مەن نۇرسۇلتان ءابىش ۇلى نازارباەۆتىڭ بىلتىرعى 30 قاراشا كۇنگى «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» اتتى قازاقستان حالقىنا جولداۋىن ءۇلكەن قاناعاتتانعاندىق سەزىممەن تىڭداعان ەدىم. ەكى ساعاتقا جۋىق سوزىلعان پرەزيدەنتتىڭ ءسوزى ءاربىر كورەرمەننىڭ ساناسىن جاۋلاعان بولار. ءوزىم ەشنارسەگە الاڭداماستان, ەلباسىنىڭ ءاربىر سوزىنە ءمان بەردىم. «100 ناقتى قادام» ۇلت جوسپارىمەن توننىڭ ىشكى باۋىنداي قابىسىپ جاتىر ەكەن. ايتىلعان ماسەلەلەردىڭ ءبارى حالىق ءۇشىن, رەسپۋبليكانىڭ جاڭا تۋعان بالاسىنان ەڭكەيگەن كارىسىنە دەيىنگى تۇرعىنداردىڭ قامىن ويلاعان قامقورلىققا قالاي ءتانتى بولماسسىڭ.
جۇرەككە وتە جاقىن, جان-ءجۇيەڭدى باۋراپ ايتىلعان سوزدەرگە بۇكىل بولمىسىممەن ريزاشىلىق سەزىمىندە بولعانىم كۇنى كەشەگىدەي ەسىمدە. پرەزيدەنتتىڭ سونشاما لوگيكالىق تەرەڭدىكپەن بايانداعان جولداۋى قۇلاققا جاعىمدى جىرداي ەستىلگەنىن دە ۇمىتا الار ەمەسپىن. ەلباسىنىڭ شەشەندىگىنىڭ ءوزى ادامدى ەرىكسىز باۋراپ الاتىنىن قايتەرسىز.
كوپ ماسەلە قامتىلدى. مەن ءوز ءپىكىرىمدى ايتىلعان ءبىر جايعا عانا اۋدارماقپىن. پرەزيدەنتتىڭ كاسىپتىك وقۋ جونىندەگى ويلارى وتە تاماشا. كاسىپتىك-تەحنيكالىق كوللەدجدەردى كوبەيتۋدى قوزعاعانى جۇرت جۇرەگىندە ءجۇرگەن جايلار ەدى. مۇنى نۇرسۇلتان ءابىش ۇلى ءدوپ باستى.
مەن ءوز باسىم پەداگوگ رەتىندە ويلاپ-تولعانىپ ءجۇرگەن جايلارىم كوپ ەدى. سولاردىڭ ءبىرى – بارلىق جوعارى وقۋ ورىندارىندا قارجىگەرلەر مەن زاڭگەرلەردىڭ بارلىق ۋنيۆەرسيتەتتەردە, كوللەدجدەردە جاپپاي وقىتىلىپ كەلە جاتقانى. مىڭداعان قارجىگەر مەن زاڭگەر جۇمىستى قايدان تابادى, ءبارىنە جۇمىس جەتپەيدى عوي. ال جۇمىس جەتپەگەن سوڭ, بوس سالپاقتاپ جۇرەدى.
پرەزيدەنتتىڭ ايتقانىنداي, بارىنە جوعارى ءبىلىم جەتپەيدى. وقۋعا تۇسە المادىڭ با, بىردەن كوللەدجگە بارۋ كەرەكتىگى وتە ورىندى ايتىلدى. ولارعا وقۋدىڭ تەگىن بولاتىندىعى ءتىپتى جاقسى.
جوعارى بىلىمگە ۇمتىلعان جاستارىمىزدىڭ جۇمىسشى ماماندىعى بولماعاندىقتان, ءارتۇرلى جۇمىستاردى شەتەلدىكتەر اتقارۋدا. ەگەر ءبىزدىڭ جاستارىمىز كىرپىش قالاۋشى, اعاش شەبەرى, ەلەكترمەن دانەكەرلەۋشى, ەلەكترشى, شوفەر, تراكتورشى, بۇرعىشى, بوياۋشى-سىرلاۋشى, راديست, جول توسەۋشى, سلەسار, توكار جانە ت.ب. ماماندىقتاردى مەڭگەرسە, مۇرتتارىن بالتا شاپپاس ەدى. ءوزدەرىن ماتەريالدىق قامتاماسىز ەتۋگە, وتباسىن اسىراۋعا, قارت اتا-انالارىنا كومەكتەسۋگە زور ءمۇمكىندىگى بولار ەدى. ماسەلەنىڭ وسى جاعىنا وسى كەزدەن باسا ءمان بەرمەسەك بولمايدى. مەن جاستارعا مەكتەپتى 9-شى سىنىپپەن ءتامامداپ, كوللەدجگە ءتۇسۋدى ۇسىنىس ەتەر ەدىم. سەبەبى, كوللەدجدە دە ورتا ءبىلىم الىنادى. العان ماماندىعى وزىنە ولجا, جوعارى وقۋ ورنىنا ۇمتىلىس جاساي بەرۋگە دە بولادى. تۇسە الماسا, العان ماماندىعى بويىنشا جۇمىس ىستەيدى, دالادا قالمايدى. ءبىلىمىڭ, دايىندىعىڭ بولسا, جوعارى وقۋ ورنىنا ارقاشان ەسىك اشىق.
نۇرسۇلتان ءابىش ۇلىنىڭ ماماندىقتى يەلەنىپ, جۇمىسشى بولۋ ەڭ قۇرمەتتى, ارقاشان ابىروي اكەلەتىن ەڭبەك ەكەندىگىن ايتقانى وتە ورىندى. ويتكەنى, ەلباسىنىڭ ءوزى دە ەڭبەك جولىن قاراپايىم جۇمىسشىدان باستادى ەمەس پە؟! ەندەشە, كىم-كىمگە دە وسىلاي ءىستەۋگە بولادى. ايتپەسە, جۇمىسشى بولىپ قالساڭ نەسى ايىپ.
قادىر ءجۇسىپ,
ح.دوسمۇحامەدوۆ اتىنداعى
اتىراۋ مەملەكەتتىك ۋنيۆەرسيتەتىنىڭ پروفەسسورى.
اتىراۋ.
قادىر ءجۇسىپ,
ح.دوسمۇحامەدوۆ اتىنداعى
اتىراۋ مەملەكەتتىك ۋنيۆەرسيتەتىنىڭ پروفەسسورى.
اتىراۋ.
