اۆياتسيالىق وقيعالاردىڭ الدىن الۋ قاجەت

كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ «بەك ەير» اۋە كومپانياسى ۇشاعىنا قاتىستى استانا اۋەجايىندا ورىن العان وقيعا بويىنشا كەڭەس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى. كەڭەس جۇمىسىنا ينۆەستي­تسيا­لار جانە دامۋ مينيسترلىگىنىڭ, باس كولىك پروكۋراتۋراسىنىڭ, ءىىم, ۇقك وكىلدەرى قاتىستى. ينۆەستيتسيالار جانە دامۋ مي­نيسترلىگى دايىنداۋشى-زاۋىت وكىل­دەرى مەن تاۋەلسىز ساراپشىلاردى شاقىرا وتىرىپ, وقيعانى تەرگەۋ بويىنشا ارنايى كوميسسيا قۇردى. كەڭەس قورىتىندىسى بويىنشا باقىتجان ساعىنتاەۆ مۇنداي اۆيا­تسيالىق وقيعالاردىڭ الدىن الۋ بويىنشا پروفيلاكتيكالىق شارا­لار قابىلداۋدى تاپسىردى. ازاماتتىق اۆياتسيا كوميتەتىنە مۇددەلى مەملەكەتتىك ورگاندارمەن بىرلەسىپ, «بەك ەير» اق-تاعى ۇشۋ قاۋىپسىزدىگى دەڭگەيىن ارتتىرۋ بو­يىنشا ءىس-شارالار جوسپارىن ازىرلەۋ تاپسىرىلدى. ونىڭ سىرتىندا 29 ناۋرىزدان اۋە تاسىمالداۋشىلار قىزمەتىن جوسپاردان تىس ينسپەكتسيالىق تەكسەرۋ باستالادى. كەڭەس بارىسىندا, «بەك ەير» اق-تىڭ باسقارما توراعاسى نۇر­لان جۇماسۇلتانوۆ اۋە كومپانيا­سى­نىڭ تاياۋ ۋاقىتتاردا IOSA حالىق­ارالىق اۆياتسيالىق اۋديتتەن وتۋگە كىرىسەتىنىن حابارلادى. 2016 جىلدىڭ 27 ناۋرىزىندا 10 ساعات 36 مينۋتتا استانا اۋە­جاي­ىندا «قىزىلوردا-استا­نا» باعىتى بويىنشا №2041 رەيسىن ورىنداعان «بەك ەير» اۋە كومپا­نيا­­سىنىڭ «فوككەر-100» ماركالى اۋە كەمەسى اپاتتى جاعدايدا قون­دى. بورتىندا 121 ادام بولدى, ولار­دىڭ 116-سى جولاۋشى دا, 5-ەۋى ەكي­پاج مۇشەلەرى. قۇربان بول­عان­دار مەن زارداپ شەككەندەر جوق. وقي­عانىڭ الدىن الا سەبەبى ۇشاق­تىڭ الدىڭعى ءشاسسيىنىڭ شىقپاي قالۋى بولىپ تابىلادى.