قاداعالاۋشى ورگاننىڭ مىندەتتەرىن ايقىندادى

ەلباسى نۇرسۇلتان نازارباەۆ باس پروكۋراتۋراعا باردى, دەپ حابارلادى پرەزيدەنتتىڭ ءباسپاسوز قىزمەتى. قازاقستان پرەزيدەنتى باس پرو­كۋراتۋرانىڭ باسشىلىق قۇرا­مى الدىندا سويلەگەن سوزىندە ا.داۋ­ىلباەۆتىڭ لاۋازىمىنان بوساتىلاتىنىن, وكىلەتتىك مەرزىمىنىڭ اياقتالۋىنا بايلانىستى ونىڭ باسقا جۇمىسقا اۋىساتىنىن ايتتى. – اسحات داۋىلباەۆ باس پروكۋ­راتۋرادا سوڭعى 15 جىل بويى ءۇز­دىك­سىز جۇمىس ىستەدى. الدىنا قويىل­عان مىندەتتەردى ورىندادى, سوعان وراي وعان جۇمىسى ءۇشىن العىس ايتا­مىن. ول الداعى ۋاقىتتا دا ءوزىنىڭ كاسىبي ۇلەسىن قوساتىن بولادى, – دەدى مەملەكەت باسشىسى. سونداي-اق, نۇرسۇلتان نازارباەۆ پروكۋراتۋرا جۇيەسىندە ەلەۋلى جۇمىس تاجىريبەسى بار جاڭا باس پروكۋرور ج.اسانوۆتى تانىس­تىردى. – ول پروكۋرورلىق قىزمەتتىڭ بارلىق ساتىسىنان ءوتتى, ءۇش وڭىردە, ادىلەت مينيسترلىگىندە قىزمەت ىستەدى, پارلامەنت دەپۋتاتى بولدى. ءبىلىمى مەن تاجىريبەسى جەتكىلىكتى, جەرگىلىكتى جەردەگى احۋالمەن تانىس. وسى ۇجىمدا ۇزاق ۋاقىتتان بەرى جۇمىس ىستەيدى, وعان ەشقانداي ەسكەرتۋ ايتىلعان جوق. بۇل جۇمىس قولىنان كەلەتىنىنە سەنىمدىمىن, – دەدى قازاقستان پرەزيدەنتى. مەملەكەت باسشىسى بيىل بەس ينستيتۋتتىق رەفورمانى جۇزەگە اسىرۋ باستالعانىنا, ونىڭ ءبىر با­عىتى قۇقىقتىق مەملەكەت قا­لىپ­تاستىرۋ ەكەنىنە نازار اۋداردى. – نەگىزگى سالماق پروكۋرا­تۋرا ورگاندارىنا تۇسەدى, ويتكەنى, ولار بارلىق وزگە قۇقىق قورعاۋ ور­گان­دارىنىڭ قىزمەتىن ۇيلەستىرە­تىندىكتەن, قۇقىقتىق سالادا زور وكىلەتتىكتەرگە يە. سوڭعى جىلدارى قاداعالاۋشى ورگان ەل ازاماتتارىن قورعاۋ جانە قۇقىق ءتارتىبىن قامتاماسىز ەتۋ جونىنەن ەلەۋلى جۇمىس اتقاردى. مەملەكەتتىك جانە قوعامدىق ينستيتۋتتاردىڭ قۇقىق قورعاۋ الەۋەتىن ارتتىرۋ, زاڭداردى ءتيىمدى قولدانۋ جانە ازاماتتارمەن, شاعىن جانە ورتا بيزنەس وكىلدەرىمەن كۇندەلىكتى جۇمىس بارىسىندا زاڭنىڭ ساقتالۋىن قامتاماسىز ەتۋ – باستى مىندەت, – دەدى نۇرسۇلتان نازارباەۆ. قازاقستان پرەزيدەنتى بۇل رەتتە ازاماتتارعا ءوز قۇقىقتارىن, سونداي-اق, ەلدە قابىلدانىپ جاتقان زاڭداردى, سونىڭ ىشىندە جەر كودەكسىن دۇرىس ءتۇسىندىرۋدىڭ ماڭىزدىلىعىن اتاپ ءوتتى. – كودەكستە جەردىڭ شەتەل­دىك­تەرگە ساتىلاتىنى تۋرالى ەشتەڭە ايتىلماعان. ءبىزدىڭ مىندەت – جەر­دىڭ مەنشىك يەسى بولىپ, ونىڭ دۇرىس پايدالانىلۋى ءۇشىن قازاقستان ازاماتتارىنا جەردى جەكەشەلەندىرۋ مۇمكىندىگىن بەرۋ. جەر قۋراي باسىپ, يەسىز جاتپاي, تۇسىنىكسىز ماقساتتا پايدالانىلماي, حالىقتىڭ يگىلىگىنە اينالۋى كەرەك, – دەدى مەملەكەت باسشىسى. وسىعان بايلانىستى نۇرسۇلتان نازارباەۆ جاڭا نورمانى تولىق تۇسىنبەۋ جانە بۇرىس مازمۇنداۋ دەرەكتەرى بار ەكەنىن ايتتى. – بۇل ماسەلە مەملەكەت قا­بىل­داپ وتىرعان زاڭداردى حالىققا ءتۇ­سىن­دىرۋگە مىندەتتى ۇكىمەت پەن جەر­گىلىكتى اتقارۋشى بيلىككە, سون­داي-اق, قۇقىق قورعاۋ ورگاندارىنا قاتىستى, – دەدى قازاقستان پرەزيدەنتى. بۇدان بولەك, مەملەكەت باسشىسى ۇلكەن رەزونانس تۋدىرعان ىستەر بويىنشا پروكۋرورلار پرە­زي­دەنتتىڭ ءتيىستى تاپسىرماسىنان كەيىن عانا شارا قابىلداعان جاع­دايلار بولعانىنا نازار اۋداردى. – زاڭدى ساقتاۋشىلاردىڭ ءوز­دەرى وكىلەتتىكتەرىن ورىنداۋ ءجونى­نەن ءمىنسىز بولۋعا ءتيىس. سوندا سەنىم ارتا تۇسەدى, ارىز-شاعىم ازايادى, باق-تاعى ماتەريالداردىڭ مازمۇنى دا وزگەرەدى. بۇل – كۇردەلى مىندەت, بىراق ونى شەشپەيىنشە ءبىزدىڭ بارلىق جوسپارىمىز ءۇزىلىپ, ستراتەگيالار مەن قابىلدانىپ جاتقان باعدارلامالارعا دا قا­تەر تونەدى. سوندىقتان, مەن سىزدەر­دى دۇرىستاپ جۇمىس ىستەۋگە شاقى­رامىن. بەس ينستيتۋتتىق رەفورما مەن «100 قادامدا» ول شارالاردىڭ ءبارى ناقتى جازىلعان, – دەدى نۇرسۇلتان نازارباەۆ. قازاقستان پرەزيدەنتى كوز­دەل­گەن رەفورمالار ارقاسىندا قۇقىق قورعاۋ جانە سوت جۇيەسى ازا­ماتتاردىڭ قۇقىقتارىن قور­عاۋ جونىندەگى ءوز جۇمىسىنىڭ ءتيىم­دىلىگىن ارتتىرا تۇسەتىنىنە سەنىم ءبىلدىردى.