جاقىندا پاۆلودار قالاسىندا ءبىلىم جانە عىلىم مينيسترلىگى جانە «ورلەۋ» بىلىكتىلىكتى ارتتىرۋ ۇلتتىق ورتالىعى» اكتسيونەرلىك قوعامىنىڭ مۇرىندىق بولۋىمەن «ءبىلىم بەرۋدەگى يننوۆاتسيالار مەن تاجىريبە: ۋاقىت تالابى» اتتى ەكىنشى رەسپۋبليكالىق پەداگوگيكالىق وقۋلار – وزگەرىستەر مەن شەبەرلىك كەرۋەنى وتكىزىلدى.
ءىس-شارانىڭ ماقساتى – پەداگوگتەردىڭ كاسىبي بىلىكتىلىگىن شىڭداۋ, ءبىلىم بەرۋ سالاسى قىزمەتكەرلەرىنىڭ پەداگوگيكالىق شەبەرلىگىن كوتەرۋ, وقۋشىلار مەن جاستاردى تاربيەلەۋ مەن وقىتۋداعى وزىق يننوۆاتسيالىق پەداگوگيكالىق ءتاجىريبەلەردى جيناقتاپ, تاراتۋ ەدى.
ءداستۇرلى ەكىنشى رەسپۋبليكالىق پەداگوگيكالىق وقۋلاردا جاڭالىقتىڭ جارشىسى بولۋعا ەلىمىزدىڭ 32824 پەداگوگى قاتىستى. قازاقتىڭ اسا كورنەكتى اعارتۋشى-پەداگوگى, جازۋشى, ەتنوگراف, فولكلورشى, قوعام قايراتكەرى ىبىراي ءالتىنساريننىڭ 175 جىلدىق مەرەيتويى قۇرمەتىنە ارنالىپ وتكىزىلگەن پەداگوگيكالىق وقۋلار ەڭ پەرسپەكتيۆالى يننوۆاتسيالىق جوبالاردى انىقتاپ, ولاردى جۇزەگە اسىرۋعا جول اشاتىن تاجىريبە الماسۋعا جانە پىكىرتالاسقا ارنالعان ورىن, كاسىبي شەبەرلىك-شىڭدالۋ مەكتەبى بولدى. پەداگوگيكالىق وقۋلارعا اۋداندىق (قالالىق) جانە وبلىستىق كەزەڭدەردەن سۇرىنبەي وتكەن 122 ەڭ ۇزدىك جۇمىس رەسپۋبليكالىق قورىتىندى كەزەڭدە ءوزارا باق سىناسىپ, وزدەرىنىڭ بىرەگەي ءتاجىريبەلەرىمەن جانە جەكەلەي ەرەكشە قاسيەتتەرىمەن كوزگە ءتۇستى. پەداگوگيكالىق وقۋلاردىڭ جۇمىسى – مەكتەپكە دەيىنگى ءبىلىم بەرۋدەن باستاپ, جوعارى ءبىلىم بەرۋگە دەيىنگى ءبىلىم مازمۇنىن جاڭارتۋ ماسەلەلەرىن قامتىعان بارلىق ءبىلىم بەرۋ ساتىلارى بويىنشا 8 باعىتتا ستراتەگيالىق زەرتحانالار فورماتىندا ۇيىمداستىرىلدى.
