ءۇندىستاننىڭ ۇلتتىق مۋزەيى وتقا وراندى

استانا. 26 ءساۋىر. ءۇندىستاننىڭ استاناسى نيۋ-دەليدەگى ۇلتتىق مۋزەي وتقا وراندى. بۇل تۋرالى «ينتەرفاكس» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ءورت جەرگىلىكتى ۋاقىت بويىنشا ساعات 01:45-تە, عيماراتتىڭ التىنشى قاباتىنان باستالعان. قىزىل جالىننىڭ نەدەن شىققانى ازىرگە بەلگىسىز. ءورت سوندىرۋشىلەر وقيعا ورنىنا دەر كەزىندە كەلگەنىمەن, 5 ساعاتتان كەيىن عانا سوندىرگەن. اپات كەزىندە مۇراجاي ىشىندە ەشكىم بولماعان. الايدا, ءورت سوندىرۋشىلەردىڭ التاۋى ۋلانىپ, اۋرۋحاناعا جەتكىزىلدى. دارىگەرلەردىڭ ايتۋىنشا, ەكەۋىنىڭ ءحالى تىم اۋىر. ال قورشاعان ورتانى قورعاۋ ءمينيسترى پراكاش دجاۆادەكار قالاداعى 34 مۋزەيدىڭ قاۋىپسىزدىگىن تەكسەرۋدى تاپسىردى. بۇل مۋزەيدى ءۇندىستاننىڭ بۇرىنعى پرەمەر-ءمينيسترى ينديرا گاندي مەملەكەت تاۋەلسىزدىگىنىڭ 25 جىلدىق قۇرمەتىنە وراي 1972 جىلى اشقان. عيمارات ىشىندە ءتۇرلى جان-جانۋارلاردىڭ, قۇستاردىڭ, سونداي-اق, 160 ميلليون جىل بۇرىن جەر بەتىنەن جويىلىپ كەتكەن دينوزاۆرلاردىڭ ت ۇلىپتارى بار بولاتىن. مامانداردىڭ بولجامى بويىنشا, كونە ارتەفاكتار ەندىگى جويىلىپ كەتكەن بولۋى مۇمكىن. ايان ءابدۋالي. دەرەك, فوتو: «ينتەرفاكس».