قۇرلىقتىق حوككەي ليگاسىندا باق سىنايتىن «بارىستىڭ» بابى ەندى كەلە باستاعانداي. وتكەن سەيسەنبىدە سوچيدە جەرگىلىكتى «سوچيمەن» كەزدەسكەن استانالىقتار 6:3 ەسەبىمەن باسىم ءتۇستى. بۇل – «بارىستىڭ» سوڭعى ءتورت ويىنداعى ءۇشىنشى جەڭىسى.
«سوچي» ويىنشىلارى كەزدەسۋدى وتە قارقىندى باستادى. ناتيجەسىندە 6-مينۋتتا يليا كريكۋنوۆتىڭ كومەگىمەن ەسەپ اشتى. ارادا 6 مينۋت وتكەندە, «بارىس» ساپىنان دميتري گرەنتس مەرگەندىگىمەن كوزگە ءتۇسىپ, تارازى باسىن تەڭەستىردى. الايدا, سوچيلىكتەر بار بولعانى 30 سەكۋندتان كەيىن تاعى دا العا شىقتى. بۇل جولى ناتيجەلى سوققىنى يگور زاحاروۆ جاسادى. ءبىزدىڭ جىگىتتەر 18-مينۋتتا نايدجەل دوۋستىڭ ارقاسىندا ەسەپتى قايتادان تەڭگە كەلتىردى.
ەكىنشى كەزەڭدە «بارىس» ويىنشىلارى قورعانىس پەن شابۋىلدا ساۋاتتى ويناپ, ەسەپتى ەسەلەي بەردى. اتاپ ايتقاندا, 22-مينۋتتا مارتين سەن-پەر, ال 33-مينۋتتا ۆلاديمير ماركەلوۆ مەرگەندىكتەرىمەن كوزگە ءتۇستى. وسى قارقىنىن ءۇشىنشى كەزەڭدە دە جوعالتپاعان ەدۋارد زانكوۆەتستىڭ شاكىرتتەرى 46-مينۋتتا تاعى ەكى شايبا سوقتى. ەرەكشە اتاپ وتەتىن جايت, بۇل گولدار نەبارى 24 سەكۋندتىڭ ىشىندە سوعىلدى. الدىمەن كەۆين داللمەن ەرلەسە, ارتىنشا تابلوعا نۇرسۇلتان بەلگىباەۆتىڭ ەسىمى جازىلدى.
«بارىستىڭ» بۇل باسىمدىعىنا «سوچي» حوككەيشىلەرى 49-مينۋتتا اندرە پەتەرسسون سوققان جالعىز شايبامەن جاۋاپ بەردى. قالعان ۋاقىتتا ەسەپ وزگەرمەي, ەلوردالىقتار وسى ماۋسىمداعى ءتورتىنشى جانە سىرت الاڭداعى ءبىرىنشى جەڭىستەرىنە قول جەتكىزدى. ازىرگە 11 ويىننان 13 ۇپاي جيعان «بارىس» شىعىس كونفەرەنتسياسىندا 13-ورىندا تۇر. استانالىقتار كەلەسى كەزدەسۋىن بۇگىن نيجني نوۆگورودتا جەرگىلىكتى «تورپەدومەن» وتكىزەدى.
ەلامان قوڭىر