بەيجىڭ كۇن ساناپ شوگىپ بارادى
حالىقارالىق عالىمدار توبى قىتاي استاناسى – بەيجىڭ قالاسىنىڭ بىرتە-بىرتە شوگىپ بارا جاتقانىن بايقاعان. بۇعان جەراستى سۋلارىن مولشەردەن تىس سورىپ الىپ, ءتۇرلى قاجەتتىلىكتەر ءۇشىن پايدالانۋ سەبەپ بولىپ وتىر ەكەن. وسىنىڭ سالدارىنان قىتاي استاناسى جەرگە جىلىنا 11 سانتيمەتر باتىپ بارا جاتسا كەرەك. بۇل تۋرالى ماقالا Remote Sensing جۋرنالىندا جاريالانىپتى.
شوگۋ, اسىرەسە, اسپانمەن تالاسقان بيىك ۇيلەر كوپ سالىنعان چاويان اۋدانىندا قاتتى بايقالۋدا ەكەن. بۇل جايت بيىك عيماراتتارمەن قاتار, كولىك تۋننەلدەرى ءۇشىن دە ۇلكەن قاتەر ءتوندىرىپ وتىرعان كورىنەدى. جالپى, بەيجىڭ – جازىق جەردە ورنالاسقان قالا. سوندىقتان ونىڭ استىنا سۋلار مىڭداعان جىلدار بويى مولىنان جينالعان. شاھار مەن ونىڭ ماڭايىنداعى سۋ سوراتىن سان جۇزدەگەن سكۆاجينادان الىنعان سۋلار وسىلايشا قالانى شوكتىرىپ بارا جاتقانعا ۇقسايدى.
ۇشتەن ءبىرى ەو-دان شىعۋدى قولدايدى
گەرمانيانىڭ ءاربىر ءۇشىنشى دەرلىك تۇرعىنى, ياعني 29 پايىزى ەلدىڭ ەۋروپالىق وداققا مۇشەلىگىنە قاتىستى رەفەرەندۋم وتكىزۋ تۋرالى يدەياعا قولداۋ بىلدىرگەن. ساۋالداما 26 ماۋسىم, جەكسەنبى كۇنى ۇيىمداستىرىلىپتى. بۇل مالىمەت Bild am Sonntag گازەتىندە جاريالانعان.
ايتا كەتەرلىگى, سۇرالعانداردىڭ 63 پايىزى مۇنداي ۇسىنىستان ءۇزىلدى-كەسىلدى باس تارتقان. وسىنشاما پايىزى ۇلىبريتانيادا وتكەن رەفەرەندۋمنىڭ قورىتىندىسىنا بايلانىستى وزدەرىنىڭ وكىنەتىندەرىن بىلدىرگەن. 67 پايىزى بىرىككەن كورولدىكتەگى رەفەرەندۋمنىڭ قورىتىندىسى ەۋرووداقتى تۇبىرىنەن رەفورمالاۋ قاجەتتىگىن كورسەتىپ بەرگەنىن كولدەنەڭ تارتقان. تەك 11 پايىزى عانا بريتانيالىقتاردىڭ شەشىمىن وڭ باعالاعان. ال بۇگىندە فينليانديادا ەلدىڭ ەو-دان شىعۋى تۋرالى رەفەرەندۋم وتكىزۋدى تالاپ ەتكەن پەتيتسياعا قول جينالا باستاعانىن دا ايتا كەتكەننىڭ ارتىقتىعى جوق.
ناتو ءۇشىن ەڭ قاتەرلى ەل – رەسەي
ناتو-نىڭ ەۋروپاداعى بىرلەسكەن قارۋلى كۇشتەرىنىڭ بۇرىنعى باس قولباسشىسى, امەريكالىق گەنەرال فيليپ بريدلاۆ رەسەيدى اقش پەن ونىڭ وداقتاستارى جانە بۇكىل الەمدىك ءتارتىپ ءۇشىن ناعىز قاتەرلى ەل سانايتىنىن مالىمدەدى. ول ءوزىنىڭ بۇل مالىمدەمەسىن Foreign Affairs جۋرنالىنا بەرگەن سۇحباتىندا جاسادى.
