ادامزاتتىڭ ءوز تاريحىندا ومىرگە كەلتىرىپ, داستۇرگە ۇلاستىرعان جاراسىمى جاقسى جاڭالىقتارى قاتارىندا, ءسوز جوق, قازىرگى زامانعى وليمپيادا دا بار. جەر بەتىندە ءتورت جىلدا ءبىر اينالىپ كەلەتىن بۇل جاھاندىق جارىسقا ەلەڭ ەتپەيتىن, ونىڭ دۇبىرىنە قۇلاق تۇرمەيتىن سانالى ازامات كەمدە-كەم. بيىل سول تسيكلدىڭ كەلەسى ەستافەتاسى – XXXI جازعى وليمپيالىق ويىندار برازيليانىڭ ريو-دە-جانەيرو قالاسىندا جالاۋ جەلبىرەتەدى. تامىزدىڭ 5–21-ءى ارالىعىندا سايىس قىزدىرعالى تۇرعان ويىندار سپورتتىڭ 28 ءتۇرى بويىنشا 306 مەدالدار جيىنتىعىن ساراپقا سالادى. ءدۇبىرلى دوداعا 10 500 سپورتشى قاتىسادى دەپ كۇتىلىپ وتىر.
ءسوز باسىندا بىردەن ايتا كەتەتىن جايت, ريوداعى وليمپيالىق ويىندار تەك برازيليا جەرى عانا ەمەس, سونىمەن قاتار, كۇللى لاتىن (وڭتۇستىك) امەريكاسى قۇرلىعىندا العاش رەت كوگەن كەرەتىن وسىنداي الامان بولعالى تۇر. قازىر دۇرمەك دۇركىرى جاقىن ارادان ەستىلە باستاعانداي اسەر قالدىرادى. بۇعان تاياۋدا, دالىرەگى, ءساۋىردىڭ 21-ءى كۇنى گرەكيانىڭ ەجەلگى وليمپ تاۋىنىڭ ەتەگىندەگى گەرا حرامىنداعى اشىق الاڭقايدا ويىندار الاۋىنىڭ سالتاناتتى جاعدايدا تۇتاتىلىپ, ۇزىن كوشكە ۇلاساتىن ەستافەتاسىن باستاپ كەتكەنى تاعى ءبىر سەبەپ بولدى.
ءراسىم بارىسىندا ەرتەدەگى جوعارعى ابىز ايەلدىڭ ءرولىن ويناعان گرەك اكتريساسى كاتەرينا لەحوۋ كۇننەن شىنى ارقىلى الىنعان قىزۋمەن قۇتىداعى جانعىش زاتتى تۇتاتتى. سودان كەيىن وليمپيادا الاۋىن الىپ ءجۇرۋ باستالدى. ەستافەتانىڭ ەجەلگى ەللادا جەرىندەگى العاشقى بولىگى التى كۇنگە سوزىلدى. بۇگىن, 27 ءساۋىر كۇنى افينادا وتتى تىعىرشىق برازيليانىڭ ماقتانىشى – اتاقتى «ماراكانا» ستاديونىندا ويىنداردىڭ سالتاناتتى جاعدايدا اشىلۋ ساتىنە تۋرا 100 كۇن قالعان شاقتا ريو-2016 ۇيىمداستىرۋ كوميتەتىنىڭ ارنايى كەلگەن دەلەگاتسياسىنا تابىس ەتىلەدى. الاۋ مۇحيتتىڭ ارعى بەتىندەگى ەلگە 3 مامىردا جەتكىزىلەدى. ول 95 كۇننىڭ ىشىندە برازيليا اۋماعىنىڭ 90 پايىزىن قامتىپ ءوتىپ, 83 ءىرى قالالار مەن 500 شاعىن قالاشىقتاردا بولىپ, 5 تامىز كۇنى وليمپيالىق ويىنداردىڭ باستى نىسانىنداعى الىپ استاۋعا وت بەرەدى. وتتى قۇتى وسى كەزگە دەيىن 20 مىڭ شاقىرىم جەرمەن, 16 مىڭ شاقىرىمدىق اۋە جولىمەن الىپ وتىلەدى. سول كۇندەرى ونى الىپ جۇرۋگە 12 مىڭعا جۋىق الاۋگەر قاتىسادى.
ءبىر وكىنىشتى جاعداي, وليمپ تاۋىنىڭ ەتەگىندە الاۋ تۇتاتىلعان كۇنى برازيلياداعى جاڭا قاتارعا قوسىلعالى تۇرعان ويىندار نىساندارىنىڭ بىرىندە اپاتتى وقيعا ورىن الىپ, ەكى ادام قازا تاپتى. اتاپ ايتقاندا, تەڭىز جاعالاۋىنداعى تاۋ بيىگىنەن قيالاپ سالىنىپ جاتقان ۆەلوتراسسانىڭ ەرنەۋى وپىرىلىپ كەتىپ, جيەگى قۇزعا قاراي قۇلدىراي قۇلادى. بۇعان قوسا, بۇدان بىرقاتار ۋاقىت بۇرىن ەلدىڭ اۋماعىندا زيكا بەزگەگىنىڭ كوپتەپ كورىنىس بەرۋى ءبىراز جۇرتتى ابىرجىتىپ تاستاعان بولاتىن. بۇعان قوسا, قازىرگى كۇندەرى برازيليادا ەلدىڭ پرەزيدەنتى ديلما رۋسەفكە يمپيچمەنت جاريالاۋ جونىندەگى بۋىرقانعان ءماسەلە ءوزىنىڭ اپوگەيىنە جەتىپ تۇر. ول تاياۋ كۇندەرى پارلامەنتتىڭ جوعارعى پالاتاسى – فەدەرالدى سەناتتا قارالىپ, اقىرعى شەشىمىن شىعارۋى ءتيىس.
