سۋپەرمەملەكەت دەگەنىمىز وسىنداي ما؟
گەرمانيا مەن فرانتسيا ەۋرووداقتى رەفورمالاۋ جوباسىن دايىنداعان. بۇل تۋرالى TVP Info تەلەارناسى حابارلادى. تەلەارنانىڭ قولىنا ەكى ەل سىرتقى ىستەر مينيسترلەرى قول قويعان قۇجات تۇسكەن سەكىلدى.
بۇل جەردە اڭگىمە پاريج بەن بەرليننىڭ ەۋرووداقتاعى باسقا ەلدەرگە قويىپ وتىرعان ۋلتيماتۋمى تۋرالى بولىپ وتىر. جوبا بويىنشا, وعان قاتىسۋشى ەلدەردىڭ ءىس جۇزىندە وزدەرىنىڭ جەكە ارمياسىنا, ارنايى قىزمەتتەرىنە, قىلمىستىق كودەكسى مەن ۇلتتىق ۆاليۋتاسىنا قۇقى بولمايدى ەكەن. سونداي-اق, ءبىرتۇتاس ارنايى قىزمەتتەر مەن سالىقتىق جانە ۆيزالىق جۇيە قۇرۋ جوسپارلانىپ وتىرعانعا ۇقسايدى. بۇعان قوسا, جوبادا ورتاق سىرتقى ساياسات جۇرگىزۋ مەن ناتو-نىڭ ەۋروپا قۇرلىعىنداعى ءرولىن شەكتەۋ تۋرالى ماسەلە قاراستىرىلىپتى. وسىلايشا جاڭا وداققا مۇشە مەملەكەتتەر ءىس جۇزىندە ءوز شەكارالارىن باقىلاۋدان دا ايىرىلاتىن ءتارىزدى.
تۇركيا مەن ءيزرايلدىڭ ۋاعدالاستىعى
تۇركيا مەن يزرايل قارىم-قاتىناستارىن جاقسارتۋ تۋرالى ۋاعدالاستىققا كەلدى. بۇل تۋرالى تۇركيا پرەمەر-ءمينيسترى بينالي يىلدىرىم مالىمدەدى, دەپ حابارلادى «رەيتەر» اگەنتتىگى.
كەلىسىم شەڭبەرىندە تاراپتار ەندى جاقىن ارادا ەلشىلەرىمەن الماساتىن بولادى. تۇركيا پرەمەرىنىڭ سوزىنە قاراعاندا, يزرايل 2010 جىلى ورىن العان قاقتىعىس كەزىندە قازا تاپقان نەمەسە زارداپ شەككەن تۇرىك ازاماتتارىنىڭ وتباسىلارىنا 20 ميلليون دوللار وتەماقى تولەۋگە كەلىسىمىن بەرگەن. ءوز كەزەگىندە تۇركيا گازا سەكتورىنا اسكەري ەمەس ونىمدەرمەن گۋمانيتارلىق كومەك كورسەتپەكشى. ال 2010 جىلى گازا سەكتورىنا قويىلعان بلوكادانى بۇزۋعا بارعان تۇرىك كورابلدەرىنە يزرايلدىك اسكەريلەر باسا-كوكتەپ كىرىپ, تۇركيانىڭ توعىز ازاماتىن اتىپ ولتىرگەنى بەلگىلى. جانجال سودان تۋعان بولاتىن.
ەليزاۆەتا ءىى-ءنىڭ دەنساۋلىعى قانداي؟
ۇلىبريتانيا پاتشايىمى ەليزاۆەتا ءىى سولتۇستىك يرلاندياعا ساپارى كەزىندە دەنساۋلىعىنا قاتىستى قويىلعان سۇراققا قالجىڭمەن جاۋاپ قايتارىپتى. مۇنى The Telegraph حابارلادى.
