كىنالىلەر جۇمىسىنان بوساتىلدى

قاراعاندى وبلىسىنىڭ اكىمى نۇرمۇحامبەت ابدىبەكوۆ كۇيدىرگى («ءسىبىر جاراسى») اۋرۋى شىقتى دەگەن شەت اۋدانىنداعى ەركىندىك اۋىلىنا ارنايى بارىپ, جەرگىلىكتى حالىقپەن كەزدەسۋ وتكىزدى. جيىن بارىسىندا ۆەتەريناريا قىزمەتى مەن ينسپەكتسياسىنىڭ, تۇتىنۋشىلار قۇ­قىعىن قورعاۋ دەپارتامەنتىنىڭ وكىلدەرى, جەرگىلىكتى پوليتسيا قىزمەتكەرلەرى توتەنشە وقيعا بولعان جەردەگى اتقارىلىپ جاتقان جۇمىستار جونىندە باياندادى. سونداي-اق, كەزدەسۋ بارىسىندا تۇرعىنداردىڭ كوپتەگەن سۇراقتارىنا جاۋاپ بەرىلدى. جيىننان كەيىن وبلىس باسشىسى جۇقپالى اۋرۋدان قايتىس بولعان مارقۇمداردىڭ وتباسىنا بارىپ, تۋعان-تۋىستارىنا كوڭىل ايتتى. وسىنىڭ الدىندا حابارلاعانىمىز­داي, كۇيدىرگى اۋرۋى شىقتى دەگەن كۇدىكپەن شەت اۋدانىنىڭ ەركىندىك اۋىلىندا ءتو­تەنشە جاعداي ءتارتىبى جاريالانىپ, 15 كۇن مەرزىمگە كارانتين ەنگىزىلگەن بولاتىن. قازىرگى تاڭدا اۋىل تۇرعىنىنىڭ دەرتتى مالدى سويىپ, ەتىن تۋىستارىنا تاراتىپ, كورشىلەرىنە ساتقانى انىقتالدى. وسى توتەنشە وقيعا بويىنشا قر قىلمىستىق كودەكسىنىڭ 327-بابى, 1-تارماقشاسى (ەپي­زووتتىق نەمەسە باسقا دا اۋىر زارداپتاردى تاراتۋعا اكەپ سوقتىرعان ۆەتەريناريا ەرەجەسىن بۇزۋ) بويىنشا قىلمىستىق ءىس قوزعالىپ, سوتقا دەيىنگى تەرگەۋ امالدارى جۇرگىزىلىپ جاتىر. قاراعاندى وبلىستىق دەنساۋلىق ساقتاۋ باسقارماسىنىڭ مالىمەتى بويىنشا, 19-21 ماۋسىم ارالىعىندا وبلىستىق جۇقپالى اۋرۋلار اۋرۋحاناسىنا كۇيدىرگى دياگنوزى كۇدىگىمەن 8 ادام جەتكىزىلگەن بولاتىن. ولاردىڭ ەكەۋى – 49 جاستاعى ەر ادام مەن 33 جاسار ايەل كوپ ۇزاماي كوز جۇمدى. بۇلاردىڭ ءبارى دە ەركىندىك اۋىلىنىڭ تۇرعىندارى. بۇدان بۇرىن وبلىس اكىمى جۇقپالى اۋرۋلاردىڭ وشاعىن جويۋ جانە  ولاردىڭ الدىن الۋ بويىنشا قۇرىلعان شتابتىڭ كەزەكتى وتىرىسىن وتكىزىپ, بىرقاتار لاۋازىمدى تۇلعالاردى تارتىپتىك جاۋاپكەرشىلىككە تارتقان بولاتىن. اتاپ ايتقاندا, سالا بو­يىنشا باقىلاۋدى السىرەتىپ العان ءوزىنىڭ ەكى ورىنباسارىنا, وبلىستىق دەنساۋلىق ساقتاۋ باسقارماسىنىڭ باسشىسىنا سوگىس جاريالادى. ال قاراعاندى وبلىستىق ۆەتەريناريا باسقارماسىنىڭ باسشىسى قىزمەتىنەن بوساتىلدى. سونداي-اق, اۋىل شارۋاشىلىعى مەن ۆەتەريناريا ماسەلەلەرىن قاداعالايتىن شەت اۋدانى اكىمىنىڭ ورىنباسارى, اۋداندىق ۆەتەريناريا ءبولىمىنىڭ باسشىسى, «شەت اۋدانىنىڭ ۆەتەرينارلىق ستانساسى» كمك ديرەكتورى, شەت اۋدانىنداعى وسپەن اۋىل­دىق وكرۋگىنىڭ ۆەتەرينار دارىگەرى قىزمەتىنەن بوساتىلعان بولاتىن. قايرات ءابىلدينوۆ, «ەگەمەن قازاقستان» قاراعاندى وبلىسى