قازاقستاننىڭ بوكستان وليمپيالىق قۇراماسى كەشە تۇندە ريو-دە-جانەيوروعا امان-ەسەن جەتتى. «حابار» تەلەارناسى ءتىلشىسىنىڭ حابارلاۋىنشا, سپورتشىلاردىڭ ءبارى برازيليا جەرىنە جەتكەن بويدا وليمپيالىق قالاشىققا ورنالاسقان.
وليمپياداعى بوكسشىلار ءتۋرنيرى 6 تامىزدا باستالىپ, ويىندار جابىلعانعا دەيىن سوزىلادى.
ەسكە سالا كەتەيىك, قازاقستاننىڭ ەرلەر قۇراماسى بۇل جولى وليمپياداعا العاش رەت 10 سالماق بويىنشا جارىسقا وكىلىن قويىپ, تولىق قۇرامىمەن قاتىسقالى وتىر. بۇل قۇرامدا ءبىرجان جاقىپوۆ (49 كگ), ولجاس ساتتىباەۆ (51 كگ), قايرات ەراليەۆ (56 كگ), بەرىك ءابدىراحمانوۆ (60 كگ), ابىلايحان ءجۇسىپوۆ (64 كگ), دانيار ەلەۋسىنوۆ (69 كگ), جانىبەك ءالىمحان ۇلى (75 كگ), ادىلبەك نيازىمبەتوۆ (81 كگ), ۆاسيلي لەۆيت (91 كگ) جانە يۆان دىچكو (+91) بار.
وسى جولى ءبىرجان ءۇشىنشى مارتە وليمپياداعا قاتىسقالى تۇر. ال دانيار ەلەۋسىنوۆ, ادىلبەك نيازىمبەتوۆ جانە يۆان دىچكو ءۇشىن بۇل ەكىنشى ويىندار بولماق. مۇنىڭ الدىندا, 2012 جىلى لوندوندا ادىلبەك – كۇمىس, يۆان قولا مەدال جەڭىپ العان.
ايەلدەر بوكسىندا تۋرنيردە ءۇش سالماق بويىنشا مەدالدار ساراپقا تۇسەدى. سونىڭ ەكى سالماعىندا قازاقستاندىقتار جاينا شەكەربەكوۆا (51 كگ) مەن داريعا شاكىموۆا (75 كگ) سايىسقا قاتىسادى. ال 64 كگ سالماقتا ءبىزدىڭ بوكسشىمىز زارينا تسولوەۆا ليتسەنزيا الا المادى.
«حابار» تەلەارناسى قازاقستاندىق سپورتشىلاردىڭ قاتىسۋلارىمەن وتەتىن بارلىق سپورت جارىستارىنان تىكەلەي ەفيردە حابار بەرىپ تۇرادى.
دامير قوجامقۇل