جوعالعان قىز تابىلدى

«SOS!» دەپ ايقايلاعىڭ كەلەدى كەيدە. ادامداردىڭ قاتىگەزدەنىپ, جۇرەگى قاتىپ, كىسىلىك كەلبەتىن جوعالتىپ جاتقانىن كورگەندە كىمنەن كومەك سۇرارىڭدى دا ءبىل­مەيسىڭ. قاراپايىم عانا ادام­گەرشىلىك دەپ اتالاتىن سەزىمنىڭ ءوزى جوعالۋدىڭ الدىندا تۇر عوي. مەيىرىم دەيتىن ۇلكەن قاسيەتتى اركىمنىڭ بويىنان كەزدەستىرە بەرمەيسىڭ بۇگىندە. ەگەر مەيىرىم مەن ماحاببات بولسا, وندا جاڭا تۋعان ءسابيىن دارەتحاناعا تاستاي ما؟ ادامدار قاعاز اقشا ءۇشىن ءبىرىن-ءبىرى ولتىرە مە؟ تۇتاستاي وتباسىن قويشا قىرىپ كەتە مە؟ قىزدىڭ ارىن تاپتاي ما؟ ادامدار ءىز-ءتۇزسىز جوعالىپ كەتە مە؟ وسىدان بىرنەشە كۇن بۇرىن الەۋمەتتىك جەلى شۋلاپ قويا بەردى. شيەلى اۋدانىنىڭ بەستام اۋىلىندا تۇراتىن 16 جاستاعى قىز جوعالىپ كەتكەن. تاعى قانداي سۇمدىق بولدى ەكەن دەپ زارەمىز كەتتى. ويتكەنى, جاس قىزداردىڭ جوعالىپ, دەنەسى تاۋدىڭ اڭعارىندا, جولدىڭ بويىن­دا تابىلىپ جاتقان جاعداي جوق ەمەس. ءساۋىردىڭ 18-ءى كۇنى ساباققا كەتىپ, سودان ورالماعان وقۋشىنى اعايىن-تۋىسقانىنان بولەك, قۇقىق قورعاۋشىلار دا سابىلىپ ىزدەدى. 2-ساباقتان كەيىن ەشكىمگە ەشتەڭە ايتپاي كەتىپ قالعان. جۇرت تابانىنان توزدى. اسىرەسە, شيەلى اۋداندىق ىشكى ىستەر ءبولىمى كۇنى-ءتۇنى جۇمىس ىستەدى. جاس قىزدىڭ جوعالۋ فاك­تىسى بويىنشا ىزدەستىرۋ شارالارى جۇرگىزىلىپ, ءجاسوسپىرىمنىڭ تۇر­پاتتىق بەينەسى, ەرەكشە بەلگىلەرى جاسالدى. ۇيدەن كەتىپ قالۋىنا سەبەپ بولارلىق بار­لىق جايتتار جان-جاقتى قا­رالىپ, بارۋى مۇمكىن ورىندار تەكسەرىلىپ, قۇربىلارى مەن دوس­تارىنان تۇسىنىكتەمەلەر الىندى. اتالعان فاكتىگە سەبەپ بولارلىق جايتتار, بارلىق بولجامدار جان-جاقتى قارالدى. وسىنداي ەڭبەكتىڭ ارقاسىندا قىز تابىلدى. 21 ءساۋىر كۇنى تۇسكى ساعات 14.30 شاماسىندا قىزىلوردا قالاسىنان قۋانىشتى حابار كەلدى. جەرگىلىكتى پوليتسيا قىزمەتىنىڭ كامەلەتكە تولماعاندار ىستەرى جونىندەگى اعا ۋچاسكەلىك پوليتسيا ينسپەكتورلارى اباي ماديەۆ پەن ماقسات سىزدىقوۆ قىزدى قىزىلوردا قالاسى, اۋەجاي اۋماعىنداعى تانىسىنىڭ ۇيىنەن تاۋىپ العان. ونىڭ جالپى جاعدايى جاقسى دەپ باعالانىپ وتىر. ال ۇيىنەن نە ءۇشىن كەتىپ قالعانى, نەگە اتا-اناسىنا اماندىعىن ايتىپ ەسكەرتپەگەنى انىقتالىپ جاتىر. ەرجان بايتىلەس, «ەگەمەن قازاقستان» قىزىلوردا وبلىسى