جامبىل وبلىسىندا 12 كوپپاتەرلى ءۇي پايدالانۋعا بەرىلدى

تاراز. 30  ناۋرىز. جالپى مەملەكەتتىك باعدارلامانى جۇزەگە اسىرۋ باستالعالى جامبىل وبلىسىندا 12 كوپپاتەرلى ءۇي پايدالانۋعا بەرىلدى. بۇل تۋرالى egemen.kz ءتىلشىسى حابارلادى. «قازاقستاننىڭ تۇرعىن ءۇي قۇرىلىس جيناق بانكى» اق جامبىل وبلىستىق فيليالىنىڭ ديرەكتورى ەۆگەني شارىگيننىڭ ايتۋىنشا, بانك وڭىرلەردى دامىتۋدىڭ 2020 جىلعا دەيىنگى مەملەكەتتىك باعدارلاماسىنىڭ «حالىقتىڭ بارلىق ساناتىنا ارنالعان تۇرعىن ءۇي» جانە «جاس وتباسىعا ارنالعان تۇرعىن ءۇي» وپەراتورى بولىپ تابىلادى. قتقجب تۇرعىن ءۇيدى ساتىپ الۋشى مەن جالعا الۋشىلاردىڭ پۋلدارىن قالىپتاستىرۋ جانە  كليەنتتىڭ تولەمقابىلەتتىلىگىن تەكسەرۋ جولدارىمەن تۇرعىن ۇيلەردى كونكۋرس نەگىزىندە  ءبولۋدى قاراستىرادى. مەملەكەتتىك باعدارلامانى جۇزەگە اسىرۋ باستالعاننان بەرى جامبىل وبلىسىندا 12 كوپپاتەرلى  ءۇي پايدالانۋعا بەرىلدى. سولاردىڭ قاتارىندا: «جاس وتباسىعا ارنالعان تۇرعىن ءۇي» باعىتى بويىنشا جالپى اۋدانى 23,7 مىڭ شارشى مەتر بولاتىن 390 پاتەرلى ء5ۇي مەن «حالىقتىڭ بارلىق ساناتىنا ارنالعان تۇرعىن ءۇي» باعىتى بويىنشا جالپى اۋدانى 31,6 مىڭ شارشى مەتر قۇرايتىن 399 پاتەرلى 7 تۇرعىن ءۇي پايدالانۋعا بەرىلدى. «2016 جىلى وڭىرلەردى دامىتۋدىڭ 2020 جىلعا دەيىنگى باعدارلاماسى اياسىندا «اراي» تۇرعىن ءۇي كەشەنىندە ورنالاسقان جالپى اۋدانى 6,179 مىڭ شارشى مەتر قۇرايتىن 80 پاتەرلى ءۇي قۇرىلىسىن اياقتاۋ جوسپارلانىپ وتىر. پۋلعا قاتىسۋ ءۇشىن ءوتىنىش بەرۋ بيىلعى جىلدىڭ 3 تامىزىندا باستالىپ, 3 قازانعا دەيىن جالعاسادى. سونىمەن قاتار, تۇرعىن ءۇيدىڭ باعاسى وزگەرىسسىز قالادى جانە 1 شارشى مەتر ءۇشىن 116 مىڭ تەڭگە بولادى», دەدى سپيكەر. ورالحان ءداۋىت. دەرەك, سۋرەت:egemen.kz