ايماقتاردى ارالاپ كەتتى
تاۋەلسىزدىكتىڭ 25 جىلدىعىنا وراي ەلىمىز بويىنشا «ۇلتتىق مۋزەي – سەنىڭ قالاڭدا!» اتتى مادەني تۋر باستاۋ الدى. قازاقستان رەسپۋبليكاسىنىڭ ۇلتتىق مۋزەيى ۇيىمداستىرىپ وتىرعان ءمادەني ساياحات الدىمەن ورال قالاسىنا تابان تىرەدى. ورالدىق كورەرمەندەر ۇلتتىق مۋزەيدىڭ ەڭ قۇندى مۇراسىنىڭ ءبىرى – «التىن ادام» جادىگەرىن تاماشالاپ, ارنايى باعدارلامانىڭ كۋاسى بولدى.
«التىن ادام» – حالقىمىزدىڭ ەڭ قۇندى جادىگەرى, ەلدىگىمىزدىڭ سيمۆولى. اتاۋلى جوبا اياسىندا قالا جۇرتشىلىعى مەن قوناقتارى تەك مۋزەي تورىندە عانا تۇراتىن قۇندى ءجادىگەرمەن تەرەڭىرەك تانىسۋعا مۇمكىندىك الدى. سونىمەن قاتار, باتىسقازاقستاندىقتار «ۇلتتىق مۋزەيدىڭ 10 شەدەۆرىن» تاماشالادى. عاسىرلار بويى قالپىن بۇزباعان اسىل ميراس ونەرسۇيەر قاۋىمنىڭ ەرەكشە قىزىعۋشىلىعىن تۋدىردى. استانالىق مۋزەيدى ارالاماعاندار ءۇشىن «ۇلتتىق مۋزەيگە ساياحات» تانىستىرۋ بەينەروليگى جان-جاقتى اقپارات بەردى. سونىمەن قاتار, 3D تەحنولوگياسى ارقىلى مۋزەيدىڭ ءار زالى جەكە-جەكە تانىستىرىلدى. شاراعا وبلىس اكىمدىگىنىڭ وكىلدەرى مەن وزگە دە سالالاردان قوناقتار قاتىستى. تاۋەلسىز قازاقستاننىڭ برەندىنە اينالعان «التىن ادام» ەسكەرتكىشى وزگە قالالاردا دا كەڭ كولەمدە تانىستىرىلماق. كورمەنى تاماشالاۋ تەگىن جۇرگىزىلەدى.
بۇدان ءارى كورمە اقتوبە قالاسىندا جالعاسادى.
«ەگەمەن-اقپارات»