استانا. 1 ماۋسىم. تۇركيانىڭ ادانا قالاسىنىڭ تۇرعىنى مەحمەد دجۋنەيت جىلاي بەرگەنى ءۇشىن ءوزىنىڭ 4 جاسار قىزىن ۇرپ-سوعىپ, سوڭىنان كوشەدەن ءوتىپ بارا جاتقان قوقىس جينايتىن كولىكتىڭ قورابىنا اتىپ جىبەرگەن. بۇل تۋرالى تۇرىكتىڭ Sozcu گازەتىنىڭ دەرەگىنە سىلتەمە جاساعان egemen.kz ءتىلشىسى حابارلادى.
باسىلىم اتاپ وتكەندەي, مەحمەد دجۋنەيتتى قىزىنىڭ اناسى جۇمىسىنا كەتكەن بويدا جىلاي باستاعانى قاتتى جىنداندىرعان. ول الدىمەن جىلاعان بالانى ۇرىپ توقتاتپاق بولادى. بىراق كىشكەنتاي قىز سودان كەيىن دە باسىلمايدى. سول كەزدە ەر كىسى ونى كوتەرىپ الادى دا, ءۇيدىڭ جانىنان اقىرىن جىلجىپ ءوتىپ بارا جاتقان قوقىس جيناۋشى ماشينانىڭ قورابىنا لاقتىرا سالادى.
قۇداي ساقتاعاندا, كولىكتىڭ جۇرگىزۋشىسى ءتيىستى جەرىنە جەتىپ, قوراپتاعى قوقىستاردى اۆتوماتتى تەتىكتىڭ كومەگىمەن اۋدارىپ تاستاماق بولىپ جاتقانىندا, اينادان قىزدى كورىپ قالادى. سوڭعى ساتتە تەتىكتى توقتاتىپ ۇلگەرگەن ول, سونىمەن بىرگە قۇيتاقانداي قىزدى دا اسىعىپ كەلگەن اجالدىڭ ارانىنان ساقتاپ قالادى.
كوممۋنالدىق مەكەمەنىڭ جۇمىسشىسى كىشكەنتاي قىزدى ءوزىنىڭ ايتۋىمەن ۇيىنە جەتكىزەدى. ال بالانىڭ اناسى وسى وقيعاعا بايلانىستى پوليتسياعا كۇيەۋىنىڭ ۇستىنەن ارىز تۇسىرەدى. «حايۋاندار دا بالالارىنا مۇنى جاسامايدى», دەيدى ول شاعىم بەرۋ كەزىندە. وسىدان كەيىن ءتارتىپ ساقشىلارى كۇيىك-اكەنى قاماۋعا الادى.
تالعات رايىمبەك.
دەرەك, فوتو: Sozcu.