«بوبەكتەگى» ناۋرىز تويى

كەشە الماتىدا «بوبەك» ۇلتتىق عىلىمي-پراكتيكالىق ءبىلىم بەرۋ جانە ساۋىقتىرۋ ورتالىعىنىڭ «شاتتىق» الاڭىندا «بوبەك» قايىرىمدىلىق قورىنىڭ پرەزيدەنتى سارا نازارباەۆانىڭ قاتىسۋىمەن ناۋرىز مەيرامىنا ارنالعان مەرەكەلىك شارا ءوتتى. ءبىلىم جانە عىلىم ءمينيسترى ەرلان ساعاديەۆ, «جاندانۋ الەمى» قورىنىڭ قۇرىلتايشىسى ءاليا نازارباەۆا, پارلامەنت ءماجىلىسىنىڭ دەپۋتاتى, قازاقستان رەسپۋبليكاسىنداعى بالا قۇقى جونىندەگى ۋاكىلەتتى وكىل زاعيپا باليەۆا, سونداي-اق, الماتى قالاسى اكىمدىگى, تۇڭعىش پرەزيدەنت قورى, ءبىلىم بەرۋ مەكەمەلەرى مەن قوعامدىق ۇيىمدارى وكىلدەرى, بەلگىلى مادەنيەت قايراتكەرلەرى مەرەكەلىك ءىس-شارانىڭ قۇرمەتتى قوناقتارى بولدى. «ماڭگىلىك ەل – ماڭگىلىك جالپى­ادامزاتتىق قۇندىلىقتار» اتتى نەگىزگى يدەياعا يە بولعان مەرە­كەلىك ءىس-شارانىڭ بارىسىندا كوكتەمگى مەيرامنىڭ جارقىن داستۇرلەرى – تاريحي رەتروسپەكتيۆادا كورسەتىلىپ, مەرەكەلىك باعدارلامانى گالا-كونتسەرت, تا­ريحي-مادەني كومپوزيتسيالار, تەاترلاندىرىلعان قويىلىمدار كوركەيتە ءتۇستى. – قۇرمەتتى بالالارىم, كىشكەنە دوستارىم مەنىڭ! – دەدى مەرەكەلىك سالتاناتتى اشقان, ءومىرى ماڭگىلىك ادامزاتتىق قۇندىلىقتارمەن ورىلگەن, جۇرەك جىلۋى مەن نۇرىن بارلىق قازاقستاندىق بالالارعا ارناعان «بوبەك» قورىنىڭ پرەزيدەنتى سارا الپىسقىزى. – سىزدەردىڭ شاقىرتۋلارىڭىزدى ۇلكەن ىقىلاسپەن قابىلداپ, ناۋرىز مەرەكەسىن بىرگە تويلاعالى كەلدىم. استانادان دا قۇرمەتتى قوناقتارىمىز كەلگەن ەكەن, بارلىقتارىڭىزدى ىزگىلىك پەن جاقسىلىقتىڭ مەيرامىمەن قۇتتىقتايمىن! ۇلىستىڭ ۇلى كۇنى قۇتتى بولسىن, بارىمىزگە قۇت-بەرەكە اكەلسىن! ەلىمىزگە, حال­قىمىزعا تىنىشتىق, ءار وتباسىنا, ءار بالاعا باقىت تىلەيمىن! ودان كەيىن بوبەكتىكتەردى ناۋرىز مەرەكەسىمەن ەلىمىزدىڭ باس مۇعالىمى – ءبىلىم جانە عىلىم ءمينيسترى ەرلان ساعاديەۆ قۇتتىق­تاپ, سارا الپىسقىزىنىڭ ۇلكەن وتانىمىز – قازاقستان ءۇشىن, ونىڭ بولاشاق يەلەرى – بالالارعا جاساپ جاتقان يگى ىستەرىن اتاپ ءوتتى. «بوبەكتىڭ» جۇرگىزىپ وتىرعان وسى باعىتتاعى جۇمىستارى الەمنىڭ كەز كەلگەن جانە ءبىزدىڭ ەلىمىزدەگى ءبىلىم بەرۋ جۇيەسىندەگى نەگىزگى دىڭگەك بولىپ سانالادى. جاڭادان بەكىتىلگەن ءتورت جىلدىق ءبىلىم جانە عىلىم دامۋى باعدارلاماسىندا سىزدەردىڭ ورىندارىڭىز ەرەكشە. سوندىقتان, مينيسترلىك اتىنان سىزگە العىس بىلدىرە كەلە, الداعى ۋاقىتتا ادامعا بالا كەزدەن ادامگەرشىلىك, ىزگىلىك قۇندىلىقتارىن بويىنا ءسىڭىرىپ وسۋدەگى رۋحاني-ادامگەرشىلىك ءبىلىم بەرۋگە ارنالعان «ءوزىن ءوزى تانۋ» اۆتورلىق جوباڭىزدىڭ ىسكە اسۋىنا «بوبەكپەن» ىنتىماقتاستىقتا, بار كۇش-جىگەرىمىزبەن جۇمىس ىستەيتىنىمىزدى بىلدىرگىمىز كەلەدى», دەدى مينيستر. «بوبەكتىكتەر» گالا-كونتسەرت باستالعانشا