ماقسات – جەردى ءتيىمدى پايدالانۋ

جەر حالقىمىزدىڭ باستى بايلىعى. سوندىقتان, ونى بارىنشا ءتيىمدى پايدالانۋ قاشاندا كۇن تارتىبىنەن تۇسكەن ەمەس. ۇلتتىق ەكونوميكا مينيسترلىگىنىڭ وبلىس اكىمدىگىمەن بىرلەسە وتىرىپ, «100 ناقتى قادام» ۇلت جوسپارىن جۇزەگە اسىرۋ اياسىندا وتكىزگەن كەڭەسىندە جەر كودەكسىنە جانە باسقا زاڭنامالىق اكتىلەرگە ەنگىزىلگەن وزگەرىستەر كەڭىنەن ءتۇسىندىرىلدى. وبلىستىق باسقارمالار مەن دەپارتامەنتتەر باسشىلارى, اۋدان اكىمدەرىنىڭ ورىنباسارلارى جانە اۋىل اكىمدەرى, اۋىلشارۋاشىلىق تاۋار وندىرۋشىلەرى قاتىسقان القالى جيىندا اۋىل شارۋاشىلىعى ماقساتىنداعى جەرلەردى ءتيىمدى پايدالانۋ, قۇرىلىس سالاسىنداعى جاڭا ەنگىزىلىمدەر, سونداي-اق, سالىق جانە كەدەن زاڭنامالارىنا ەنگىزىلەتىن وزگەرىستەر سىندى وزەكتى ماسەلەلەر تالقىلاندى. كەڭەستى قىسقاشا ءسوز سويلەپ اشقان وبلىس اكىمى بەردىبەك ساپارباەۆ جيىنعا قاتىسۋشىلارعا بۇل ماسەلەگە وتە جاۋاپكەرشىلىكپەن قاراۋ كەرەكتىگىن قاداپ ايتتى. ول وبلىستا 25 ميلليون گەكتار اۋىل شارۋاشىلىعى ماقساتىنداعى جەر بار ەكەنىن, سونىڭ 1 ميلليون گەكتارعا جۋىعى ەگىنشىلىككە جارامدى ەكەنىن تىلگە تيەك ەتە كەلىپ, 112 مىڭ گەكتار جەردىڭ پايدالانىلماي جاتقانىن اتاپ ءوتتى. بيىل اۋكتسيون ارقىلى 184 مىڭ گەكتار جەر ساتىلاتىنىن, وسىنشاما القاپتى ساتۋعا دايىنداۋ قۇجاتتارىن جاساۋعا 58 ميلليون تەڭگە قارجى بولىنگەنىن جەتكىزدى. كەڭەستە ءسوز العان ۇلتتىق ەكونوميكا ۆيتسە-ءمينيسترى قايىر­بەك وسكەنباەۆتىڭ ايتۋىنشا, قازىرگى كۇندە ەلىمىزدەگى اۋىل شارۋاشىلىعى ماقساتىنداعى جەرلەردىڭ 99,5 ميلليون گەكتارى, ياعني 99,7 پايىزى ۇزاق مەرزىمدى جالعا بەرىلگەن, تەك 1,3 پايىزى جەكە مەنشىكتە ەكەن. «100 ناقتى قادام» ۇلت جوسپارىنىڭ 35 جانە 36-قادامدارىن جۇزەگە اسىرۋ اياسىندا اۋىل شارۋاشىلىعى ماقساتىنداعى جەرلەردى جەكە-مەنشىككە بەرۋدىڭ جاڭا تەتىگىن ەنگىزۋ ءۇشىن 2015 جىلعى 2 قاراشادا «جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى, بۇل زاڭ ۇستىمىزدەگى جىلعى 1 ءشىل­دەدەن باستاپ كۇشىنە ەنەدى. كەڭەستە «100 ناقتى قا­دام» ۇلت جوسپارىنىڭ 44 جانە 45-قادامدارىن, سونداي-اق, مەملەكەت باسشىسىنىڭ «قازاقستان جاڭا جاھاندىق ناقتى احۋالدا: ءوسۋ, رەفورمالار, دامۋ» اتتى جولداۋىن, ۇكىمەت پەن ۇلتتىق بانكتىڭ ەكونوميكالىق جانە الەۋمەتتىك تۇراقتىلىقتى قامتاماسىز ەتۋ جونىندەگى 2016-2018 جىلدارعا ارنالعان داع­دارىسقا قارسى ءىس-قيمىل جوسپارىن جۇزەگە اسىرۋ اياسىندا سالىق جۇيەسىن رەفورمالاۋ كوزدەلگەنى اڭگىمە وزەگىنە اينالدى.  ساتىبالدى ءساۋىرباي, «ەگەمەن قازاقستان» اقتوبە وبلىسى