گەنەرالدىڭ اتاپ وتكەنىندەي, قولدارىنداعى تاماشا قارۋ-جاراق پەن باسقا دا قۇرال-جابدىقتارعا قاراماستان, اقش پەن ونىڭ ەۋروپاداعى وداقتاستارى قازىرگى زامان سىن-قاتەرلەرىنە مۇلدەم دايىن ەمەس. تاياۋ شىعىس پەن سولتۇستىك افريكاداعى تۇراقسىزدىق جاعدايلارىندا بۇل وتە ۇلكەن ولقىلىق بولىپ تابىلادى. ونىڭ ۇستىنە, رەسەي تاراپىنان اسكەري قاتەر كۇن ساناپ ارتا ءتۇسىپ كەلەدى.
قىسقا قايىرعاندا:
اقش-تىڭ باتىس ۆيردجينيا شتاتى سوڭعى 100 جىلداعى ەڭ اۋقىمدى سۋ تاسقىنىن باستان كەشىپ جاتىر. 22 ماۋسىم كۇنى باستالعان تاسقىننان بۇگىنگە دەيىن 24 ادام كوز جۇمىپتى. جۇزدەگەن ادام قۇتقارىلعان, الايدا, كوپ ادام جوعالىپ كەتكەندەر قاتارىندا.
قىتايدىڭ حۋنان پروۆينتسياسىنىڭ يچجان ۋەزىندەگى اۆتوتراسسادا تۋريستىك اۆتوبۋس ورتەندى. 26 ماۋسىم كۇنى ورىن العان وقيعا سالدارىنان اۆتوبۋستاعى 56 ادامنىڭ 35-ءى وپات بولعان. جۇرگىزۋشى ءتىرى قالىپتى, بىراق ول كۇدىكتى رەتىندە قاماۋعا الىنعان.
رەسەي استاناسى – ماسكەۋ قالاسىندا سپورت سومكەسىنە 31 ميلليون رۋبل سالىپ الىپ جۇرگەن ەر ادام تونالعان. بەلگىسىز بىرەۋلەر اسپانعا تاپانشادان وق اتىپ اقشا يەسىن قورقىتقاننان كەيىن, سومكەنى «جيگۋلي» جەڭىل كولىگىنە سالىپ تايىپ تۇرعان. قاراقشىلىق شابۋىل فاكتىسى بويىنشا قىلمىستىق ءىس قوزعالىپتى.
ءۇندىستاندا وزات وقۋشى قىز ءوزى ماماندانعان ءپاننىڭ اتاۋىن دۇرىس جازا الماعاننان كەيىن قاتاڭ جازا قولدانىلىپ, قاماپ تاستالىپتى. بۇل تۋرالى The Guardian حابارلادى. وقيعا بيحار شتاتىندا ورىن العان. 17 جاسار مەكتەپ ءبىتىرۋشىنىڭ اتى-ءجونى رۋبي روي كورىنەدى. اتالعان وقيعاعا بايلانىستى ەلدە ۇلكەن جانجال بولىپ, ەندى وقۋشى قىز ەكىنشى قايتارا ەمتيحان تاپسىرۋعا جىبەرىلەدى.
ءۇش ەل قول قويعان ماڭىزدى كەلىسىم
رەسەي, قىتاي جانە موڭعوليا شىۇ-نىڭ كەزەكتى سامميتىندە ەكونوميكالىق ءدالىز قۇرۋ جونىندەگى كەلىسىمگە قول قويدى. بۇل ەكونوميكالىق ءدالىز ماسكەۋدىڭ بەيجىڭمەن جانە ۇلان-باتورمەن بايلانىس, كولىك ينفراقۇرىلىمىن دامىتۋعا ىقپال ەتۋ سالاسىنداعى ىنتىماقتاستىقتى نىعايتۋ ءۇشىن قۇرىلىپ وتىر.
