن ولارعا قارسى قاسقايىپ تۇرۋدى مۇرات تۇتتىم. ءسويتىپ قولعا العان ءىستى العا قاراي سۇيرەۋگە قۇلشىنا كىرىستىم, «سابىر ءتۇبى – سارى التىن» دەمەكشى, كەيىنىرەك راحاتىن كوردىم», دەپ ەسكە الادى وتكەن شاقتى مەدعات كارىم ۇلى.
مەدعات قۇلجانوۆ ورتالىق كوميتەتتىڭ ماقۇلداۋى بويىنشا مينيسترلىكتەن 100 مىڭ رۋبل اقشانى قارىزعا الۋعا قول جەتكىزدى. سودان رۋدنىي قالاسىندا قالىپ ساتىپ الىپ, قۇرىلىسشىلار بريگاداسىن قۇردى. جىل ىشىندە كووپەراتيۆ العاشقى ءبىرتۇتاس قۇيمادان جاتاقحانا عيماراتىن تۇرعىزىپ شىقتى. ونىڭ سالتانانتتى اشىلۋ راسىمىنە نۇرسۇلتان نازارباەۆ پەن نيكولاي ماكيەۆسكي كەلىپ قاتىستى. ءباسپاسوز جانە تەلەۆيزيا وكىلدەرى دە عيماراتتىڭ اشىلۋ ءساتىن جارىسا جاريالاپ, كورسەتتى. قۇرىلىس كووپەراتيۆى قارقىندى جۇمىس ىستەۋدى كۇندەلىكتى داعدىعا اينالدىرىپ بيىكتەن كورىندى. جۇمىسشىلاردىڭ قالتاسى قالىڭداپ, كوڭىل كۇيلەرى مارقايدى. «سول جىلى 7 قاراشادا ءداستۇرلى شەرۋ ءوتىپ جاتقان ەدى. ءبىز مەرەكەگە بارۋدىڭ ورنىنا قۇرىلىس الاڭىندا قۇيماتاس قۇيۋمەن اينالىسىپ جاتتىق. بىزگە پارتكوم حاتشىسى كەلىپ, جۇمىسىمىزدى دەرەۋ توقتاتۋدى تالاپ ەتتى. قۇرىلىسشىلار حاتشىنىڭ امىرىنە قۇلاق اسپاي قويدى. كەلەسى كۇنى سوگىس الىپ, ازەر قۇتىلدىق. ول ۋاقىتتا ءبىز تەك مەرەكەدە عانا ەمەس, سونداي-اق دەمالىس كۇندەرى دە تىزە بۇكپەي ەڭبەك ەتەتىنبىز», دەپ وتكەندى ەسىنە ءتۇسىردى مەدعات كارىم ۇلى. بولاشاق ءىرى كاسىپكەردىڭ نارىقتاعى العاشقى تاجىريبەسى وسىلايشا جەمىستى بولىپ جالعاسا بەردى. كووپەراتيۆ نەسيەگە العان 100 مىڭ ءرۋبلدى ءبىر جىلدان كەيىن قايتارىپ, قارىزدان قۇتىلدى. جۇمىس جالعاسىپ جاتتى, تاجىريبە مولايىپ, تاپسىرىس كولەمى ارتتى. قاپشاعايدا ءبىرتۇتاس قۇيمادان كوتتەدجدەر تۇرعىزۋعا بەل شەشپەي كىرىستى. قۇرىلىسشىلار مەملەكەتتىك باسقارۋ ورگاندارىندا قىزمەت ىستەيتىندەردەن ون ەسەدەن ارتىق جالاقى الىپ, ايدى اسپانعا شىعاردى. مەدعات قۇلجانوۆتىڭ كووپەراتيۆىندە جۇمىس ىستەۋگە قىزىعۋشىلار قاتارى كوبەيدى.
