كەشە ورتالىق كوممۋنيكاتسيالار قىزمەتىندە مەملەكەتتىك قىزمەت ىستەرى ۆيتسە-ءمينيسترى ايگۇل شايىموۆا مەن مەملەكەتتىك قىزمەت سالاسىن باقىلاۋ باسقارماسىنىڭ باسشىسى ماقسات ءمۋسيننىڭ قاتىسۋىمەن ءباسپاسوز ءماسليحاتى ءوتتى. وندا جاڭا ادەپ كودەكسىنىڭ مەملەكەتتىك قىزمەتكەرلەر الدىنا قويىلاتىن تالاپتارى ايتىلىپ, سالا ماماندارىنىڭ قوعامداعى ءرولى, ولاردىڭ ەتيكاسى مەن ەستەتيكاسى ءسوز بولدى.
ايگۇل شايىموۆانىڭ ايتۋىنشا, مەملەكەتتىك قىزمەتشىلەر ءتارتىبىنىڭ ستاندارتتارى ەكىگە ءبولىپ قاراستىرىلعان. ولار بازالىق جانە احۋالدىق بولىپ اتالادى. مۇنىڭ بازالىق جۇيەسى مەملەكەتتىك قىزمەتكەرلەردىڭ مورالدىق-ەتيكالىق كەيپىنە قويىلاتىن نەگىزگى تالاپتاردى قالىپتاستىرۋعا جانە ولاردىڭ ءتارتىپ ۆەكتورىن انىقتاۋعا باعىتتالعان.
– جاڭا ادەپ كودەكسىندە قابىلدانعان شەشىمدەردىڭ زاڭدىلىعى, ادىلدىك پەن اشىقتىقتىعىن قامتاماسىز ەتۋ, قىزمەتتىك مىندەتتەردى ءتيىمدى ورىنداۋ جانە كاسىبي دەڭگەيىن ارتتىرۋ, جەكە ماسەلەلەردى شەشۋ تۇرعىسىندا قىزمەتتىك لاۋازىمىن پايدالانۋعا تىيىم سالۋ, ىسكەرلىك ادەپ پەن رەسمي ءىس-قيمىل ەرەجەلەرىن ساقتاۋ سەكىلدى جايتتار تولىق قامتىلعان. سوندىقتان دا اتالعان كودەكس مەملەكەتتىك قىزمەتكەرلەرگە ۇنەمى كورسەتىلەتىن مەملەكەتتىك قىزمەتتەردىڭ ساپاسىن ارتتىرۋعا ناقتى تالاپ قويادى, – دەدى ۆيتسە-مينيستر. سونىمەن قاتار, ول ەلىمىزدەگى مەملەكەتتىك قىزمەتتەر ساپاسىنا 80 پايىز قازاقستاندىقتاردىڭ كوڭىلى تولاتىنىن جەتكىزدى.
– بۇل جۇرگىزىلگەن ساۋالداما ناتيجەسى. جالپى, ادەپ كودەكسىندە قىزمەتكەرلەردىڭ ءجۇرىس-تۇرىسى, مادەنيەتى, سونداي-اق, قىزمەتتىك مىندەتتەردى ورىنداۋ تالاپتارى كورسەتىلگەن, – دەدى ول.
ءباسپاسوز ءماسليحاتىندا مەملەكەتتىك قىزمەتشىلەردىڭ قوعامدىق ورىنداردا ءوزىن ءوزى ۇستاۋى, ىشىمدىك ىشپەۋى, بالاعات سوزدەر ايتپاۋى, ەگەر وسىنداي ولقىلىقتارعا ورىن بەرگەن جاعدايدا ولاردىڭ ءىس-ارەكەتى تارتىپتىك كەڭەستە قارالاتىنى ايتىلدى. جيىن سوڭىندا ماقسات مۋسين جىل سايىن ۇسىنىلاتىن مەملەكەتتىك قىزمەتتەر ساپاسى جاقسارىپ كەلە جاتقانىن تىلگە تيەك ەتتى.
تالعات رايىمبەك,
«ەگەمەن قازاقستان»