جاقىندا ماجارستاندا شاعىن فۋتبولدان اۋەسقوي فۋتبولشىلار اراسىندا ەۋروپا چەمپيوناتى ءوتتى. وندا قازاقستان قۇراماسى فينالدا حورۆاتيا كومانداسىمەن كەزدەسىپ, جەڭىسكە جەتتى. ماتچتىڭ نەگىزگى ۋاقىتى 2:2 ەسەبىمەن اياقتالدى. سودان كەيىن پەنالتي سەرياسىندا جەرلەستەرىمىز 6:5 ەسەبىمەن ۇتتى.
كەزدەسۋدىڭ نەگىزگى ۋاقىتىندا احمەت ءشارىپوۆ دۋبل جاسادى. ءسويتىپ, ەلىمىز قۇراماسى العاش رەت شاعىن فۋتبولدان اۋەسقويلار اراسىنداعى ەۋروپانىڭ باستى دوداسىندا جەڭدى.
بۇل سىنعا سايدىڭ تاسىنداي ىرىكتەلگەن 32 كوماندا قاتىستى. ولار 8 توپقا ءبولىنىپ وينادى. قازاقستان س توبىندا بوسنيا جانە گەرتسوگوۆينا, اۆستريا جانە ليتۆا قۇرامالارىمەن كەزدەستى. پلەي-وفف كەزەڭىندەگى 1/16 فينالدا گەرمانيامەن ويناپ, 1:1 ەسەبىمەن اياقتالعان ماتچتا پەنالتي سەرياسىندا باسىم ءتۇستى. ودان كەيىن 1/8 فينالدا ماجارستاندى 5:1, شيرەك فينالدا بوسنيا جانە گەرتسوگوۆينانى 3:1 ەتىپ ۇتسا, جارتىلاي فينالدا چەحيادان 3:0 ەسەبىمەن باسىم ءتۇستى.
ەۋروپا دوداسىنا ەلىمىزدىڭ اتىنان «ەسىل» كومانداسى قاتىستى. بۇل كلۋب استانا قالاسىنىڭ اۋەسقوي فۋتبولشىلار ليگاسىندا ونەر كورسەتەدى. ولار قالالىق ليگانى جەڭىپ العاننان كەيىن قازاقستان چەمپيونى اتانىپ, ەۋروپا دوداسىنا جولداما العان بولاتىن.
داستان كەنجالين,
«ەگەمەن قازاقستان»