كاسىپكەر قاشاندا ىزدەنىس ۇستىندە جۇرەتىندىگىمەن ەرەكشەلەنەدى. ىزدەنگەن ىزدەگەنىن تاباتىنى راس. وتكەن عاسىردىڭ 1991 جىلى مەدعات قۇلجانوۆ ءۇشىن تابىستى باستالدى. جەكەشەلەندىرۋ ناۋقانى ەندى عانا جۇرگىزىلىپ جاتقان شاق ەدى. مەدعات زارەچنىي كەنتىندەگى ىشكى ىستەر مينيسترلىگىنە قاراستى ءىرى پانەلدى تۇرعىن ءۇي قۇرىلىسى زاۋىتىن ساتىپ الدى. بۇل قازاقستان بويىنشا جەكەشەلەندىرىلگەن العاشقى نىسان بولاتىن. سول جىلدارى م.قۇلجانوۆ قۇرىلىسپەن قۇلشىنىپ اينالىستى. ونىڭ «مونوليت» كووپەراتيۆى الماتىدا جۇلدىز شاعىن اۋدانىن, قاپشاعايدا تۇرعىن ۇيلەردى تۇرعىزدى. بيزنەس ءورىسىن كەڭەيتىپ رەسەيدەگى ۋليانوۆسك اۆتوزاۋىتىندا شاتىر جابىندىسى قۇرىلىسىنا قاتىسىپ, وزبەكستان مەن تۇرىكمەنستاندا تۇرعىن ءۇي نىساندارىنىڭ بوي كوتەرۋىنە اتسالىستى. سىبىردەگى نوۆوكۋزنەتسك قالاسىندا دا قىزۋ ەڭبەككە ارالاسىپ ىسكەرلىگىمەن كوزگە ءتۇستى. ءتورت جىل ىشىندە قۇرىلىس سالاسىندا اۋىز تولتىرىپ ايتالىقتاي تىرلىكتەر اتقارىپ, وزگەلەرگە ونەگە-ۇلگى كورسەتتى.
بيزنەستىڭ قىرى مەن سىرىنا ابدەن قانىققان مەدعات قۇلجانوۆ مۇناي سالاسىمەن اينالىسۋعا دا بەت بۇردى. 1992 جىلى «قۋات» حولدينگىن ۇيىمداستىرىپ وزىنە ەتەنە تانىس ەمەس توسىن ءىستى باستادى. 90-جىلدارى كەڭەس وداعى قۇلاعاننان كەيىن قۇرىلىستا دا قۇلدىراۋدىڭ قالىپتاساتىندىعىن باعامداعان مەدعات كارىم ۇلى مۇناي بيزنەسى تۋرالى كوپ ويلانىپ تولعاندى. ول مەكتەپتە وقىپ جۇرگەندە الەمنىڭ بارلىق ەلدەرىنىڭ ەكونوميكاسىن بارىنشا بىلۋگە اۋەستەندى. شەتەلدىكتەردىڭ تۇسىرەتىن تابىس مولشەرىن شۇقشيا قاراپ تانىستى. ونىڭ مۇنداي توسىنداۋ قىلىعىنا تۋىسقاندارى دا تاڭعالاتىن. اسىرەسە, اپكەسى «مۇنداي شىم-شىتىرىق سانمەن ۋاقىت وتكىزۋدىڭ نە كەرەگى بار», دەپ وتىراتىن. جاستايىنان ءبارىن بىلۋگە قۇشتار بولعان مەدعات ايتقانىنان قايتپاي, ەكونوميكانىڭ قاتپارلى قۇپياسىنا بويلاي بەردى. ارينە, پايداسىن كەيىن كوردى. كاسىپكەرلىك تىزگىنىن قولىنا العاندا باياعى بالا كەزىندەگى قۇمارلىعىنا ريزا بولىپ قالاتىن. جاڭالىققا جانى قۇمار جان باعىن وتىن-ەنەرگەتيكا كەشەنىندە بەكەر سىناپ كورمەپتى. اسىعى الشىسىنان ءتۇسىپ, ءىسى ورگە ورلەدى.
