ەلباسى شىمكەنتتەگى «ازالا تەكستيل» سەرىكتەستىگىندە بولدى

استانا. 22 ءساۋىر. قازاقستان پرەزيدەنتى نۇرسۇلتان نازارباەۆ وڭتۇستىك قازاقستان وبلىسىنىڭ ورتالىعىنداعى «ازالا تەكستيل» جاۋاپكەرشىلىگى شەكتەۋلى سەرىكتەستىگىندە بولدى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى. ەلباسىعا نىساندا وڭىردەگى يندۋستريالىق دامۋ باعدارلاماسىنىڭ, «وڭتۇستىك» ارنايى ەكونوميكالىق ايماعىنداعى ينۆەستيتسيالىق باعدارلامانىڭ جۇزەگە اسىرىلۋ بارىسى مەن جەڭىل ونەركاسىپ نىساندارى قىزمەتىنىڭ نەگىزگى كورسەتكىشتەرى تۋرالى باياندالدى. قازاقستان پرەزيدەنتى فابريكا جۇمىسىمەن جانە وندا شىعارىلاتىن نەگىزگى ءونىم تۇرلەرىمەن تانىستى. كاسىپورىن ەڭبەككەرلەرىمەن اڭگىمە بارىسىندا نۇرسۇلتان نازارباەۆ ولارعا جەمىستى جۇمىس, كاسىبي جەتىستىكتەر تىلەدى. مەملەكەت باسشىسى ءوز ءوندىرىسىن دامىتىپ, يمپورتتىق تاۋارلار ورنىن الماستىرۋ – قازاقستاننىڭ ەكونوميكالىق ساياساتىنىڭ ماڭىزدى مىندەتىنىڭ ءبىرى ەكەنىنە نازار اۋداردى. ايتا كەتەيىك,«ازالا تەكستيل» جوباسى ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا  2012-2014 جىلدارى جۇزەگە اسىرىلدى. فابريكا دايىن ءونىم شىعارۋدىڭ شيكى ماقتا وسىرۋدەن ماتاعا دەيىنگى جابىق تسيكلىن جۇزەگە اسىرىپ, 600-گە جۋىق ادامدى جۇمىسپەن قامتاماسىز ەتىپ وتىر. تالعات رايىمبەك. دەرەك: akorda.kz. فوتو: inform.kz.