ءورت – ءتىلسىز جاۋ. قاس-قاعىم ساتتە تۇتانارىن كىم بىلگەن؟ الايدا, قىراعى جاندار باردا ونىڭ دا الدىن الۋعا بولادى ەكەن. اتىراۋلىق قوس پوليتسيا سەرجانتتارى ارتۋر مىرزاعاليەۆ پەن سامات زۇلحايىروۆ تاڭ ەندى سىبىرلەپ اتقان تۇستا جەكە سەكتورداعى تۇرعىن ءۇيدىڭ شاتىرىن وت شالعانىن بايقاپتى. ءالى دە ۇيقىسىنان ويانا قويماعان تۇرعىندار تىنىشتىعىن كۇزەتىپ ءجۇرگەن پوليتسەيلەر دەرەۋ كومەككە ۇمتىلىپتى.
الايدا, ءۇي يەلەرى قاپەلىمدە ويانا قويماعان. قاۋىپتىڭ الدىن الۋ ءۇشىن پوليتسيانىڭ ءبىرى ءورت سوندىرۋشىلەردى شاقىرىپ, ەكىنشىسى باسپاناعا كىرگەن. ال ۇيدە 7 ادامى بار وتباسى تۇگەلدەي ۇيىقتاپ جاتقان بولىپ شىقتى. پوليتسەيلەر ولاردى شاتىرى وتقا ورانعان باسپانادان امان-ەسەن شىعاردى.
ءورت سوندىرۋشىلەر قىزىل جالىننىڭ ورشۋىنە جول بەرمەي, دەرەۋ ءسوندىرىپ ۇلگەردى. بىراق, شاتىرى قۇلادى. بۇل باسپانانىڭ شاتىرىندا جوندەۋدەن كەيىن اعاش جاڭقالارى قالعانى بەلگىلى بولدى.
جولداسبەك شوپەعۇل,
«ەگەمەن قازاقستان»
اتىراۋ