ەلگەزەكتىگىمەن ەرەكشەلەنگەن ەۆگەني

تاعدىردىڭ جازۋىمەن قازاقستاندا تۋىپ, وسى ەلدىڭ بولاشاعى ءۇشىن ايانباي ەڭبەك ەتىپ جاتقان ازاماتتار جەتەرلىك. قازاق حالقىنىڭ سالت-ءداستۇرىن ساقتاپ, ادەت-عۇرپىن دارىپتەپ, ءتىلىن مەڭگەرىپ, قازاق ەمەس, بىراق, قازاقتان بىلاي ەمەس وزگە ۇلت وكىلدەرى كوپشىلىك. ۇلتتار ىنتىماعى مەن بىرلىگىن بەرىك ۇستانعان كوپۇلتتى ەلىمىزدىڭ وزگەدەن باستى ەرەكشەلىگى دە وسى بولسا كەرەك. قىزىلوردا وبلىسىندا ءبىر شاڭىراق استىندا ءومىر ءسۇرىپ جاتقان ءتۇرلى ەتنوستار وزدەرىنىڭ ءتول مادەنيەتىن, ءتىلى مەن سالت-ءداس­تۇرلەرىن ساقتاپ وتىر. وسىنداي ءبىر شاڭىراق استىندا ءومىر ءسۇرىپ جاتقان وتباسىلاردىڭ ءبىرى دەپ ارال اۋدانى جاقسىقىلىش كەنتىندەگى ورىس ۇلتىنىڭ وكىلى كۋرباتوۆتاردى ايتۋعا بولادى. ءبىزدىڭ بۇگىنگى كەيىپ­كەرىمىز ەۆگەني كۋرباتوۆ وسى وتباسىندا 1978 جىلدىڭ 20 تامىزىندا دۇنيەگە كەلگەن. ونىڭ دوستارى اۋىلدىڭ قارادومالاق بالالارى ەدى. وسى قارادومالاق اۋىل بالالارىمەن بىرگە اسىق ويناپ, لاڭگى تەۋىپ, قۇمعا اۋناپ وسكەن ە.كۋرباتوۆتىڭ ءتىلى قازاقشا شىقتى. 1985 جىلى جاقسىقىلىش كەنتىندەگى №19 ورتا مەكتەپتىڭ العاش تابالدىرىعىن اتتاعان بالا­قاي ءبىلىم ورداسىن قازاق تىلىندە اياق­تادى. ال ەڭ العاش ەڭبەك جولىن «ارالتۇز» اق-تا جۇمىسشى بولىپ باستاعان ول 2003 جىلى ق.جۇبانوۆ اتىنداعى مەملەكەتتىك ۋنيۆەرسيتەتتىڭ دەنەشىنىقتىرۋ جانە سپورت فاكۋلتەتىنە ءتۇسىپ, ونى 2008 جىلى ءبىتىردى. قازاقى اۋىلدا, كوپ قازاق ورتاسىندا وسكەن, قازاقى ءتالىم-تاربيە العان ە.كۋرباتوۆ ومىرلىك جارىن دا قازاق قىزىنان تاڭدادى. ومىردەگى قول ۇستاسقان جارى گۇلميرا ءسار­سەنباەۆا ەكەۋى – ەكى قىز, ءبىر ۇل ءتار­بيەلەپ وتىرعان اۋىلداعى ۇلگىلى وتباسىلاردىڭ ءبىرى. اناسى تاتيانا دميتريەۆنا – 40 جىل وقۋشىلارعا ورىس تىلىنەن ءدارىس بەرگەن قارت ۇستاز. قازىر قۇرمەتتى زەينەتكەر, نەمەرەلەرىنىڭ سۇيىكتى اجەسى. ە.كۋرباتوۆ 2004 جىلدان باس­تاپ ارال اۋداندىق بالالار مەن جاسوسپىرىمدەر سپورت مەكتەبىنىڭ ۆولەيبول بولىمشەسىنە جاتتىقتىرۋشى بولىپ جۇمىسقا قابىلداندى. ال 2008 جىلى سەكسەۋىل كەنتىندە بالالار مەن جاسوسپىرىمدەر سپورت مەك­تەبىنىڭ اشىلۋىنا بايلانىستى سول مەكتەپتە ۆولەيبول بولىمشەسىنە جاتتىقتىرۋشى بولىپ اۋىستى. ول 2005-2009 جىلدارى قىزىلوردا وبلىسىنىڭ ۆولەيبول ەرلەر قۇراما كومانداسىنىڭ مۇشەسى, ال 2010 جىلدان بەرى ارال اۋداندىق ۆولەيبول ەرلەر قۇراما كومانداسىنىڭ اعا جاتتىقتىرۋشىسى بولىپ ەڭبەك ەتىپ كەلەدى. وسى كەزەڭدە جەتكەن جەتىستىكتەرى دە جەتەرلىك. اتاپ ايتار بولساق, «ۇزدىك تورەشىلىگى» ءۇشىن ديپلوم السا, ۆولەيبولدان ەرلەر اراسىندا وتكەن وبلىس بىرىنشىلىگىنىڭ «ءۇز­دىك قورعاۋشىسى» اتالىمىمەن, قى­زىلوردا وبلىسى ۆولەيبول فەدە­راتسياسىنىڭ قۇرىلعانىنا 50 جىل تولۋىنا ارنالعان فەدەراتسيا كۋبو­گىنىڭ «ۇزدىك شابۋىلشى» اتالىمىمەن ماراپاتتالعان. قىزىلوردا وبلىسىنىڭ دەنە تاربيەسى جانە سپورت باسقارماسىنىڭ, ارال اۋداندىق تۋريزم جانە سپورت ءبولىمىنىڭ «ماق­تاۋ قاعازىمەن» بىرنەشە مارتە ماراپاتتالعان. ال جارى گۇلميرا دا ەۆگەنيمەن بىرگە سالاماتتى ءومىر سالتىن قالىپ­تاس­تىرۋدا. گۇلميرا 2010 جىلى قى­زىلوردا قالاسىنداعى قورقىت اتا اتىنداعى مەملەكەتتىك ۋنيۆەرسيتەتىن ءبىتىردى. №20 ارال اۋدانىنىڭ  بالالار مەن جاسوسپىرىمدەر سپورت مەكتەبىندە ۆولەيبول بولىمشەسىنىڭ (قىز بالالار) جاتتىقتىرۋشىسى بولىپ جۇمىس جاسايدى. ارال اۋدانىنىڭ ۆولەيبول ايەلدەر قۇراماسىنىڭ كوشباسشىسى. 2006 جىلدان باستاپ قىزىلوردا وبلىسىنىڭ ۆولەيبول ايەلدەر قۇراماسىنىڭ مۇشەسى. ءبىر وتباسىنىڭ ۇيىتقىسى بولا بىلگەن اياۋلى انا, سۇيىكتى جار. ەرجان بايتىلەس, «ەگەمەن قازاقستان» قىزىلوردا وبلىسى, ارال اۋدانى سۋرەتتە: ورتادا تۇرعان ە.كۋرباتوۆ