كوكشەتاۋداعى كۇي كەشى

وبلىستىق فيلارمونيادا كەنجەبەك كۇمىسبەكوۆ اتىنداعى قازاق ۇلتتىق اسپاپتار وركەسترىنىڭ كۇي اتاسى قۇرمانعازىنىڭ شاكىرتى, قازاق كسر-ءنىڭ حالىق ءارتىسى, كۇيشى دينا نۇرپەيىسوۆانىڭ 155 جىلدىعىنا ارنالعان «اسەم قوڭىر» اتتى كونتسەرتى بولىپ ءوتتى. دينا جاستايىنان داۋلەتكەرەي, ءمۇسىرالى, الكەي, تۇركەش, ۇزاق, ەسجان, بايجۇما, بالامايساڭ سياقتى كۇيشىلەردىڭ كۇيىن ناشىنە كەلتىرە تارتىپ, ءوزى تۋعان ايماققا «دومبىراشى قىز» دەگەن اتپەن تانىلعان. قارشاداي قىزدىڭ داڭقىن ەستىپ, ايگىلى قۇرمانعازى ارنايى ىزدەپ كەلەدى. ول دينانىڭ دومبىرا تارتىسىنا ءسۇيسىنىپ, بولاشاعىنان ۇلكەن ءۇمىت كۇتىپ, باتاسىن بەرگەن. وسىدان كەيىن دينادان كوز جازباي, ۇنەمى اينالىپ سوعىپ, دودالى كۇي تارتىستارىنا ەرتىپ بارىپ, دومبىرا تارتۋدىڭ تەرەڭ سىرلارىن ۇيرەتەدى. كۇيشىنىڭ شىعارماشىلىعىن عالىمدار ەكى كەزەڭگە ءبولىپ قارايدى. ءبىرىنشىسى, رەۆوليۋتسياعا دەيىنگى, ەكىنشىسى كەڭەستىك زاماندى قامتيدى. كوكشەتاۋداعى كونتسەرت وسى ەكى كەزەڭدى دە تولىق تەربەتىپ, كورەرمەن جۇرەگىنە قوندىرا ءبىلدى. تۇرلىقوجا بازاروۆ پەن رۋسلان قويشىباەۆتىڭ ديريجەرلىگىمەن دينانىڭ «اسەم قوڭىر», «ءوتتىڭ داۋرەن», «پارتيا», «ون التىنشى جىل» سياقتى كۇيلەرى وركەسترمەن شەرتىلسە, «مەرەكە» كۇيىن كورەر­مەندەر ازامات ايقىشەۆتىڭ جەكە ورىنداۋىندا تىڭدادى. سون­داي-اق, «جەڭىس» كۇيىن الماس وماروۆ, «جىگەردى» قۇرمەت سەيىت, «دوما­لاتپايدى» اسەل بەيسەمبينا, «باي­جۇمانى» قايىربەك قاراباەۆ ۇلكەن شەبەرلىكپەن ورىنداپ شىقتى. سونىمەن قاتار, قۇرمانعازى ساعىرباي ۇلىنىڭ, نۇرعيسا تىلەن­ديەۆتىڭ, ايتقالي جايىموۆتىڭ, نۇرلان بەكەنوۆ پەن بەرىك ورازا­ليننىڭ شىعارمالارى كوكشە تورىندە اسەم ناقىشپەن قالىقتادى. باقبەرگەن امالبەك, «ەگەمەن قازاقستان» اقمولا وبلىسى