مۇسىندەر مۇلگىمەيدى

يتاليالىق سۋرەتشى ماريو پاۆەزيدىڭ ۇلتتىق مۋزەيدەگى «باسقا كوكجيەكتەر» اتتى جەكە كورمەسىنەن شەبەردىڭ ەڭ تاڭداۋلى تۋىندىلارىن تاماشالۋعا بولادى. ايتا كەتەتىن جايت, كورمەنى ۇيىمداستىرۋعا مادەنيەت جانە سپورت مينيسترلىگى مەن يتاليانىڭ قازاقستانداعى ەلشىلىگى مۇرىندىق بولىپ وتىر. شارانىڭ اشىلۋ سالتاناتىندا ۇلتتىق مۋزەيدىڭ ديرەكتورى دارحان مىڭباي شەبەردىڭ كوپ­قىرلى تالانت يەسى ەكەندىگىن ايرىقشا اتاپ ءوتتى. «بۇل كورمە قازاقستانداعى يتا­ليا كۇندەرىنىڭ اياسىندا وتۋدە. اسقان تالانت يەسىنىڭ ەڭبەكتەرى ادامنىڭ ىشكى جان دۇنيەسىن اشىپ كورسەتۋگە قۇرىلعان دەۋگە بولادى. اۆتوردىڭ ءاربىر ەڭبەگىندە وزىنە ءتان قولتاڭباسى ايقىن سەزىلىپ تۇرادى», – دەدى مۋزەي باسشىسى. ماريو پاۆەزيدىڭ ءومىربايانى تۋرالى بەرىلگەن قىسقاشا مالىمەتتە: «1945 جىلعى 5 تامىزدا رەد­جو ەمي­ليا پروۆينتسياسىنداعى گۆاس­تاللا قالاسىندا دۇنيەگە كەلگەن ماريو اتاقتى ءمۇسىنشى ۋمبەر­تو ءماستروياننيدىڭ اقىلىمەن بو­لونە­­دەگى كوركەمونەر اكادە­مياسىنا ءتۇسىپ, ءمۇسىن جاساۋدى جاقسى مەڭگەرەدى. ماريو جاستايىنان كوپتەگەن پىشىندەرگە اينالۋعا يكەمدى, اقپا جانە سەر­پىندى ماتەريالدى وڭدەپ, جانداندىرۋىمەن ەرەكشەلەنەدى. پاۆەزي قىرىق جىلدىق شىعار­ماشىلىق قىزمەتىندە, ۇنەمى سۋرەت نارىعى مەن ءساننىڭ زاماناۋي تالابىنا قاراماستان, ءار­دايىم ءوز ماقساتى مەن ۇنەمى شىعارماشىلىق دارا­لىعىن ىزدەۋى ناتيجەسىندە ءمۇسىننىڭ جانە كوركەم سۋرەتتىڭ كوپتەگەن تۇرلەرى مەن جانرلارىن بايقاپ كورەدى. ونىڭ تۋىندىلارى سۇلۋلىقپەن تىعىز بايلانىسقا نەگىزدەلگەن, ءاردايىم تۇراقتى جانە ناقتى زاتتاردىڭ شىنايى ءمانىن كورسەتەتىن سۋبسترات سياقتى» دەلىنگەن. سونىمەن قاتار, ءبىز كورمەدەگى تۋىندىلار ارقىلى شەبەردىڭ جانردى جان-جاقتى مەڭگەرگەن امبەباپ مامان ەكەندىگىنە كوزىمىز جەتۋدە. بىرقاتار مۇسىندەرى («قاي­تا ءور­كەندەۋ», «قۇدايلاردىڭ قۇ­لاۋى», «شابىت», «اسەمدىك») حح عاسىردىڭ كوپقىرلى رەڭكتەرىمەن جانە تەحنيكالىق ناقتى ادىستەرمەن تولىقتىرىلعان كلاسسيكالىق ۇلگى­سىمەن اسەرلەندىرەدى. اسىرەسە, «تەپە-تەڭدىك», «بۇقا», «ءتۇڭىلۋ» تۋىندىلارى وتە جوعارى تالعاممەن ورىندالۋىمەن قىزىقتىرادى. بوياۋعا جۇرەك ءلۇپىلىن قوسىپ ورەتىن شىعارماشىلىق يەسىنىڭ ءاربىر تۋىندىسى ۋاقىت تىنىسىن, جاراتىلىس قۇدىرەتىن, ەستە قالار ەرەكشە ساتتەگى مىنەز-ق ۇلىق پەن ىشكى سىردى ايقىن دا ايشىقتى بەرە الۋىمەن تامسانتادى. ايرىقشا مەزەتتى سۋرەتتەيتىن بۇلاردىڭ بارىنە ورتاق قاسيەت – قىزۋقاندىلىقتى, بۇعاۋلانباس اساۋلىقتى, سەزىمگە تولى كۇيدى جىرلايدى. سونىڭ ءبارى تاستىڭ, مەتالدىڭ تابيعاتىن بارىنشا زەرتتەپ, زەردەلەپ ەرەكشە سەزىممەن جۇمىس ىستەيتىن شەبەردىڭ جان الەمىنىڭ ايناسى تارىزدەنەدى. ءبىر تۋىندىعا كوپ ماعىنا سىيعىزا ءبىلۋ دەگەن ءسوز وسىندايدا ايتىلسا كەرەك. مۇسىندەردىڭ مۇلگىمەيتىنى راس ەكەن. قارشىعا كۇلەن سۋرەتتەردە: ماريو پاۆەزي تۋىندىلارى