جاقىندا ساۋد ارابياسى كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى گۋرم بەن سايد ءال-مالحان كورولدىكتىڭ 85-ءشى ۇلتتىق كۇنىنە وراي رەسمي قابىلداۋ جاسادى. بۇل كۇنى ساۋد ارابياسى كورولدىگىنىڭ نەگىزىن قالاۋشى مارقۇم ابدۋلازيز بەن ابدۋرراحمان ءال ساۋد ساۋد ارابياسىنىڭ حالقىن ءبىر تۋدىڭ استىنا جيناپ, تۇتاس مەملەكەت رەتىندە بىرىكتىرگەن بولاتىن.
ساۋد ارابياسى كورولدىگى قۇرىلعالى بەرى دامۋ جولىندا كوپتەگەن قادامدار جاساپ, قازىرگى تاڭدا حالقىنا جانە وندا تۇراتىن ازاماتتارعا ەڭ جوعارى دەڭگەيدە قىزمەت كورسەتەتىن ەلگە اينالدى. قازىرگى كەزدە الدىڭعى قاتارلى مەديتسينالىق جانە ءبىلىم بەرۋ مەكەمەلەرى, 47 جەرگىلىكتى جانە حالىقارالىق اۋەجاي قىزمەت ەتەدى. سونداي-اق, زاماناۋي عىلىمدارعا ارنالعان زەرتتەۋ ورتالىقتارى قۇرىلدى.
ساۋد ارابياسى قوس كيەگە قىزمەت ەتۋدى ارقاشان وزىنە مارتەبە سانايدى. قاجىلار مەن ۋمرا جاساۋشىلارعا مىندەتتەرىن بارىنشا جەڭىل اتقارۋ ماقساتىندا كوپتەگەن جەڭىلدىكتەر جاسالىنۋدا. كورولدىك الەمدەگى ەڭ كوپ گۋمانيتارلىق جانە دامۋ جولىندا كومەك كورسەتەتىن 10 ءىرى مەملەكەتتىڭ ءبىرى بولىپ تابىلادى. بۇۇ-نىڭ ستاتيستيكاسى بويىنشا, بۇل ەل وتكەن جىلى 6-شى ورىندى يەلەندى. سوڭعى 40 جىلدا كورسەتكەن كومەگىنىڭ جالپى كولەمى 115 ميلليارد دوللاردان اسقان. وسى جىلدار ىشىندە كورولدىك الەمنىڭ 90-نان استام ەلىنە كومەك كورسەتىپتى.
ساۋديالىق ەلشى قابىلداۋدا سويلەگەن سوزىندە ەكى ەل اراسىنداعى ىنتىماقتاستىققا ەرەكشە توقتالدى. «ساۋد ارابياسى كورولدىگىنىڭ كورولى, قوس كيەنىڭ ساقشىسى ءسالمان بەن ابدۋلازيز ءال ساۋد پەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ باسشىلىعى اياسىندا ەكى ەل اراسىندا ەكىجاقتى دوستىق قارىم-قاتىناس ورناعان. سونىڭ ارقاسىندا ىنتىماقتاستىق جاڭا ساتىعا كوتەرىلدى», – دەدى ەلشى.
ەلشى, سونداي-اق, سوڭعى ءبىر جىلداعى ەكى ەلدىڭ قاتىناستارىنان حاباردار ەتتى. ونىڭ ايتۋىنشا, ەر-رياد قالاسىندا بىرىككەن قازاق-ساۋد كوميسسياسىنىڭ 4-ءشى وتىرىسى ءوتتى. كوميسسياعا قازاقستاندىق تاراپتان ينۆەستيتسيالار جانە دامۋ ءمينيسترى توراعالىق ەتەدى. كورولدىكتىڭ ساۋدا جانە ءوندىرىس ءمينيسترى 135 ادامنان قۇرالعان ۇكىمەتتىك دەلەگاتسيانى باستاپ, قازاقستانعا ساپارمەن كەلىپ قايتتى. سونىمەن قاتار, ەكى ەل تاراپىنان كوپتەگەن سالالاردا كەلىسىمشارتتار مەن تۇسىنىستىك مەموراندۋمدارىنىڭ جوبالارى اياسىندا تالقىلاۋ ۇدەرىسى ءجۇرىپ جاتىر.
«وسى جىلى قازاقستان قاجىلارى الماتى اۋەجايىنان مادينە جانە جيددا قالالارىنا تىكەلەي رەيسپەن العاش رەت ساپار شەكتى. بۇل قاجىلاردىڭ قازاقستاننان ساۋد ارابياسىنا دەيىنگى ساپارىنىڭ ۋاقىتى ەداۋىر قىسقاردى دەگەندى بىلدىرەدى. ماسەلە قازاقستاننىڭ قۇزىرلى ورگاندارىمەن جاقسى ىنتىماقتاستىقتىڭ ناتيجەسىندە جۇزەگە استى», – دەدى گۋرم بەن سايد ءال-مالحان.
ءاليسۇلتان قۇلانباي,
«ەگەمەن قازاقستان»
سۋرەتتى تۇسىرگەن
ورىنباي بالمۇرات