مانيفەستىڭ ءمانى ايشىقتالا ءتۇستى

قازاقستان پرەزيدەنتىنىڭ «الەم. XXI عاسىر» مانيفەسىن الەم پارلامەنتشىلەرىنىڭ حالىقتىڭ قونىستانۋى مەن دامۋى جونىندەگى اۋقىمدى كونفەرەنتسياسىنا قاتىسۋشىلار قولدايدى. پارلامەنت ءماجىلىسى توراعاسىنىڭ ورىنباسارى گۇلميرا يسىمباەۆا مەن پالاتانىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى قۇرالاي قاراكەن حالىقتىڭ قونىستانۋى جانە دامۋىنا باعىتتالعان اۋقىمدى كونفەرەنتسيا جۇمىسىنا قاتىستى. يسە-سيمادا (جاپونيا) وتەتىن ۇلكەن جەتىلىك – 2016 ءسامميتىنىڭ قۇرمەتىنە ارنالعان ماڭىزدى فورۋم 26-27 ءساۋىر كۇندەرى توكيودا ءوتتى, دەپ حابارلادى ءماجىلىستىڭ ءباسپاسوز قىزمەتى. پلەنارلىق وتىرىستا «تۇراقتى دامۋ ماقساتتارى داۋىرىندەگى اۋقىمدى ىنتىماقتاستىقتا پارلامەنت وكىلدەرى مەن پارلامەنتتىك جەلىلەردىڭ ءرولى» تاقىرىبىندا ءسوز العان قازاقستاندىق دەلەگاتسيا باسشىسى گ.يسىمباەۆا شارا­عا قاتىسۋشىلاردى قازاق­ستان پرەزيدەنتىنىڭ «الەم. ءححى عاسىر» مانيفەسىنىڭ, «100 ناقتى قادام» ۇلت جوسپارىنىڭ باسىمدىقتارىمەن, سونىمەن قاتار, ءبىزدىڭ ەلىمىزدىڭ يادرولىق قارۋسىزدانۋ جانە تاراتپاۋ ىسىنە قوسىپ جاتقان ۇلەسىمەن تانىس­تىردى. مانيفەستىڭ ءماتىنى كونفە­رەن­تسياعا قاتىسۋشىلارعا اعىل­شىن جانە جاپون تىلدەرىندە تارا­تىپ بەرىلدى. حالىقتىڭ قونىس­تانۋى مەن دامۋى جونىندەگى پار­لامەنتشىلەردىڭ ازيا فورۋمى باسشىلىعىنا, جاپونيا پارلامەنتى وكىلدەر پالاتاسىنىڭ سپيكەرى ت. وشيماعا تابىس ەتىلدى. مانيفەست قاعيدالارى فورۋمعا قاتىسۋشىلاردىڭ قىزۋ قولداۋىنا يە بولدى. ماسەلەن, جاڭا زەلان­ديادان كەلگەن پارلامەنت دەپۋتاتى ترەيسي مارتين مانيفەستە ايتىلعانداردىڭ قات­تى تاڭعالدىرعانىن جانە قازاق­س­تان پرەزيدەنتىنىڭ بەيبىت ومىرگە ۇندەۋىن بۇدان دا ۇلكەن حالىق­ارالىق اۋديتورياعا جەتكىزۋگە دا­يىن ەكەندىكتەرىن ءبىلدىردى. جۇمىس ساپارى بارىسىندا ءماجىلىس توراعاسىنىڭ ورىنباسارى بىرقاتار ەكىجاقتى كەزدەسۋلەر وتكىزدى. جاپونيا پارلامەنتى وكىلدەر پالاتاسىنىڭ سپيكەرى ت.وشيمامەن, حقدپاف توراعاسى ك.تاكەميمەن, قازاقستانمەن دوس­تىقتى نىعايتۋ جونىندەگى جاپون­دىق پارلامەنتتىك ليگانىڭ جە­تەك­شىسى ت. كاۆامۋرمەن ءجۇز­دە­سىپ, پار­لامەنتارالىق ىنتى­ماقتاستىقتى تەرەڭدەتۋ ماسەلە­لەرىن تالقىلادى. حقدپاف اتقارۋشى كومي­تەتىنىڭ 80-ءشى جيىنى قارساڭىندا گۇلميرا يسىمباەۆا اتالعان پارلا­مەنتتىك فورۋمنىڭ ۆيتسە-ءتورايىمى قىزمەتىنە بەكىتىلگەن بولاتىن. ايتا كەتەرلىگى, 2016 جىلى يسە-سيمادا (جاپونيا) وتەتىن ۇلكەن جەتىلىكتىڭ 42-ءشى ءسامميتىن اتالعان ۇيىمنىڭ تۇراقتى دامۋ ماقساتتارى قابىلدانعاننان كەيىنگى العاشقى ءسامميتى دەۋگە بولادى. بۇل – قاتىسۋشى-ەلدەر كوشباسشىلارىنىڭ حالىقتىڭ قونىستانۋى ماسەلەلەرىن شەشۋ ءۇشىن قابىلداناتىن شارالاردىڭ ماڭىزدىلىعىن دامۋ جونىندەگى بارلىق حالىقارالىق كەلىسىمدەردى جۇزەگە اسىرۋدىڭ ءبىر بولىگى رەتىندە كورسەتۋدىڭ ەرەكشە مۇمكىندىگى. سامميت قارساڭىندا الەمنىڭ تۇكپىر-تۇكپىرىنەن پارلامەنت وكىل­دەرى توكيوعا سامميت كوش­باس­شىلارىنىڭ اتىنا حالىقتىڭ قونىستانۋى ماسەلەلەرىنىڭ وزەك­تىلىگى تۋرالى حاباردارلىقتى ارتتىرۋ جونىندە ۇجىمدىق ۇندەۋ دايىنداۋ ءۇشىن جينالدى. اتالعان كونفەرەنتسيانى حا­لىقتىڭ قونىستانۋى مەن دامۋى جونىندەگى جاپونيا پار­لا­مەنتشىلەرى فەدەراتسياسى حقدپاف-پەن بىرلەسىپ ۇيىم­داستىردى.  جوعارى دەڭگەيدەگى شارا­عا 68 ەلدەن 100-دەن استام دەلە­گات قاتىستى.