رينگ اپوگەيى – نوكاۋت!

ازۋىن ايعا بىلەگەن «استانا ارلاندارىنىڭ» «ۆەنەسۋەلا كاسي­كەس»كومانداسىن جەڭەتىن­دىگىنە كوڭىلىمىزدىڭ سەنگەنى سون­شالىقتى, وعان بالشى, باقسى, قۇشىناشتار كورىپكەلدىگىنىڭ تۇك تە كەرەگى جوق بولاتىن. شىمكەنتتەگى «تسيرك» مانە­جىندە وتكەن العاشقى كۇنگى ايقاس 4:1 ەسەبىمەن «ارلانداردىڭ» ەسەبى­نە جازىلدى. كەلەسى كۇنى قوناقتاردىڭ ەش­قاي­سىسىنا جەڭىس بۇيىرعان جوق. 52 كيلو سالماقتاعى ازامات يسا­قۇلوۆتىڭ قارسىلاسى يول فينول ون توعىز جاستا بولسا دا 7 رەت شار­شى الاڭعا شىعىپ, تورتەۋىندە جەڭىسكە جەتكەن جىگىت. بىراق, ءبىزدىڭ سايىپقىرانعا ول جاعى اسەر ەتكەن جوق. تۇلكى ءىن­دەتكەن قاسقىرداي ىزىنە ءتۇسىپ شارشى الاڭدا تىقسىر­دى دا ءجۇردى. وڭتايى كەلگەندە وڭ قولمەن وپىرا ۇرىپ, بەتپە-بەت كەلگەندە بەس-التى سوققىعا كومىپ تاس­تادى. ءۇشىنشى راۋندتا ازاماتتىڭ سوققىسىنان فينول­دىڭ اۋزىنداعى كاپاسى ۇشىپ كەتكەن. الاپات ۇرىس سالعان يسا­قۇلوۆتىڭ ءوز كۇشىن دۇرىس ەسەپتەمەگەنى ءتورتىنشى راۋند­­تىڭ ورتاسىندا بايقالىپ قال­عان. قارقىنى باسەڭدەگەن سوڭ فينول العا ۇمتىلدى. ءۇش تورە­شىنىڭ ەكەۋى ۆەنەسۋەلالىق جىگىتكە جاق تارتتى. سوڭعى راۋندتا دا سولاي بولدى. ازامات العاشقى ءۇش راۋندتاعى تازا العان ۇپايلارىنىڭ ارقا­سىندا 2-1 ەسەبىمەن جەڭىسكە جەتتى. ال زاكير ءسافيۋليننىڭ (60 كيلو) قامشى سالدىرمايتىنىن بىلگەنبىز. ونىڭ ۇرىس مانەرى ەشكىمگە ۇقساي بەرمەيدى. ءبىر قىرىنداپ ەكى قولىن سالبىراتىپ جىبەرىپ, قارسىلاسىنا دۇرسە قويا بەرەدى. ول وڭاي ولجا كورىپ, تاپ بەرگەندە وڭ, سول قول ەكى جاعىنان قانجارداي قادالادى. قارسىلاسى لۋيس كاربەر دۇرىس سوققى دارىتا الماي ابدەن پۇشايمان بولدى. قالاسا راۋند اراسىندا ءوزىن تىنىقتىرا دا بىلەتىن زا­كير بەس راۋندقا كۇشىن ابدەن شامالاپتى. بەسىنشى راۋندتان سوڭ دا سۋىتىلعان جاراۋ اتتاي ويناقشىپ تۇردى. ەشبىر تورەشى جەڭىسىنە كۇماندانعان جوق. زاكيردىڭ شىمكەنتتىك جەرلەسى بەكزوت حالمەتوۆتىڭ (69 كيلو) قارسىلاسى گابريەل ماەسترانىڭ قايراتىن لوندون وليمپياداسىندا كورگەنبىز. يىقتى, قولى ۇزىن, ورتا جانە الىس قاشىقتىقتا ءوزىن سۋداعى بالىقتاي سەزىنەتىن ماەستراڭىز ريو دە جانەيرونىڭ جولداماسىن قالتاسىنا باسىپ العان ءدوي. راۋند سايىن وكشەسىن باس­تى دا وتىردى. گابريەلدىڭ ەكى سوققىسىنا نامىس تۇلا بويىن جاندىرعان سايىپقىرانىمىز ءتورت سوققىمەن جاۋاپ بەرۋگە تىرىستى. راس, ماەسترانىڭ ارۋاعى اسقان تۇستارى دا بولدى. كوسەۋدەي قولدارى اش بۇيىردەن سۇڭگىدەي قادالىپ جاتتى. بىراق, بەكزوتتىڭ جەڭىسكە دەگەن قۇشتارلىعى گابريەل­­دىڭ ەكپىنىن تاۋ سۋىنداي باس­تى دا وتىردى. تورەشىلەر ال­عاشقى ەكى راۋندتا ماەسترو جاعىندا بولعانىمەن, سوڭعى ءۇش راۋندتا حالمەتوۆتىڭ جەڭگەنىنە كۇماندانعان جوق. ارمان رىسبەككە (81 كيلو) كو­بىرەك سەنگەن ەدىك. قويان-قول­تىق ايقاستىڭ جىگىتى ەدى. باسىن قار­سىلاسىنىڭ باسىنا تىرەپ قويىپ, قويعىلاسۋدا دەس بەرمەيتىن. ۆە­نەسۋەلالىق نالەك كورباج دە­گەنىڭىز دە وسىنداي سويقان ەكەن. ناعىز كەلسەڭ كەلدىڭ ءوزى. قايتا ءبىزدىڭ ارمان «مىنا پالەنىڭ بەتى قۇرىسىن» دەگەندەي, ەكى-ءۇش مارتە تايقىپ كەتىپ, ۇرىس سالدى. سوڭعى راۋندتا تورەشىلەردىڭ ۇشەۋى دە نالەك مىقتى دەگەنىمەن بەس راۋندتىڭ قورىتىندىسىمەن رىسبەك جەڭىسكە جەتتى. اسا اۋىر سالماقتاعى قامشىبەك قوڭقاباەۆ وسكەمەندە وتكەن جارىستا وزبەك بوكسشىسى ابدۋللاەۆتى ەركىن ەڭسەرگەن ەدى. ەدگار مۋنيس بويى تاپالداۋ بولعانىمەن دەنەسى تىعىز. العاشقى راۋندتا قامشىبەكتى شارشى الاڭ بۇرىشىنا قۋىپ تىعىپ, سوققى استىنا العاندا «سوڭى قالاي بولار ەكەن» دەپ قىلپىلداپ قالعانبىز. قامشىبەك ەردىڭ سويى ەكەن. ەكىنشى راۋندتا جاعىنان وپىرا ۇرىپ, ەدەنگە جالپ ەتكىزدى. نوكاۋت! جالپى ەسەپ 9:1. ارلانداردىڭ جارتىلاي فينالداعى قارسىلاسى – «British Lionhearts». باقتيار تايجان, «ەگەمەن قازاقستان» وڭتۇستىك قازاقستان وبلىسى