تالاسسىز تازا ۇتىس

«استانا ارلاندارى» كاسىپقوي بوكس كلۋبى بۇكىلالەمدىك بوكس سەرياسىنىڭ التىنشى ماۋسىمداعى كەزەكتى جەكپە-جەگىن پەتروپاۆل قالاسىندا وتكىزىپ, مۇحيت اسىپ كەلگەن «Puerto-Rico Hurricanes» كومانداسىمەن قولعاپ ءتۇيىستىردى. بوكس دەسە, ىشكەن اسىن جەرگە قويا­تىن سولتۇستىكقازاقستاندىق جان­كۇيەر­لەردىڭ بۇل كۇندى تاعات­سىز­دانا كۇتكەنى سونشالىق, «جە­ڭىس» سپورت مەكتەبىنىڭ اتشاپ­تىرىم زالىندا تىزە بۇگەر ورىن تابىل­ماعاندىقتان, بىلعارى قولعاپ شەبەر­لەرىنىڭ شارشى الاڭداعى جان الىسىپ, جان بەرىسكەن ايقاسىن تۇرەگەپ تۇرىپ تاماشالاعانداردا ەسەپ بولمادى. ويىن باستالار الدىندا باق وكىلدەرىنە بەرگەن سۇحباتىندا كو­مان­دانىڭ باس ديرەكتورى, لوندون وليمپياداسىنىڭ چەمپيونى, بار­كەر كۋبوگىنىڭ يەگەرى سەرىك ساپيەۆ ماۋسىمارالىق ۇزىلىستە كو­ماندا قۇرامىنا وزگەرىستەر ەنگەنىن جەتكىزدى. باس باپكەرلىكتىڭ تىزگىنى رەسپۋبليكانىڭ ەڭبەك ءسىڭىر­گەن جاتتىقتىرۋشىسى نۇرلان اقۇرپەكوۆكە سەنىپ تاپسىرىلعان. وسىندا ەل نامىسىن ابىرويمەن قورعاپ جۇرگەن ۇلتتىق كومان­دانىڭ كوشباسشى بوكسشىلارى ريو-دە-جانەيرودا كۇتىپ تۇرعان وليمپياداعا تاس-ءتۇيىن دايىن­دىققا قىزۋ كىرىسكەندىكتەن, جاڭا قۇراماعا 30 بوكسشى قابىلدانىپ, بولاشاعىنان مول ءۇمىت كۇتتىرەتىن جاستارمەن تولىققان. استانالىقتاردىڭ شەشۋشى ايقاسقا تىڭعىلىقتى ازىرلىكپەن كەلگەنى بىردەن بايقالدى. ولاي دەي­تىنىمىز, 23 قاڭتاردا شى­مىل­­دىعى اشىلعان بايراقتى باسە­كەنىڭ العاشقى ويىنىندا كۇشتى كوماندالاردىڭ ءبىرى ازەر­­بايجاننىڭ «باكۋ وتتارىن» تىزە بۇكتىرگەنىمەن, دودادا ءبى­رىنشى رەت ونەر كورسەتكەن وزبەك اعايىن­دارعا ەسە جىبەرىپ العان. وسى جولى جەڭىسكە جەتسە, پلەي-وفف تۋرنيرىنە جولداما الماق. مىنە, شارشى الاڭعا 49 كيلو سالماق دارەجەسى بويىنشا ماردان بەرىكباەۆ پەن دجون ورتيس كوتەرىلىپ, جۇرتشىلىق تاعاتسىزدانا كۇتكەن مارتەبەلى ماتچتىڭ العاشقى جەكپە-جەگى باس­تالىپ كەتتى. قارسىلاسىنان بويى دا, قولى دا ۇزىنداۋ قازاقستاندىق وسى ارتىقشىلىعىن ءا دەگەننەن ۇتىمدى پايدالانىپ, سوققىلارىن ۇدەتتى. شابۋىلىن كۇتىپ الىپ تا, قورعانا ءجۇرىپ تە ۇپاي سانىن ەسەلەي ءتۇستى. ءسويتىپ, 3:0 ەسەبىمەن جەڭىسكە جەتتى. 56 كگ سالماقتاعى نۇرسۇلتان كوشەعۇلوۆ ەدگاردو وسكار رولون ۆارەلامەن قولعاپ تۇيىستىرگەندە, دەمىمىزدى ىشكە تارتقانبىز. تاپالتاق بويلى, مىعىم دەنەلى ونىڭ ۇرىمتال تۇس­تاردى ءمۇلت جىبەرمەيتىن شاپشاڭ قي­مىلىنان سەسكەنگەنبىز. بىرنەشە سوققىسىن دارىتىپ ۇلگەردى. الايدا, ەكىنشى راۋندتىڭ سوڭىندا نۇرسۇلتاننىڭ قاق ماڭدايعا تۋ­را­لاعان سوققىسى شارشى الاڭ­نىڭ قوجاسى كىم ەكەنىن تانىت­قانداي اسەر قالدىردى. پۋەر­توريكالىقتىڭ ودان ارعى ءحالى بەلگىلى بولدى. يانكارلوس ريۆەرا­نىڭ (64 كگ) كەلمەۋى سەبەپتى كوماندا كاپيتانى سامات باشەنوۆتىڭ ەنشىسىنە ءبىر ۇپاي بۇيىردى. ال ءابىلحان امانقۇل (75 كگ) راۋل سانچەس مارتەنى بۇرىش-بۇرىشقا قۋىپ ءجۇرىپ سابادى دەسەك, ارتىق ايتقاندىق بولماس. بۇدان كەيىن ەركىن مۇحامەدجاننىڭ (91 كگ)  رينگ­كە شىعۋىنان ءتۇسۋى جىلدام بولدى. ونىڭ اتان تۇيەنى جالپ ەتكىزەتىندەي كۇرزى سوققىسى يۆان حوەل روسادو توررەستىڭ تال­ماۋ جەرىنە ءدوپ ءتيدى. تورەشى ەسەپ اشتى. ورنىنان سۇيرەتىلە تۇ­رىپ, جۇدىرىقتاسۋدى جالعاس­تىر­عان­مەن, تاعى ءبىر اۋىر سوققى­دان كەيىن تەحنيكالىق نوكاۋت جازىلدى. «Puerto-Rico Hurricanes» كومان­داسىنىڭ باپكەرى مانۋەل پابون بىلتىر تۋرنير كەستەسىندە جەتىنشى ورىن العان جەتىستىگىنە توقتالا كەلىپ, ارلاندىقتاردىڭ تالاسسىز تازا جەڭىسكە جەتكەنىن مويىندادى. ماتچتىڭ ۇيىمداستىرىلۋىنا جوعارى باعا بەردى. سايدىڭ تاسىنداي ىرىكتەلگەن وعلاندارىمىز باپكەرلەردىڭ العا قويعان تاپسىرماسىن مۇلتىكسىز ورىنداپ, تاماشا ويىن ورنەگىن كورسەتە ءبىلدى. بۇل, ءبىر جاعىنان 2 ساۋىردە وسكەمەندە وزبەكستاننىڭ «Uzbek Tigers» كومانداسىنا قارسى وتكىزىلەتىن جارىس الدىنداعى شىڭدالۋ شىڭى بولعانى انىق. ءومىر ەسقالي, «ەگەمەن قازاقستان». سولتۇستىك قازاقستان وبلىسى. سۋرەتتى تۇسىرگەن تالعات تانىباەۆ