كوپتەن بەرى ونىڭ كوكەيىن كەن ورنىن قالاي ساتىپ الامىن دەگەن تۇيتكىل ابدەن مازالايتىن. ويىن ىسكە اسىرۋعا بەل بۋىپ گەرمانياداعى درەزدەن قالاسىندا ءوتىپ جاتقان ەنەرگەتيكا سالاسىنىڭ كورمەسىنە قاتىسۋعا ساپار شەكتى. ونداعى ماقساتى الەۋەتتى ينۆەستورلار ىزدەپ تابۋ ەدى. البەتتە, ول وپ-وڭاي شەشىلەتىن شارۋا ەمەس ەكەنى دە اقيقات. دەگەنمەن, العا قويعان شارۋاسىن ويداعىداي تىندىردى. تابىسقا جەتۋدىڭ سىرى مىنادا ەدى. جولعا شىعار الدىندا قىزىلوردا وبلىستىق اكىمشىلىگىنەن ۇسىنىمحات الىپ, سونى كورمە بارىسىندا ينۆەستورلارعا ۇسىنا قويعانى قانداي جاقسى بولدى. سەبەبى, الگى حاتتا قالا بيلىگى م.قۇلجانوۆتىڭ باستاماسىنا تولىق قولداۋ كورسەتەدى دەپ جازىلعان ەدى. ۇسىنىمحاتتىڭ ارقاسىندا كورمەگە قاتىسقان مەدعات ەلگە كوكىرەگىنە كوپ وي ءتۇيىپ قايتتى.
الدىنا قويعان ماقساتىن ورىنداۋعا بار كۇش-جىگەرىن جۇمساعان ونىڭ بيزنەستە باعى جانىپ, جۇلدىزى جارقىراي ءتۇستى. جەمىستى جەتىستىككە سەنىمدىلىك پەن تاباندىلىقتىڭ, العىرلىق پەن كورەگەندىكتىڭ ناتيجەسىندە قول جەتكىزگەنى داۋسىز. بۇعان قوسا اتقارىلاتىن شارۋاعا زەرەكتىك تە كوپ جاعدايدا كومەكتەسەدى. كەيدە بارلىق باستامانىڭ وڭدى شەشىلمەيتىن ساتتەرى دە كەزىگەدى. ماسەلەن, مەدعات گەرمانيادا ءبىر ىسكەر اداممەن جۇزدەسكەندە اڭگىمە اۋانى الماتىدا قۇرامىندا قوناقۇي جانە بيزنەس ورتالىعى بار كەشەن قۇرىلىسىن سالۋ ماسەلەسىنە اۋادى. الگى كاسىپكەر قۇرىلىستى 100 %-عا قارجىلاندىرۋدى موينىنا الادى. بىراق, وكىنىشكە قاراي, شارت بويىنشا قۇرىلىسقا ارنالعان جەر تەلىمىن ۇكىمەت ۇيىنەن 500 مەتر راديۋستا ءبولۋدى تالاپ ەتەدى. ال م.قۇلجانوۆ تەك تيميريازەۆ-ماركوۆ كوشەلەرى اۋدانىنان جەر بولىنۋىنە رۇقسات الادى. الايدا, مۇنداي ۇسىنىس گەرمانيالىق كاسىپكەردىڭ كوڭىلىنەن شىقپايدى. سونىمەن اتالعان جوبا جۇزەگە اسپاي ساتسىزدىككە ۇشىرايدى. دەگەنمەن, وتكەنگە وكىنىش ءبىلدىرمەي, ويىنداعى ەكىنشى جوبانى جۇزەگە اسىرۋعا كىرىسەدى. بەرلين قالاسىندا پلاستيكالىق قالدىقتاردى وڭدەيتىن جالعىز زاۋىت جۇمىس ىستەيتىن. قوس بىردەي گەرمانيا قايتا قوسىلعان زاماندا زاۋىت قالا ورتاسىندا قالىپ, كاسىپورىندى جابۋ ماسەلەسى تۋىندادى. مەدعات كارىم ۇلى وسىنداي مۇمكىندىكتى پايدالانىپ بەرليندەگى قالدىقتاردى قازاقستانعا جەتكىزىپ وڭدەۋدى جوسپارلادى. قاجەتتى جابدىق ساتىپ الىپ, پلاستيكالىق بۇيىمدار قالدىقتارىن وڭدەۋدى ۇيعاردى. جابدىق قۇنى ارزانعا تۇسپەدى. باعاسى 150 مىڭ دوللاردى قۇرادى. م.قۇلجانوۆ نەسيە الۋ ءۇشىن بانككە ءوتىنىش بەرگەندە, تاعى دا تىعىرىققا تىرەلدى. «ساتىپ الىپ-سات» ناۋقانى ناعىز قىزىپ تۇرعان كەزدە بانكتەر مۇنداي ساۋدا-ساتتىق وپەراتسيالارىن قارجىلاندىرۋدان قاشقاقتادى.