قوناقتارعا «عا­سىرلار قويناۋىنان» اتتى ءبىرىنشى اۋىلدا  «كەلىن ءتۇسىرۋ» ءداستۇرىن كورسەتسە, « ۇلى وزگەرىستەر ءداۋى­رىندەگى» ەكىنشى اۋىلدا 80-جىلدارداعى وكتيابرياتتار مەن پيونەرلەر وتريادتارى الماتى قالاسىنىڭ مىڭ جىلدىعىنا ارنالعان اندەردەن پوپپۋري ورىندادى. ال «ماڭگىلىك ەل» جولىندا» اۋىلى قازىرگى وركەندەپ, دامىعان قازاقستاننان كورىنىستەر كورسەتىپ, تۇساۋكەسەر ءراسىمىن جاسادى. – مەن «بوبەككە» ءبىرىنشى رەت كەلىپ وتىرعانىم جوق, – دەدى مەرەكەگە قوناق رەتىندە شاقىرىلعان عارىشكەر, «حالىق قاھارمانى» ايدىن ايىمبەتوۆ. – بۇل ورتالىق جاراتىلىستاعى جۇمباق, تىلسىم سىرلاردى, سونداي-اق, بالالار شىعارماشىلىعىن, تالانتىن اشاتىن كەرەمەت ورتا. سىزدەرگە ايتايىن, مەن ءۇشىن عارىش «بوبەكتەن» باستالدى دەسەم بولادى. ويتكەنى, 2014 جىلى وسىندا ورنالاسقان, يۋنەسكو-نىڭ حالىقارالىق استرونوميا جىلىنا سايكەس 2009 جىلى اشىلعان كەرەمەت وبسەرۆاتوريادا استرونوميادان وتكەن رەسپۋبليكالىق وليمپياداعا قازىلىق جاساپ, سوڭىنان ناۋ­رىز مەرەكەسىنە قاتىستىم. سون­دا مەنى سارا الپىسقىزىنا عارىشقا ۇشپاي قالعان عارىشكەر رەتىندە تانىستىرعان ەدى. سارا الپىسقىزى بولسا: «ايدىن, اينالايىن, اماندىق بولسا, عارىشقا ۇشاسىڭ!» دەپ باتاسىن بەرگەن ەدى. ءبىر جىلدان كەيىن عارىشقا ۇشتىم. سوندىقتان, مەن ءۇشىن پەرىشتەلەر سالتانات قۇرعان «بوبەك» – قۇتتى ءبىلىم وشاعى. سول ءۇشىن استانادان ارنايى وسى مەرەكەگە قۇستاي ۇشىپ جەتتىم. ءوز كەزەگىندە قازاقتىڭ بۇلبۇل قىزى, ەڭبەك ەرى, كسرو حالىق ءارتىسى بيبىگۇل تولەگەنوۆا مەرەكەدەن وتە جاقسى اسەر العانىن جەتكىزدى. «مەن ءوزى بالالاردى وتە جاقسى كورەمىن, ولارمەن كەزدەسۋگە ءاردايىم قۋانىپ كەلەمىن. ماعان سونداي مۇمكىندىك تۋعىزىپ, بالالاردىڭ مەرەكەسىنە شاقىرعان سارا الپىسقىزىنا مىڭ دا ءبىر راحمەت! قاراپ وتىرسام, وسى بالالاردىڭ ۇلكەن اناسى, ماماسى بولۋ قانداي كەرەمەت باقىت دەسەڭىزشى. سوندىقتان, ول كىسىگە انالىق العىسىمدى بىلدىرەمىن. ويتكەنى, ەلىمىزدىڭ ءبىرىنشى حانىمى رەتىندە قول قۋسىرىپ وتىرماي, ءوزىنىڭ مۇمكىندىگىن پايدالانىپ مەملەكەتىمىزدىڭ دامىپ, وركەندەۋىنە ۇلەس قوسۋدا. ماسەلەن, «بوبەك» اشىلعالى دا شيرەك عاسىر بولىپتى. قازىردىڭ وزىندە «بوبەكتى» بىتىرگەن تۇلەكتەر ءوز دارەجەسىندە ءبىلىم الىپ, ەلىنە پاي­داسىن تيگىزە باستادى. ال مىنا بۇگىنگى بوبەكتىكتەر سولاردىڭ ءىزىن باسىپ, قازاقستاننىڭ گۇلدەنۋىنە اتسالىساتىنىنا سەنىمىم مول», دەدى ءانشى اپالارى. بوبەكتىكتەردىڭ كۇشىمەن ءوت­كەن گالا-كونتسەرتتە ۇلتتىق كيىم­دەرىن كيىپ, توتىدايىن تارانىپ, سۇڭقاردايىن سىلانعان ونەرپاز بالالار مۋزىكالىق كومپوزيتسيا كورسەتىپ, بي بيلەپ, ءان ايتىپ, كۇي تارتىپ, كەلگەن قوناقتاردىڭ كوڭىلىن ءبىر سەرپىلتىپ تاستادى. سۋرەتتەردى تۇسىرگەن بوريس بۋزين