ەكىنشى رەسپۋبليكالىق پەداگوگيكالىق وقۋلاردىڭ جۇمىسىنا ءبىلىم جانە عىلىم مينيسترلىگىنىڭ جاۋاپتى حاتشىسى ءامىرحان راحىمجانوۆ قاتىستى. ول فورۋم قاتىسۋشىلارىنا ساتتىلىك تىلەپ, ءبىلىم سالاسىنىڭ الدىندا كۇردەلى, ءارى ماڭىزدى باستى مىندەتتەر تۇرعانىن اتاپ ءوتتى. بۇقار جىراۋ, م.ج.كوپەەۆ, س.تورايعىروۆ, ج.مۇسا, ق.ساتباەۆ, ش.ءشوكين, ءا.مارعۇلان, ش.ايمانوۆ ءتارىزدى تالاي دارىن مەن تالانتتى دۇنيەگە اكەلگەن ۇلىلار مەكەنىندە وتكىزىلىپ جاتقان ءىس-شارا مەملەكەتىمىزدىڭ ءبىلىم بەرۋ ساياساتىن جۇزەگە اسىرۋدىڭ ءبىر قادامى, سوعان قوسار ۇلەس ەكەنىنە توقتالدى. ءامىرحان مۇراتبەك ۇلى قازاقستان رەسپۋبليكاسىنىڭ ءبىلىم بەرۋ مەن عىلىمدى دامىتۋدىڭ ستراتەگيالىق باعىتتارىن جۇزەگە اسىرۋداعى «ورلەۋ» بىلىكتىلىكتى ارتتىرۋ ۇلتتىق ورتالىعى» اق قىزمەتىنە جوعارى باعا بەردى.
س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى, پاۆلودار مەملەكەتتىك پەداگوگيكالىق ينستيتۋتى, يننوۆاتسيالىق ەۋرازيالىق ۋنيۆەرسيتەتى عالىمدارىنان قۇرىلعان ساراپتامالىق قازىلار القاسى قاتىسۋشىلاردىڭ جۇمىسىن باعالاۋ بارىسىندا پەداگوگتەردىڭ جۇمىس مازمۇنىنىڭ يننوۆاتسيالىق يدەيالار باسىمدىعىن, ونىڭ تاجىريبەلىك باعىتىن ەرەكشە باعالادى.
ەكىنشى رەسپۋبليكالىق پەداگوگيكالىق وقۋلاردىڭ قاتىسۋشىلارى ىنتىماقتاستىق احۋالىن قۇرۋ, ءوزارا پىكىر الماسۋ, ءتيىمدى سۇحبات جۇرگىزۋ, پەداگوگيكالىق قىزمەتتىڭ الداعى قادامدارىن بەلگىلەۋ ءۇشىن «ورلەۋ» باۇو» اق بارلىق قاجەتتى جاعدايدى جاساعانى تۋرالى پىكىرلەرىن ءبىلدىردى.
رەسپۋبليكانىڭ پەداگوگيكالىق قىزمەتكەرلەرى وزدەرىنىڭ بىرەگەي يننوۆاتسيالىق تاجىريبەلەرىن, زەرتتەۋ قىزمەتىنىڭ ءازىرلەمەلەرىن, جالپى دارىنىن اشاتىن پەداگوگيكالىق وقۋدى وتكىزۋ تاماشا ءداستۇرگە اينالىپ وتىرعانىن العا تارتتى.
«ەل تاۋەلسىزدىگى, ۇلت مۇراتى, ۇرپاق بولاشاعى سياقتى ۇلى قۇندىلىقتار عانا ماڭگى», دەيدى ەلباسى ءوز جولداۋىندا. ولاي بولسا, بۇگىنگى تۇمانىڭ تۇنىعىنداي تۋما تالانتتار جەرىنەن شابىت العان ۇستازدار قاۋىمى قاجىرلى ەڭبەكتەرىمەن باياندى ەتۋگە جۇمىلارى انىق. ەكىنشى رەسپۋبليكالىق پەداگوگيكالىق وقۋلاردىڭ جەڭىمپازدارى مەن جۇلدەگەرلەرىنىڭ شىققان شىڭدارى مەن باعىندىرعان بيىكتەرى وسىنى دالەلدەيدى. ءيا, ولاردىڭ شىعارماشىلىق جۇمىستارى قاشاندا جەمىستى بولا بەرمەك.
بۇلعىن جالماعامبەتوۆا,
«ورلەۋ» بىلىكتىلىكتى ارتتىرۋ ۇلتتىق
ورتالىعى» اق فيليالى پاۆلودار
وبلىسى بويىنشا پەداگوگيكالىق
قىزمەتكەرلەردىڭ بىلىكتىلىگىن ارتتىرۋ
ينستيتۋتىنىڭ ديرەكتورى