سونداي-اق, بۇل جوبا جۇزەگە اسقان جاعدايدا ەلدەر اراسىنداعى ينۆەستيتسيا مەن ساۋدا-ساتتىق ارتىپ, مادەني بايلانىستار جاقسارا تۇسەدى . بۇل كەلىسىمنىڭ ارقاسىندا ءۇش مەملەكەتتە دە كولىك ينفراقۇرىلىمى ارتىپ, وندىرىستىك قۋات جوعارىلايدى دەپ كۇتىلۋدە. ءتيىستى قۇجاتقا تاشكەنتتە قحر, رەسەي جانە موڭعوليا باسشىلارى سي تسزينپين, ۆلاديمير پۋتين جانە تساحياگين ەلبەگدورج قول قويعان بولاتىن. اتالعان جاڭالىقتى The South China Morning Post اگەنتتىگى حابارلادى.
ازيا ايماعىنا دا اۋىز سالا باستادى
«يسلام مەملەكەتى» (قازاقستاندا تىيىم سالىنعان) ءوزىنىڭ وڭتۇستىك-شىعىس ازيا ەلدەرىندەگى ستراتەگياسىن جاريا ەتتى. بۇل تۋرالى The South China Morning Post اگەنتتىگى حابارلادى. سودىرلار جەلىدە وسى پيعىلدارىن بىلدىرەتىن بەينەروليك تاراتقان.
بەينەروليكتە سودىرلار وزدەرىنىڭ وڭىردەگى جاقتاستارىن سيريا مەن يراكقا بارماي وزدەرىنىڭ ەلدەرىندە قالىپ, توپ قۇرۋعا شاقىرعان. ولاردىڭ حابارلاۋلارىنا قاراعاندا, وڭىردە قۇرىلاتىن سودىرلار جاساعىنا ابۋ ابدۋللا باسشىلىق جاسايتىن بولادى. ول «يسلام مەملەكەتىنە» انت بەرىپ ۇلگەرگەن ءفيليپپيننىڭ «ابۋ ساياف» ب ۇلىكشىلەر توبىنىڭ سەركەسى ەكەن. مالايزيانىڭ تەرروريزمگە قارسى كۇرەس جونىندەگى ۆەدومستۆوسىنىڭ باسشىسى ايۋب حان مۋدين پيتچايدىڭ پىكىرىنشە, بۇل جايت ءوڭىر ءۇشىن ۇلكەن قاتەر بولىپ تابىلادى.
تابيعات الدىندا ادام قاۋقارسىز
قىتايدىڭ شىعىسىنداعى تسزيانسۋ پروۆينتسياسىندا ورىن العان داۋىل مەن تورنادو سالدارىنان قازا تاپقاندار سانى 98 ادامعا جەتتى. شامامەن 800 ادام ءتۇرلى دەڭگەيدە دەنە جاراقاتتارىن العان. مۇنى پروۆينتسيا گۋبەرناتورىنىڭ دەرەكتەرىنە سىلتەمە جاساي وتىرىپ, China News Service باسىلىمى حابارلادى.
ازاماتتىق اكىمشىلىك مينيسترلىگى, ءوز كەزەگىندە, 200-دەي جارالىلاردىڭ جاعدايى مۇشكىل ەكەنىن كولدەنەڭ تارتقان. قحر توراعاسى سي تسزينپين مەن ەل پرەمەر-ءمينيسترى لي كەتسيان ءوڭىر باسشىلىعىنا جارالىلاردى قۇتقارىپ, تابيعات اپاتىنىڭ سالدارىن بارىنشا ازايتۋ ءۇشىن قولدان كەلگەننىڭ ءبارىن جاساۋدى تاپسىردى. اۋەلدە 51 ادامنىڭ وپات بولعانى تۋرالى حابارلانعان ەدى. ال تابيعات اپاتىنان بارىنشا زارداپ شەككەن ەلدى مەكەن يانچەن قالاسى سانالىپ وتىر. اپات ايماعىنان 20 مىڭداي ادام كوشىرىلگەن.
ينتەرنەت ماتەريالدارى نەگىزىندە ازىرلەندى