پاتشايىم سولتۇستىك يرلانديانىڭ استاناسى – بەلفاست قالاسىنداعى حيللسبورو زاموگىندا وسى ەل ءبىرىنشى ءمينيسترىنىڭ ورىنباسارى مارتين ماكگيننەسسپەن كەزدەسكەن بولاتىن. سول كەزدە ءبىرىنشى ءمينيستردىڭ ورىنباسارى 90 جاستاعى پاتشايىمنان «حال-جاعدايىڭىز قالاي؟» دەپ سۇراعان عوي. «ازىرشە ايتەۋىر ءتىرىمىن» دەپ جاۋاپ قايتارىپتى ەليزاۆەتا ءىى. ماكگيننەسس بولسا, بۇعان قوسا بۇگىندە بىرىككەن كورولدىكتە ادام ءتۇسىنىپ بولمايتىن وقيعالار ورىن الىپ جاتقانىن كولدەنەڭ تارتقان. پاتشايىمنىڭ ەكى كۇندىك ساپارى ۇلىبريتانيانىڭ ەۋرووداقتان شىعۋ ماسەلەسىنە ارنالعان بولاتىن.
قىسقا قايىرعاندا:
تۇركيا پرەمەر-ءمينيسترى بينالي يىلدىرىم ءوز ەلىنىڭ رەسەيدىڭ اتىپ تۇسىرىلگەن سۋ-24 ۇشاعى ءۇشىن وتەماقى تولەۋدەن باس تارتاتىنىن مالىمدەدى. «وتەماقى تۋرالى اڭگىمە قوزعالعان ەمەس, تۇركيا تەك كەشىرىم سۇراعان بولاتىن», دەپ اتاپ كورسەتكەن ۇكىمەت باسشىسى. مۇنى «رەيتەر» حابارلادى.
اقش-تىڭ ميسسيسيپي شتاتىنداعى دجەكسون وكرۋگىندە ورنالاسقان گاز وڭدەيتىن زاۋىتتا جارىلىس بولدى. كۋاگەرلەردىڭ سوزدەرىنە قاراعاندا, جارىلىستان سوڭ بىردەن ءورت شىققان. ازىرشە وپات بولعاندار مەن زارداپ شەككەندەر تۋرالى ناقتى اقپارات جوق.
رەسەيدەن تۇركياعا بارىپ دەمالاتىندار اعىنى وسى جىلدىڭ ءبىرىنشى توقسانىندا وتكەن جىلدىڭ سايكەس كەزەڭىمەن سالىستىرعاندا 71 پايىزعا قۇلاپ, بار بولعانى 20,9 مىڭ ادامدى قۇراعان. بۇل اقپاراتتى رەسەي تۋريستىك يندۋستريا وداعىنىڭ ءباسپاسوز حاتشىسى يرينا تيۋرينا تاراتتى.
پوليتسيا جاپونيانىڭ Japan Airlines اۋە كومپانياسىنىڭ ەكىنشى ۇشقىشىن قاماۋعا الدى. ول رەيس الدىندا لاينەر كاپيتانىمەن بىرگە ءسپيرتتى ىشىمدىك ءىشىپ, ونىمەن ىلىگىسىپ قالعان. جانجالداسىپ جاتقان ەكەۋگە اراشا تۇسكەن پوليتسەيدى 42 جاستاعى سويتي تاتسۋمي جۇدىرىقتىڭ استىنا العان. ءسويتىپ, كانادزاۆادان توكيوعا ۇشاتىن رەيس كەيىنگە قالدىرىلىپتى.
گاستاربايتەرلەر ۇيىمداستىرعان توبەلەس
شامامەن 100 گاستاربايتەر لەنينگراد وبلىسىنىڭ كۋدروۆو ەلدى مەكەنىندەگى قۇرىلىس الاڭىندا توبەلەس ۇيىمداستىرعان. جۇدىرىقتاسۋعا قاتىسقاندار ارماتۋرا مەن تاياقتار جانە تاستار قولدانىپ, ءبىر-بىرىنە تراۆماتيكالىق قارۋدان وق اتقان.