مەدعات قۇلجانوۆتىڭ تاۋى شاعىلمادى. قايتا جىگەرلەنىپ سەرىكتەس, ارىپتەس ىزدەۋگە ءتاستۇيىن بەكىندى. كۇندەردىڭ كۇنىندە جومارت ينۆەستور, بريتاندىق بيزنەسمەن روبەرت كيسين مىرزامەن كەزدەسە قالماسى بار ما ەدى. ىسكەر اداممەن پىكىرلەسۋ قانداي عانيبەت. شىنى كەرەك, ول كەزدە مەدعات مۇناي سالاسىنا ءالى توسەلمەگەن كەزى-تۇعىن. سويتسە دە, قولداعى بار مۇمكىندىكتى پايدالانىپ, زارەچنىي كەنتىندە ءوز يەلىگىندە ءىرى پانەلدى تۇرعىن ءۇي قۇرىلىسى زاۋىتى بار ەكەندىگىن العا تارتقاندا, شەتەلدىك ىسكەر مەدعاتتىڭ ءۋاجىنە توقتالىپ, جۇرگىزىلگەن كەلىسسوز ويداعىداي اياقتالىپ, ىنتىماقتاستىق مەموراندۋمىنا قول قويىلدى. وسى قۇجات نەگىزىندە كەن ورىندارىن يگەرۋگە مويىن بۇردى. گەولوگيا مينيسترلىگىنەن كەن ورنىن ساتىپ الۋ ماسەلەسىنىڭ ءمان-جايىنا قانىقتى. سودان جۇمىس جۇرگىزۋگە قولايلى قونىس – بەكتاس كەنىشىنە نازارى اۋدى. ءسويتىپ كەنىش مەدعات قۇلجانوۆتىڭ جەتەكشىلىگىندەگى «قۋات» حولدينگتىك كومپانياسىنىڭ قاراماعىنا بەرىلدى.
مۇناي بيزنەسى قوماقتى قارجى اكەلدى. ادال تاپقان اقشانىڭ ارقاسىندا كاسىپكەر مادەنيەت سالاسىنا كوڭىل ءبولىپ قارجىلاندىرۋدى قولعا الدى. 2005 جىلى مەدعات كارىم ۇلى حالقىمىزدىڭ ۇلى اقىنى اباي قۇنانباەۆتىڭ 160 جىلدىعىن استانا قالاسىندا مەرەكەلەۋگە ۇيىتقى تانىتتى. سودان سوڭ مەتسەناتتىڭ قارجىسىمەن 2008 جىلى شاكارىمنىڭ 150 جىلدىعى مەرەكەلەندى. استانادا شاكارىمنىڭ ەكى تومدىق شىعارمالارىن باستىرىپ, ۇلى كومپوزيتوردىڭ مۋزىكاسىن ورىنداۋشىلاردىڭ كەشىن ۇيىمداستىردى. كەيىننەن كارل دجەنكينسكە «شاكارىم» جانە «اباي» مۋزىكالىق شىعارمالارىن جازۋعا قىرۋار قارجى ءبولدى.
