الەۋمەتتىك جەلىدە «عاسىر لاقتىرۋى» قىزۋ تالقىلانىپ جاتىر

استانا. 23 ءساۋىر. وليمپيا ويىندارى جاقىنداعان سايىن الەۋمەتتىك جەلىدە وتكەن وليمپيادالاردان سىر شەرتەتىن قىزىقتى دۇنيەلەر جاريالانىپ جاتىر. بۇل تۋرالى egemen.kz ءتىلشىسى حابارلادى. سولاردىڭ ءبىرى 1972 جىلى ميۋنحەن قالاسىندا وتكەن جازعى ويىنداردا «عاسىر لاقتىرۋى» اتانعان كۇرەس تاسىلىنە ارنالعان. قازىر بۇل پوستتى facebook الەۋمەتتىك جەلىسىندە 712 ادام ءوز پاراقشالارىندا تاراتسا, وعان 1 400-دەن استام ادام لايك باسقان, ياعني پوستتى ۇناتامىن دەگەن باعاسىن بەرگەن. پوستتا سالماعى 110 كيلو گەرمانيا بالۋانى ۆيلفريد ءديتريحتىڭ گرەك-ريم كۇرەسىنەن وتكەن سىندا وزىنەن سالماعى اۋىر امەريكالىق تۇيە بالۋان كريس تەيلوردىڭ بەلىنەن قىسىپ, اسىرا لاقتىرعانى تۋرالى جازىلعان. وسى پوستتا سالماعى 187 كيلو اقش بالۋانىنىڭ قۇلاپ بارا جاتقان سۋرەتى جاريالانعان. بۇل سۋرەتتى شۆەد فوتوگرافتارى تۇسىرگەن. ول سۋرەت «عاسىر لاقتىرۋى» دەپ اتالىپ كەتتى. كەيىن امەريكالىق بالۋان: «بۇل ومىردە مەنى كىلەمنەن ج ۇلىپ الىپ, لاقتىراتىن ادام بار دەپ ەشقاشان ويلاعان جوقپىن. مەن قاتەلەسكەن ەكەنمىن», دەگەن ەكەن. وسى وليمپيادادا كريس تەيلور گرەك-ريم جانە ەركىن كۇرەستەن بەلدەستى. ول ۆيلفريد ديتريحتەن جەڭىلگەننەن كەيىن جارتىلاي فينالدا ەركىن كۇرەستەن كەڭەس وداعىنىڭ اتاقتى بالۋانى الەكساندر مەدۆەدتەن ۇتىلىپ, قولا جۇلدەنى يەلەندى. سول كەزدە كريس تەيلوردىڭ جاسى 22-دە بولسا, تالاي وليمپيادانىڭ كىلەمىنىڭ شاڭىن قاققان ۆيلفريد ءديتريحتىڭ جاسى 39-دا بولىپتى. بۇعان دەيىن گەرمانيا بالۋانى 1960 جىلى ەركىن كۇرەستەن ريم وليمپياداسىنىڭ چەمپيونى اتانسا, وسى جارىستا گرەك-ريم كۇرەسىنەن كۇمىس مەدالدى, 1956 جىلى مەلبۋرندە وتكەن وليمپيادانىڭ كۇمىس جۇلدەسىن,1964 جىلى توكيو جانە 1968 جىلى مەحيكو وليمپياداسىنىڭ قولا جۇلدەسىن جەڭىپ العان بولاتىن. ول 1992 جىلى 58 جاسىندا وڭتۇستىك افريكا رەسپۋبليكاسىندا قايتىس بولدى. ال كريس تەيلور 1979 جىلى اقش-تا 29 جاسىندا  باقيلىق ساپارعا اتتاندى. داستان كەنجالين. دەرەك, فوتو: Facebook الەۋمەتتىك جەلىسى.