«ابادان» دەگەن كلۋب بار

تۋعان اۋىلىنان جان جىلۋىن اياماعان ازاماتتان قالايشا اينالىپ كەتپەيسىڭ؟! تاريحقا اتاۋى التىن ارىپتەرمەن جازىلعان «قوياندى جارمەڭكەسى» ورىن تەپكەن اۋىلدىڭ وعلانى نۇرلان قالتاەۆ – ءدال سونداي ازاماتتىڭ ءوزى. مىنە, بىرنەشە جىلدىڭ ءجۇزى بول­دى, بۇل جىگىت ءوزىنىڭ كىندىك قامى تامعان قوياندى اۋىلىنا قولىنان كەلگەن كومەكتىڭ ءبارىن جاساپ كەلەدى. قارقارالى اۋدانىندا ورنالاسقان اياداي اۋىلىنا اللانىڭ ءۇيى – مەشىت سالىپ, جاماعاتتىڭ العىسىن الدى. ميني-فۋتبول الاڭقايىن سىيعا تارتىپ, تۋعان توپىراققا سالاماتتى ءومىر سالتىنىڭ ءدانىن سەپتى. بىلتىر, قازاق حاندىعىنىڭ 550 جىلدىق تويىنا ورايلاستىرىپ, قوياندىعا 130 ءتۇپ الما اعاشىن وتىرعىزىپ, باۋ-باقشانىڭ قاق ورتاسىنان سۋبۇرقاق ورناتتى. ەندىگى ويى وتباسىلىق بالالار ءۇيىن سالىپ, جەتىمدەردى سول جەرگە جيىپ جارىلقاماق. – جىل سايىن «اۋىل كۇنىن» وتكىزۋدى داستۇرگە اينالدىردىق. قازاقتىڭ اتىن بۇكىل الەمگە تانىتقان قوياندى بۇدان دا زور قۇرمەتكە لايىق دەپ ويلايمىن, – دەيدى نۇرلاننىڭ ءوزى. وسى شارۋانىڭ ءبارىن قارا­عاندىدا وتىرىپ-اق تىندىرىپ ءجۇر. «مال – باققانعا بىتەدى» دە­مەكشى, ەڭبەك ەتىپ, ارەكەت جاساعان ادامنان قۇت-بەرەكە قاشقان با؟! نۇرلاننىڭ دا قۇرىلىس سالاسىندا ديىرمەننىڭ تاسىنداي ءدوڭ­گەلەتىپ وتىرعان ازىن-اۋلاق كاسىبى بار. اسىپ-تاسىپ كەتپەسە دە, ءوزى­نە قا­راعان ەلگە قارايلاسار قاۋ­قارى­نىڭ بارى راس. بۇگىنگى كۇندە كاسىپكەردىڭ وبلىس ورتالىعىندا «باراكيات» دەگەن حالال مەيرامحاناسى جۇمىس ىستەپ تۇر. بەس ۋاقىت نامازىن قازا قىلمايتىن ونىڭ اينالاسى يمامعا ۇيىعان, يمانعا باس يگەن ازاماتتار... جاقىندا ول «Abadan» دەپ اتالعان كاسىپقوي جەكپە-جەك كلۋبىن قۇرىپ, سوعان وراي دوس-جاران مەن سپورت جاناشىرلارىن جيىپ, ۇيىمنىڭ تۇساۋكەسەرىن وتكىزدى. ەمىن-ەركىن اڭگىمە نەگىزىندە وتكەن بۇل شارادا نۇرلان ايتمۇ­حام­بەت ۇلى كلۋبتىڭ ماقسات-مۇددەسىن ءمالىم ەتتى. «قازاق قاسقىر اۋەگىنىڭ كوسەمىن «ابادان» دەيدى ەكەن. كوك­جال سەكىلدى توپتىڭ الدىندا بولايىق دەپ وسى اتاۋدى تاڭدا­دىق», – دەپ كلۋبتىڭ نەگە بۇلاي اتالعانىن دا تۇسىندىرە كەتۋدى ۇمىتپادى. ەندى ءبىر از عانا ۋاقىتتان كەيىن نۇرلان قالتاەۆ قاراعاندىلىق جەكپە-جەك شەبەرلەرىنە تاماشا تارتۋ جاساماقشى. ول – «Abadan» جەكپە-جەك كلۋبىنىڭ جاتتىعۋ زالى. جوبا بويىنشا, بۇل جاڭا عي­ماراتتىڭ ءىشى جەكپە-جەك سپور­تىنىڭ زاماناۋي تالاپتارعا ساي كەرەك-جاراقتارىمەن تولىقتاي جابدىقتالادى. زالدىڭ ءتورىن سەگىز بۇرىشتى UFC جەكپە-جەگى وتەتىن الاڭقاي الماق. قازىرگى تاڭدا نەگىزگى قارا جۇمىستار ءبىتىپ, ىشكى ارلەۋ سىندى جەڭىل-جەلپى شارۋالار قالعان. قايرات ءابىلدينوۆ, «ەگەمەن قازاقستان» قاراعاندى