كاسىپكەر 2009 جىلى ءوزىنىڭ بۇكىل مۇناي اكتيۆتەرىن ساتىپ لوندونعا قونىس اۋداردى. تۇماندى البيون استاناسىندا كىشى قىزىن ءىلىم-ءبىلىم نەگىزدەرىن تەرەڭ وقىتۋعا ۇيعاردى. قىم-قۋىت جۇمىستا ءجۇرىپ قالجىراعانىن دا سەزىندى. وزگە ەلگە, جاتجۇرتقا كوشكەن جىلى ونىڭ جاسى 60-تان اسىپ جىعىلعان ەدى. بۇكىل سانالى عۇمىرىن بيزنەسكە باعىشتاعان ول ەندى كوبىنەسە قايىرىمدىلىق پەن مەيىرىمدىلىك ىسىنە ارالاسۋدى ءجون سانادى. جاۋاپكەرشىلىگى مەن تاۋەكەلى قاتار جۇرەتىن بيزنەس سالاسىندا تولايىم تابىسقا جەتىپ, تالاي ءىستى تىندىرعانى ءدۇيىم جۇرتقا ءمالىم. تۋعان جەرىندە بيزنەستىڭ جىلىگىن شاعىپ, مايىن ىشكەن مەدعات مەتسەناتتىق ءىستى توقتاتپاۋدى ۇيعاردى. لوندوندا تۇراقتاپ قالۋىڭىزدىڭ سىرى نەدە دەگەن سۇراققا مەدعات كارىم ۇلى «مۇندا الەمنىڭ بارلىق مادەني جەتىستىكتەرى مەن جاۋھارلارى شوعىرلانعان, اسەمدىك پەن ادەمىلىك ۇيلەسىپ, وزىندىك قايتالانباس كەلبەتىمەن ەرەكشەلەنەدى. سوندىقتان دا تۇرىپ جاتقان جايىم بار» دەدى.
بيىل ءبىزدىڭ كەيىپكەرىمىز جەتپىس جىلدىق مەرەيتويىن مەرەكەلەمەك. «قۇدايعا شۇكىر, مەدعات قۇلجانوۆ قايىرىمدىلىق جاساۋدا اتىمتاي جومارتتىعىمەن اتى شىققان بەلگىلى بيزنەسمەن. مەن كوپتى كورگەن اداممىن. ەلىمىزدە مەدعاتتاي مەتسەناتتى ءالى كۇنگە كەزدەستىرگەن جوقپىن. ول ناعىز ەلجاندى ازامات رەتىندە يگى ىستەردىڭ اتقارىلۋىنا مۇرىندىق بولىپ, جۇزەگە اسىرىلۋىنا قاجىر-قايراتىن دا, قارجىسىن دا اياعان ەمەس. ءمادەنيەتىمىز بەن ادەبيەتىمىزدى, بىرەگەي ونەرىمىزدى الەمگە تانىتۋعا جۇمساعان ەڭبەگى ەرەن. اسىرەسە, حاكىم اباي مۇرالارىن جاھاندىق كەڭىستىكتە دارىپتەۋگە جول اشىپ, ەلىمىزدەگى ايتۋلى مادەني وقيعالار ورتاسىندا ءجۇردى. مەدعات پەن ونىڭ ۇلى شىڭعىس ساۋاپتى ءىس اتقارۋدا وزگەلەرگە ونەگە بولارى حاق. نەگىزىنەن شىڭعىس قازىر اكەسىنىڭ ءىسىن العا قاراي جالعاستىرىپ, شوقتىعى بيىك جەتىستىكتەرگە دە جەتتى. ارال تەڭىزى تۋرالى قازاقستاندىق رەجيسسەر كاتيا سۋۆوروۆانىڭ كارتيناسىنا دەمەۋشىلىك جاساپ, ۇلكەن ەكرانعا شىعۋىنا جول اشتى. ال بۇدان بىرنەشە جىل بۇرىن ۆالەري ميحايلوۆتىڭ « ۇلى جۇت» كىتابىن گەرمانيادا باستىرۋعا قولداۋ كورسەتتى. اكەلى-بالالى قۇلجانوۆتاردىڭ اتقارىپ وتىرعان ازاماتتىق ىستەرى قالاي بولعاندا دا ماقتاۋعا تۇرارلىق. قاشاندا قايىرىمدىلىق جاساۋعا قۇشتارلىق تانىتىپ ءجۇرگەن ولاردىڭ الار بەلەستەرى ءالى الدا», دەيدى اقجارىلقاپ تىلەكپەن «كينو» كومپانياسىنىڭ ديرەكتورى, پروديۋسەر سايىن عۇبدۋلين. ءيا, راسىندا دا سايىن عۇسمان ۇلىنىڭ ايتقان سوزىنە يلانباسقا بولمايدى. ويتكەنى, مەدعات قۇلجانوۆتىڭ ادامدىق, ازاماتتىق كەلبەتى اسقاق. ول قاشاندا قايىرىمدىلىق جاساۋعا قۇلشىنىس تانىتادى.
مارات اققۇل,
«ەگەمەن قازاقستان»