ەگەمەندىگىمىزدى الىپ, ەسىمىزدى جيناپ, ەڭسەمىزدى كوتەرگەن كۇننەن بەرگى كەزەڭگە قاراساق, ەل تاريحىندا ەلەۋلى وقيعالار از بولعان جوق. توبەسى كوك تىرەگەن كوپ قاباتتى ءزاۋلىم ۇيلەر, وقۋ وشاقتارى, ونەر وردالارى بىرىنەن سوڭ ءبىرى بوي كوتەرىپ, ەلىمىز ەلدى مەكەندەرىنىڭ اجارى ەسەلەنە ءتۇستى.
كۇنى كەشە ەلوردادا ەرتەڭگى ەل بولاشاعىنا ەڭبەك ەتەتىن ەكى بىردەي عيماراتتىڭ قۇرىلىسى اياقتالدى. ونىڭ ءبىرى – اۋدانى 14 مىڭ شارشى مەتر بولاتىن, 1200 وقۋشىعا لايىقتالعان, 48 وقۋ كابينەتى بار №84 مەكتەپ-ليتسەيى بولسا, ەكىنشىسى – وتاندىق بي ونەرىنىڭ دامۋىنا داڭعىل جول اشاتىن قازاق ۇلتتىق حورەوگرافيا اكادەمياسى. وسىناۋ ونەر مەن ءبىلىم وردالارىنا ەلباسى نۇرسۇلتان نازارباەۆ ارنايى بارىپ, اشىلۋ سالتاناتىنا قاتىستى.
ەلباسى جينالعانداردى جاڭا مەكتەپتىڭ اشىلۋىمەن قۇتتىقتاپ, تاۋەلسىزدىك جىلدارىندا ءبىلىم بەرۋ سالاسىن دامىتۋ جانە قاجەتتى ينفراقۇرىلىمدى قالىپتاستىرۋ ءۇشىن مەملەكەت كوپ كۇش-جىگەر جۇمساعانىن اتاپ ءوتتى.
– كوپتەگەن جاستارىمىز شەت ەلدەردە ءبىلىم الۋدا, بۇل جىلداردا ەلىمىز بويىنشا 1700-دەن استام مەكتەپ, سونىڭ ىشىندە زياتكەرلىك مەكتەپتەر اشىلدى. بيىل 60 جاڭا وقۋ ورنىن اشۋ جوسپارلانۋدا. وسى قادامدار جاس ۇرپاقتىڭ ءوسىپ-وركەندەۋى مەن ەلىمىزدىڭ بولاشاعى ءۇشىن جاسالىپ جاتىر. بۇل مەكتەپ شەيح حاليفپەن كەلىسىم نەگىزىندە سونىڭ قاراجاتى ەسەبىنەن سالىندى. سول ءۇشىن وعان العىس ايتامىن, – دەدى نۇرسۇلتان نازارباەۆ.
وقۋ ورنىنىڭ ينفراقۇرىلىمى 30 ورىندىق وقۋ زالى بار كىتاپحانانى, 360 ورىندىق ءماجىلىس زالىن, سپورت زالىن, جۇگىرۋ جولاعىن, سونداي-اق فۋتبول, باسكەتبول, ۆولەيبولمەن اينالىسۋعا ارنالعان الاڭداردى قامتيدى.
سودان سوڭ ەلباسى قازاق ۇلتتىق حورەوگرافيا اكادەمياسىنىڭ اشىلۋ راسىمىنە قاتىسىپ, قازاقستاندىقتاردى ەلوردادا جاڭا جوعارى وقۋ ورنىنىڭ بوي كوتەرۋىمەن قۇتتىقتادى.
– بۇگىن ءبىز استانادا جاڭا ونەر ورداسىن سالتاناتتى تۇردە اشىپ وتىرمىز. بۇل جەردە ۇلتتىق بالەت پەن بي شەبەرلەرىنىڭ جاڭا شوعىرى وقىپ, تاربيەلەنەدى. مۇندا قازاقستاندىق سالت-ءداستۇر دامىپ, الەمدىك دەڭگەيدەگى بي ونەرىن دامىتۋعا جاڭاشا قادامدار جاسالاتىن بولادى. ۇلتتىق حورەوگرافيا اكادەمياسى – ءبىزدىڭ ەلىمىزدە عانا ەمەس, بۇكىل ورتالىق ازيا ەلدەرىندەگى وسى ۇلگىدەگى العاشقى جوعارى وقۋ ورنى. وندا قازاقستاندىقتارمەن بىرگە, وزگە شەت ەلدەردىڭ شىعارماشىل دارىندى جاستارى وقيتىن بولادى. ەلىمىزدەگى بۇل اكادەميا ۋاقىت وتە كەلە بۇكىل ەۋرازياداعى بالەت پەن بي شەبەرلەرىن دايىندايتىن جەتەكشى ورتالىقتاردىڭ ءبىرى بولاتىنىنا سەنەمىن, – دەدى قازاقستان پرەزيدەنتى.
