قار بارىسى

ونى قازاقستاندا ساقتاۋ جوباسى جالعاسادى حالىقارالىق قىزىل كىتاپقا ەنگەن قار بارىسىنىڭ قازاقستان اۋماعىندا ساقتالۋىنا مۇمكىندىك بەرىپ, سانىن ارتتىرۋدى كوزدەيتىن «يربيس» جوباسى 2015 جىلى Carlsberg Kazakhstan كومپانياسى مەن قازاقستانداعى بيوالۋانتۇرلىلىكتى ساقتاۋ اسسوتسياتسياسىنىڭ (قبسا) اتسالىسۋىمەن ىسكە قوسىلعان ەدى. ەگەر جەر بەتىندە قار بارىسى مە­كەندەيتىن 20 ايماق بولسا, سونىڭ ەكەۋى قازاقستاندا. بۇلار – جوڭعار الاتاۋى مەن ىلە الاتاۋى. باستاپقىدا جوبانى قولعا الىپ وتىرعان سەرىكتەستەر بۇل اۋماقتاردا قار بارىسىنىڭ قالعانىنا دا كۇمان كەلتىرگەندەرىن جاسىرمايدى. ونىڭ ۇستىنە سوڭعى جىلدارى قار بارىسىن زەرتتەۋگە زوولوگيا ينستيتۋتىنىڭ قارجىسى دا بولماعان. – 2015 جىلى جوبا جوڭعار الاتاۋى اۋماعىندا جۇزەگە اسىرىلىپ, جىلدىڭ ءار مەزگىلىندەگى 3 دالا ەكسپەديتسياسى جولعا شىعىپ, جوبا اياسىندا 50 فوتوقاقپان ساتىپ الىنىپ, ورناتىلدى. بۇل اۋماقتا فوتوقاقپاندار 6 قار بارىسىن انىقتادى (الانى بار انالىق جانە 4 جالعىز ەرەسەك ەركەك باس). زەرتتەلگەن اۋماق كولەمى 1300 شارشى شاقىرىمدى قۇرادى. زەرتتەۋ ناتيجەلەرى جوڭعار الاتاۋىنداعى ءىلبىس سانىنىڭ 2015 جىلى 50-60 باس (الاندارىمەن قوسا العاندا) ەكەندىگى جايلى بولجام جاساۋعا مۇمكىندىك بەردى. ال 2014 جىلى جوڭعار الا­تاۋىنداعى قار بارىسىنىڭ سانى 40-50 باس دەپ بەلگىلەنگەن-ءدى. كەيىنگى كورسەتكىشتىڭ وسكەنىنە قۋانىشتىمىز, – دەدى قبسا ديرەكتورىنىڭ عىلىم جونىندەگى ورىنباسارى, قولدانبالى بيولوگيا ورتالىعىنىڭ ديرەكتورى سەرگەي سكليارەنكو. بيىل Carlsberg Kazakhstan كومپا­نياسىنىڭ جوبا اياسىنداعى سەرىكتەستىگى قر ءبىلىم جانە عىلىم مينيسترلىگىنىڭ عىلىم كوميتەتىنە قاراستى زوولوگيا ينستيتۋتىمەن ىنتىماقتاسۋ ەسەبىنەن ارتا تۇسكەن. ەندى بۇل مەكەمە 2016 جىلى ىلە الاتاۋى مەن الماتى قا­­لاسى ماڭىنداعى قار بارىسىنا كە­شەندى زەرتتەۋ جۇرگىزبەكشى. وعان قو­سا قازاقستانداعى بيوالۋانتۇرلىلىكتى ساقتاۋ اسسوتسياتسياسى جوڭعار الا­تاۋى اۋماعىنداعى جۇمىستاردى جال­عاس­تىرادى. – ءبىز «يربيس» جوباسى ۇزاق مەرزىمدى جوبا بولاتىندىعىن مالىمدەگەنبىز. ويتكەنى, قار بارىسىنىڭ قازاق­ستانداعى سانىن كوبەيتۋ ءىسى ءبىر جىل­دىڭ اياسىندا بىتە سالاتىن شارۋا ەمەس. سوندىقتان, 2016 جىلى ءبىز جوبا جاعراپياسى مەن سەرىكتەستەر شەڭبەرىن ۇلعايتتىق. ەرتەڭ بالالارىمىز بەن نەمەرەلەرىمىز قار بارىسىن كىتاپتان نەمەسە حايۋاناتتار باعىنان عانا تاماشالاپ قالماۋى ءۇشىن جانە ونىڭ تۇمسا تابيعاتتا, تابيعي ورتاسىندا تىرشىلىك ەتۋى ءۇشىن www.saveirbis.kz پورتالىن ازىرلەپ ىسكە قوسۋ ارقىلى ءبىز ءىلبىستىڭ تاعدىرىنا ەنجار قارامايتىن كەز كەلگەن ادامعا وسىناۋ عاجايىپ اڭدى ساقتاۋ جۇمىسىنان قالىس قالماۋىنا مۇمكىندىك بەردىك, – دەيدى «Carlsberg Kazakhstan» جشس پرەزيدەنتى ۆيكتور سەماك. ءباسپاسوز ءماسليحاتىندا جۋرناليس­تەر 2012-2015 جىلدار ارالاعىندا الماتى حايۋاناتتار باعىندا ءار مەز­گىلدە بىرتىندەپ ولگەن 6 قار بارى­سىنىڭ دا ماسەلەسىن اينالىپ وتكەن جوق. ايناش ەسالي, «ەگەمەن قازاقستان» الماتى