وسىنداي كەرەعار وقيعالاردىڭ ورىن العانىنا قاراماستان, برازيليادا وليمپيالىق ويىندارعا دايىندىق جۇمىستارى بۇرىنعىسىنشا ءوز كەستەسىنە ساي قىزۋ قارقىنمەن ءجۇرىپ جاتىر. ريو-دە-جانەيرو XXXI جازعى ويىندارى شەڭبەرىندە بۇرىننان بار, بىراق ايتارلىقتاي جاڭعىرۋدان وتەتىن 18 سپورت نىسانىن پايدالانادى. ال وليمپيادا ءۇشىن جاڭادان سالىناتىن ارەنا سانى 9 بولماق. بۇدان بولەك, ۋاقىتشا پايدالانىلاتىن تاعى 8 نىسان بوي كوتەرەدى. وليمپيالىق نىسانداردىڭ باسىم بولىگى ريو-دە-جانەيروداعى «باررا», «كوپاكابانا», «دەودورو», «ماراكانا» سىندى ءتورت كلاستەرگە شوعىرلانادى. بۇلاردىڭ اراسىنداعى «باررا» ريو-2016-نىڭ جۇرەگى مەن ورتالىق ايماعىنا اينالادى. مۇندا 15 سپورت نىسانىنان بولەك, وليمپيالىق دەرەۆنيا مەن وليمپيالىق پارك ورنالاسادى. «كوپاكانادا» ەسكەك ەسۋ, جەلكەن سپورتى, ترياتلون, جاعاجاي ۆولەيبولى سەكىلدى سپورت تۇرلەرىنەن جارىستار وتەدى. ريو-دە-جانەيرونىڭ دەودورو اۋدانىمەن اتتاس كلاستەر ات سپورتى, مىلتىق اتۋ, سەمسەرلەسۋ, بەسسايىس سايىستارىن قابىلدايدى. ال بۇعان دەيىن اتى 200 مىڭ ورىندىق «ماراكانا» ەسەبىندە تانىمال بولىپ كەلگەن «ماريو فيليۋ» ستاديونى قايتا جاڭعىرعاننان كەيىن 78 مىڭ كورەرمەندى قامتيتىن فۋتبول ماتچتارىنىڭ سايىس الاڭى بولىپ شىعا كەلەدى. «ماراكانا» اۋماعىنداعى سامبادروم ساداق اتۋشىلاردىڭ مەكەنىنە اينالادى. وسى جەردە سونداي-اق ەرلەر مەن ايەلدەردىڭ مارافوننىڭ سورەسى مەن مارەسى بولادى. وليمپيادا تاريحىندا ءبىرىنشى رەت جەڭىل اتلەتتەر سايىستارى بۇل جولى باستى ستاديوندا ەمەس, قوسىمشا ارەنادا وتەدى. ولار 2007 جىلى بوي كوتەرگەن جواو اۆەلانج اتىنداعى سپورت كەشەنىندە جارىس قىزدىرادى. ويىندار اياسىنداعى فۋتبول تۋرنيرى ريودان باسقا تاعى ءتورت قالادا – بەلۋ-وريزونتيدە, سالۆادوردا, سان-پاۋلۋ مەن ەلدىڭ استاناسى – برازيليادا وينالاتىن بولادى.
قازىرگى كۇندەرى وليمپيالىق ويىندارعا قاتىساتىن ەلدەر دە قىزۋ دايىندىق ۇستىندە. سولاردىڭ قاتارىندا قازاقستان دا بار. ءالبەتتە, ءبىزدىڭ ازىرلىگىمىز سپورت ارەنالارىن قاتارعا قوسۋدان ەمەس, سول ويىنداردان مۇمكىندىگىنشە كوبىرەك جۇلدەلەر جەڭىپ الۋ ءۇشىن كۇرەسۋدەن قۇرالادى. وسى كەزدە ءبىزدىڭ ەلىمىزدەن وليمپياداعا 81 سپورتشىنىڭ جولداما الىپ ۇلگەرگەنى بەلگىلى بولىپ وتىر. سونىڭ ىشىندە جەڭىل اتلەتتەردىڭ ەنشىسىندە – 14, بايداركا مەن كانوەدا ەسۋدە – 11, بوكس پەن اۋىر اتلەتيكانىڭ اربىرىندە 10-نان ليتسەنزيا بار. ءبىز وسى شامالاس سپورتشىنى ءوزىمىزدىڭ جەكە كوماندا رەتىندە ءبىرىنشى رەت قاتىسقان 1996 جىلعى اتلانتا وليمپياداسىنا اپارعانبىز. وندا 89 اتلەت تۇڭعىش رەت تاۋەلسىز ەلىمىزدىڭ نامىسىن قورعاعان بولاتىن. ال بۇدان كەيىنگى جىلدارى وليمپياداشىلارىمىز سانى 100-ءدىڭ ۇستىنە شىعىپ كەتتى. بۇل جولى دا سولاي بولاتىن شىعار دەگەن ۇمىتتەمىز. دەگەنمەن, مۇنارالى ماقسات بۇل دا ەمەس. ەڭ باستىسى, وليمپيادادا الاتىن التىن جۇلدەلەرىمىزدىڭ سانى كوپ بولسىن.
سەرىك ءپىرنازار,
«ەگەمەن قازاقستان»