مەملەكەت باسشىسى اكادەمياداعى وقۋ ءىسى بي مەن بالەت ونەرىنىڭ نەگىزدەرىنەن باستاپ جوعارى وقۋ ورنىنان كەيىنگى ماگيسترلەر مەن دوكتورانتتاردى دايىنداۋعا دەيىنگى ءبىلىم بەرۋ ءۇردىسىنىڭ بارلىق دەڭگەيىن قامتيتىنىن اتاپ ءوتتى.
– بۇل كوپ دەڭگەيلى كاسىبي حورەوگرافيالىق ءبىلىم بەرەتىن تولىق تسيكلدى اكادەميانىڭ ماڭىزدىلىعى مەن بىرەگەيلىگىن ەسكەرە وتىرىپ, وعان مەنىڭ جارلىعىممەن «ۇلتتىق جوعارى وقۋ ورنى» ايرىقشا ءمارتەبەسى بەرىلدى. سىزدەر وسى جاڭا ونەر ورداسىندا جوعارى حالىقارالىق ولشەم مەن ءبىلىم بەرۋدىڭ وتاندىق قايتالانباس ستاندارتىن قالىپتاستىرۋعا تيىستىسىزدەر. سىزدەر قازاقستاننىڭ بي مەن بالەت ونەرىنىڭ جاڭا ۇلتتىق برەندىن ورنىقتىرادى دەپ سەنەمىن, – دەدى نۇرسۇلتان ءابىش ۇلى.
سونداي-اق, قازاقستان پرەزيدەنتى وقۋ ورنىنىڭ بيۋدجەتتەن تىس قاراجات كوزدەرىنە سالىنعانىن ايتىپ, ساۋلەتشىلەر مەن قۇرىلىسشىلارعا اتقارعان جۇمىستارى مەن شىعارماشىلىق ەڭبەكتەرى ءۇشىن العىس ءبىلدىردى.
ءراسىم بارىسىندا نۇرسۇلتان نازارباەۆ اكادەميا رەكتورى ا.اسىلمۇراتوۆاعا بالەرينانىڭ شاعىن ءمۇسىنىن تابىس ەتتى.
– بۇل ءمۇسىندى تۇلەكتەر جىل سايىن ءبىرىنشى سىنىپ وقۋشىلارىنا تابىستايدى, ول بالەت ارتىستەرىنىڭ كاسىبي دەڭگەيى ءوسۋىنىڭ جالعاستىعى مەن اكادەميانىڭ داستۇرلەر ساباقتاستىعىنىڭ سيمۆولى بولادى, – دەدى ەلباسى.
ا.اسىلمۇراتوۆا قازاقستان پرەزيدەنتىنە بىلدىرگەن سەنىمى مەن اكادەمياعا جاعداي جاساعانى ءۇشىن العىس ايتتى.
– ءبىز ءۇشىن مۇندا بىلىكتىلىگى جوعارى ارتىستەر, پەداگوگتار, ونەرتانۋشىلار عانا ەمەس, سونداي-اق ەلىمىزدىڭ ناعىز پاتريوتتارىن, ونەردى قۇرمەتتەيتىن مادەنيەتتى ازاماتتاردى تاربيەلەۋ ماڭىزدى. اكادەميا قازىرگى مويىندالعان مەكتەپتەردىڭ قاتارىنان ءوزىنىڭ لايىقتى ورنىن تابادى دەپ ۇمىتتەنەمىز. ءبىز سول ءۇشىن بار كۇشىمىزدى سالامىز, – دەدى اكادەميا رەكتورى.
سوڭىندا نۇرسۇلتان نازارباەۆ وقىتۋشىلار مەن ستۋدەنتتەرگە ەڭبەك پەن وقۋدا جەتىستىككە, جاڭا شىعارماشىلىق جۇمىستا تابىسقا جەتۋىنە تىلەكتەستىك ءبىلدىردى.
قازاقستان پرەزيدەنتى اكادەميانىڭ قۇرمەتتى قوناقتار كىتابىنا قولتاڭبا جانە «ۋاقىت قۇتى-كاپسۋلاسىنا» ەستەلىك جازبا قالدىردى. بۇدان بولەك, ەلباسى بالەت زالىن, جاتاقحانانى, اسحانا مەن ءبىرىنشى سىنىپ وقۋشىلارىنا ارنالعان وقۋ سىنىپتارىن ارالاپ كوردى.
نۇرسۇلتان نازارباەۆ سالتاناتتى ءراسىمنىڭ قورىتىندىسى بويىنشا وتكەن باق وكىلدەرىنە ارنالعان بريفينگ بارىسىندا بارشا قازاقستاندىقتاردى كەلە جاتقان ءبىلىم كۇنىمەن قۇتتىقتاپ, وقۋشىلارعا, اتا-انالار مەن مۇعالىمدەرگە تابىس پەن مىقتى دەنساۋلىق تىلەدى.
راۋان قايدار,
«ەگەمەن قازاقستان»
سۋرەتتەر پرەزيدەنتتىڭ ءباسپاسوز
قىزمەتىنەن الىندى