وسى جىلدىڭ 28-30 ءساۋىرى كۇندەرى «قازاقستان» ۇلتتىق تەلەارناسىنىڭ تىكەلەي ەفيرىنەن كورسەتىلگەن «شىن جۇرەكتەن» رەسپۋبليكالىق قايىرىمدىلىق تەلەمارافونى بارشاڭىزدىڭ ەستەرىڭىزدە بولار. اتالعان شارانى «قازاقستان» رترك» اق جانە قازاقستان حالقى اسسامبلەياسى بىرلەسىپ ۇيىمداستىرعان بولاتىن. ءۇش كۇن ىشىندە قايىرىمدىلىق تەلەمارافونى اياسىندا رەسپۋبليكا بويىنشا جينالعان 30 ميلليون تەڭگە «قازاقستان حالقى اسسامبلەياسى قورى» قوعامدىق قورىنىڭ ەسەپشوتىنا اۋدارىلدى. سونىمەن قاتار, مۇقتاج جاندارعا 15 ميلليون قاراجات كولەمىندە ءتۇرلى قىزمەتتەر مەن زاتتاي كومەك كورسەتىلدى.
كەشە وسىعان وراي, ءباسپاسوز ءماسليحاتى بولىپ ءوتتى. شاراعا «قازاقستان» رترك-نىڭ» باسقارما ءتورايىمى نۇرجان مۇحامەدجانوۆا, قازاقستان حالقى اسسامبلەياسى حاتشىلىعىنىڭ سەكتور مەڭگەرۋشىسى ءنازيپا شاناي قاتىستى. ن.مۇحامەدجانوۆا: «قايىرىمدىلىق شاراسى اياسىندا كوپتەگەن بالاعا شۇعىل تۇردە كومەك كورسەتىلدى. ولاردىڭ ءبىرازى قارجىلاي, جەر تەلىمدەرى, ءتۇرلى ماتەريالدىق كومەك ەسەبىندە بەرىلدى. ماسەلەن, ەفير كەزىندە زەرەندى اۋدانىنان حابارلاسقان ءىى توپتاعى مۇگەدەك كوپبالالى انا, اسەمگۇل جارمانوۆاعا توڭازىتقىش جىبەرىلدى. وسكەمەننەن تىكەلەي ەفيرگە حابارلاسىپ, مۇگەدەك نەمەرەسىنە قولاربا قاجەتتىگىن ايتقان زەينەتكەر عاليا كامەشوۆانىڭ ءوتىنىشى ەسكەرىلدى. قىزىلوردالىق داريعا كوشەرباەۆا دا ءوزىنىڭ 7 جاسار مۇگەدەك بالاسىنىڭ قولارباسىز ەكەنىن ايتىپ, رەداكتسيامىزعا حابارلاستى. ناتيجەسىندە, كوپ ۇزاماي, قولاربالار پويىزبەن جىبەرىلدى.
ال الماتى فيليالى ستۋدياسىنا ارباعا تاڭىلعان 16 جاسار ەلەمەس كەلگەن ەدى. اتا-اناسى دا جارىمجان كىسىلەر بولاتىن. ءۇيسىز, جۇمىسسىز. مۇگەدەكتىگىنە الاتىن جاردەماقىسىمەن ءبىر ءۇيلى جان كۇن كورىپ وتىرعان. بۇل وتباسىنا ءانشى ءاليا ابىكەن قارجىلاي كومەكتەسىپ ەدى. ولار ءانشى ۇسىنعان قاراجاتتىڭ 150 000 تەڭگەسىنە جەر تەلىمىن ساتىپ الىپ, قالعان بولىگىنە ءۇيدىڭ ىرگەسىن قالادى. كوپ ۇزاماي بۇل جاڭالىقتى ەستىپ قۋانعان ءاليا ءۇي قۇرىلىسىن تولىق اياقتاۋعا قارجىلاي كومەكتەسەتىندىگىن ايتىپ, وسى وتباسىنىڭ الەۋمەتتىك جاعدايىنا قارايلاساتىندىعىمەن ءبولىستى», – دەدى.
قازىرگى تاڭدا كومەككە ءزارۋ وتباسىلاردىڭ وتىنىشتەرىن قاراستىرۋمەن اينالىساتىن ارنايى قوعامدىق كەڭەس قۇرىلدى. بۇل قايىرىمدىلىق تەلەمارافونى ءالى دە جالعاسا بەرمەك. سونداي-اق, جيىن سوڭىندا اتالعان تەلەارنا باسشىسى وزدەرىنىڭ الداعى ۋاقىتتا وتكىزەتىن قىزىقتى دا يگىلىككە تولى تىڭ جوسپارلارىمەن ءبولىستى.
راۋشان سۇلەيمەنوۆا