كەيبىر توبەلەسكەندەر جاراقات العان. پوليتسيا 20 ادامدى قاماپ تاستاعان. ال توبەلەستى قۇرىلىس الاڭىنىڭ جانىنان ءوتىپ بارا جاتقان داعىستاننىڭ تۋماسى ۇيىمداستىرسا كەرەك. ول ورتالىق ازيادان بارعان ميگرانتتارمەن سوزگە كەلىپ, كەرىسىپ قالىپتى. وقيعاعا كۋا بولعانداردىڭ ايتۋلارىنشا, داعىستاندىق مىنگەن اۆتوموبيل سول ماڭدا تۇرعان گاستاربايتەردىڭ ءبىرىنىڭ ۇستىنە جاڭبىردىڭ لاي سۋىن شاشىراتىپ كەتكەن. سالدارىنان, جۇرگىزۋشى سوققىعا جىعىلسا, كەيىن ول وزىمەن بىرگە «قوسىمشا كۇش» ەرتىپ كەلگەن...
جۇك كولىگىنەن 17 كگ. گەروين تابىلدى
رەسەيدىڭ ەكاتەرينبۋرگ قالاسىندا فەدەرالدىق قاۋىپسىزدىك قىزمەتىنىڭ سۆەردلوۆ وبلىسى بويىنشا باسقارماسىنىڭ قىزمەتكەرلەرى قىرعىزستاننان كەلەتىن گەرويننىڭ جولىن جاپتى. بۇل تۋرالى باسقارمانىڭ ءباسپاسوز قىزمەتى حابارلادى.
باسقارمانىڭ اقپاراتىنا قاراعاندا, قىرعىزستان ازاماتى ءوزىنىڭ سىبايلاستارىمەن ەسىرتكى اكەلۋدىڭ سىزباسىن دايىنداعان. ءسويتىپ, ەسىرتكىنىڭ وسى كۇشتى ءتۇرى ەكاتەرينبۋرگكە فەدەرالدى كولىك كومپانياسىمەن جەتكىزىلىپ تۇرعان. «كولىك كومپانياسىنىڭ قىزمەتكەرلەرى تاۋار تولتىرىلعان جۇك كولىگىندە ەسىرتكى بار دەپ ەش كۇدىكتەنبەگەن دە», دەپ اتاپ وتەدى ارنايى قىزمەتتەگىلەر. باسقارما قىزمەتكەرلەرى جۇك تيەلگەن اۆتوكولىكتى كومپانيانىڭ ارنايى تۇراعىندا كۇتىپ الىپ, 33 جاستاعى قىرعىزستان ازاماتىن تۇتقىنداعان. تەكسەرە كەلگەندە جۇك كولىگىنەن 17,5 كگ. گەروين شىققان.
تانزانياداعى گەلي قورى
ۇلىبريتانيالىق جانە نورۆەگيالىق گەوحيميكتەر تانزانيا اۋماعىنان گەليدىڭ وراسان مول قورىن تاپقان. شىعىس افريكا مەملەكەتىندەگى جەراستى كەن ورنىندا وسى ەلەمەنتتىڭ 1,5 ميلليارد تەكشە مەتر قورى بار ەكەنى بەلگىلى بولىپ وتىر.
عالىمدار گەليدى ونى ىزدەۋدىڭ ارنايى دايىندالعان ءتاسىلى ارقىلى تابۋعا قول جەتكىزگەن. بۇل گاز جەر بەتىنە ۆۋلكاندىق بەلسەندىلىك ناتيجەسىندە كوتەرىلەدى ەكەن. سۇيىق گەلي نەگىزىنەن جوعارى وتكىزگىشتى ماگنيتتەردى سۋىتۋ ءۇشىن, اتاپ ايتقاندا, ماگنيتتى-رەزونانستى توموگرافيا ءۇشىن پايدالانىلادى. قازىرگى كەزدە جىلىنا شامامەن 220 ميلليون تەكشە مەتر گەلي ىسكە جاراتىلادى. ونى ساتاتىن الەمدەگى نەگىزگى ءىرى ەل اقش سانالادى. بۇل ەلدەگى بارلانعان گەلي قورى 4,3 ميلليارد تەكشە مەتردى قۇرايدى. بىراق ول جىل وتكەن سايىن تەز ازايىپ كەلە جاتىر ەكەن.
ينتەرنەت ماتەريالدارى نەگىزىندە ازىرلەندى