كەشە كونستيتۋتسيا كۇنىنە جانە ەل تاۋەلسىزدىگىنىڭ 25 جىلدىعىنا ارنالعان «اتا زاڭ – ەلدىگىمنىڭ ەڭسەسى» تاقىرىبىندا مەرەكەلىك شارا ءوتتى. وعان №64 مەكتەپ-ليتسەيىنىڭ ءبىرىنشى سىنىپ وقۋشىلارى دا قاتىستى.
اتالعان شارا ون جىلدان بەرى ءداستۇرلى تۇردە وتكىزىلىپ كەلەدى. بۇل جولعى ساباقتىڭ ەرەكشەلىگى – تۇڭعىش پرەزيدەنت مۋزەيىندەگى «قازاقستان رەسپۋبليكاسىنىڭ مەملەكەتتىك رامىزدەرى» اتتى ەكسپوزيتسياسىنىڭ جانىندا وتكىزىلۋى. مۇندا مەملەكەتتىك ءانۇراننىڭ ءماتىنى, ەلتاڭبا, تۋ جانە ەلىمىزدىڭ كونستيتۋتسياسى قويىلعان. 1997 جىلدان 2004 جىلعا دەيىنگى جەتى جىل بويى ەلباسىنىڭ العاشقى رەزيدەنتسياسى بولىپ, مەملەكەتتىك ەتالوندار ورنالاسقان جەردە وقۋشىلار اتا زاڭ مەن مەملەكەتتىك نىشاندار تاريحىنا بويلاپ, جادىگەرلەرى تۋرالى تۇسىنىكتەرىن كەڭەيتتى. تارقاتىپ ايتقاندا, ەكسپوزيتسيالاردىڭ تاريحى مەن ماڭىزى تۋرالى مول ماعلۇمات الدى. قولدانىستاعى, ياعني 1995 جىلدىڭ 30 تامىزىندا قابىلدانعان كونستيتۋتسيا ادام, ونىڭ ءومىرى, قۇقىعى مەن مىندەتتەرى جوعارى قۇندىلىق بولىپ تابىلاتىن رەسپۋبليكانىڭ دەموكراتيالىق قۇقىقتىق مەملەكەت رەتىندە دامۋىنىڭ جاڭا قادامى بولدى. كونستيتۋتسيا مەملەكەت دامۋىنىڭ ىرگەتاسىنا اينالعان ەرەكشە تاريحي ماڭىزدى قۇجات ەكەندىگىن بالالار دا جەتە سەزىندى. سونداي-اق, ءپاتريوتيزمدى, رەسپۋبليكا تاۋەلسىزدىگىن جانە قازاقستان حالقىنىڭ بىرلىگىن بۇلدىرشىندەر وزدەرىنىڭ تاقپاقتارىنا ارقاۋ ەتىپ, ءان دە شىرقاپ بەردى.
ءبىرىنشى سىنىپ وقۋشىلارى وتان, تۋعان ءتىل, مەملەكەتتىك رامىزدەر تۋرالى تۇسىنىكتەرىمەن بولىسە وتىرىپ, قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ نەگىزگى زاڭدى ازىرلەۋدەگى ءرولى تۋرالى دا جاتقا ايتتى.
اسقار تۇراپباي ۇلى,
«ەگەمەن قازاقستان»