وتكەن جىلى كوكتەمدە ەلدى دۇرلىكتىرگەن قىزىلاعاشتاعى سۋ تاسقىنىنا جاقىن كۇندەرى ءبىر جىل بولادى. اۋىل قايتا قالپىنا كەلتىرىلگەنىمەن, 45 ادامنىڭ ءومىرىن جالماعان اپاتقا كىنالى رەتىندە ايىپتالعاندارعا قاتىستى قىلمىستىق ىسكە نۇكتە كويىلىپ, جاقىندا كىنالىلەرگە قاتىستى سوت ۇكىمى شىعارىلدى.
تالدىقورعان اسكەري گارنيزونىنىڭ سوتى دامير احتياموۆ شىعارعان ۇكىمدە «قىزىلاعاش» تابيعات پايدالانۋشىلار اۋىلدىق تۇتىنۋ كووپەراتيۆى باسقارماسىنىڭ ءتوراعاسى ق.بەكەەۆ قىلمىستىق كودەكستىڭ 232-بابىمەن كىنالى دەپ تانىلىپ, 5 جىلعا باس بوستاندىعىنان ايرىلىپ, جازاسىن قونىس كولونياسىندا وتەيتىن بولىپ, بەلگىلەندى. وعان ءۇش جىل بويى كاسىپكەرلىكپەن اينالىسۋعا تىيىم سالىندى.
قىزىلاعاش اۋىلدىق تۇتىنۋ كووپەراتيۆى باسقارماسىنىڭ اتقارۋشى ديرەكتورى م.ءجۇنىسوۆ جوعارىداعى باپ بويىنشا ايىپتى دەپ تانىلىپ, 5 جىلعا قونىس كولونياسىندا جازاسىن وتەۋمەن قاتار 3 جىل كاسىپكەرلىكپەن شۇعىلدانبايتىندىعى اتاپ كورسەتىلدى.
قىزىلاعاش سەلولىق وكرۋگىنىڭ اكىمى ە.ءجۇنىسوۆ قر قىلمىستىق كودەكستىڭ 316-بابىنىڭ 2-ءبولىمىمەن كىنالى دەپ تانىلدى. ول 5 جىلعا باس بوستاندىعىنان ايرىلىپ, 3 جىل باسشىلىق قىزمەتتەردە جۇمىس ىستەمەيتىن بولىپ شەشىلدى. ول جازاسىن قونىس كولونياسىندا وتەيدى. اقسۋ اۋداندىق توتەنشە جاعدايلار ءبولىمىنىڭ باستىعى ك. بايزاقوۆ 316-باپتىڭ 2-بولىمىمەن 2 جىلعا شارتتى تۇردە باس بوستاندىعىنان ايرىلدى.
ايىپتىلار ورىندىعىنداعى الماتى وبلىستىق سۋ رەسۋرستارى كوميتەتىنىڭ بۇرىنعى توراعاسى ا.سابيروۆ, اقسۋ اۋدانى اكىمىنىڭ ورىنباسارى ب.تىنىشباەۆ جانە وبلىستىق توتەنشە جاعدايلار دەپارتامەنتى باستىعىنىڭ ورىنباسارى ە.ەنينگە تاعىلعان كىنا سوتتا دالەلدەنبەگەندىكتەن كىناسىز دەپ تانىلىپ, سوت زالىنان بوساتىلدى.
كۇمىسجان بايجان, الماتى وبلىسى.