پەتروپاۆل. 28 ناۋرىز. «استانا ارلاندارى» كاسىپقوي بوكس كلۋبى بۇكىلالەمدىك بوكس سەرياسىنىڭ التىنشى ماۋسىمداعى كەزەكتى جەكپە-جەگىن پەتروپاۆل قالاسىندا وتكىزىپ, مۇحيت اسىپ كەلگەن Puerto-Rico Hurricanes كومانداسىمەن قولعاپ ءتۇيىستىردى. بۇل تۋرالى وبلىستىق دەنە شىنىقتىرۋ جانە سپورت باسقارماسىنا سىلتەمە جاساعان egemen.kz ءتىلشىسى حابارلادى.
باق وكىلدەرىنە بەرگەن سۇحباتىندا كوماندانىڭ باس ديرەكتورى, لوندون وليمپياداسىنىڭ چەمپيونى, باركەر كۋبوگىنىڭ يەگەرى سەرىك ساپيەۆ ماۋسىمارالىق ۇزىلىستە كوماندا قۇرامىنا وزگەرىستەر ەنگەنىن جەتكىزدى. باس باپكەرلىكتىڭ تىزگىنى رەسپۋبليكانىڭ ەڭبەك سىڭىرگەن جاتتىقتىرۋشىسى نۇرلان اقۇرپەكوۆكە سەنىپ تاپسىرىلعان. وسىندا ەل نامىسىن ابىرويمەن قورعاپ جۇرگەن ۇلتتىق كوماندانىڭ كوشباسشى بوكسشىلارى ريو-دە جانەيرودا كۇتىپ تۇرعان وليمپياداعا تاس-ءتۇيىن دايىندىققا قىزۋ كىرىسكەندىكتەن, جاڭا قۇراماعا 30 بوكسشى قابىلدانىپ, بولاشاعىنان مول ءۇمىت كۇتتىرەتىن جاستارمەن تولىققان. 2010 جىلى العاش رەت تۇساۋى كەسىلگەن جوباعا بيىل بىرقاتار تۇزەتۋلەر جاسالىپتى. اتاپ ايتقاندا, بۇكىلالەمدىك بوكس سەرياسى اياسىندا جارىسقا قاتىسۋعا نيەت بىلدىرگەن 16 كوماندا ءتورت توپتا كۇش سىناسادى. ەرەجە بويىنشا ءار توپتان سۋىرىلىپ شىققان ەكى كوماندا جارىستىڭ شيرەك فينالىنا قوسىلادى. توپتىق باسەكەنىڭ جەكپە-جەكتەرى اينالمالى جۇيەمەن وتەدى. قازاقستان, وزبەكستان, ازەربايجان جانە پۋەرتو-ريكا كوماندالارى «د» توبىندا جۇدىرىقتاسادى.
بايراقتى باسەكەنىڭ اشىلۋ سالتاناتىندا ايماق باسشىسى ەرىك سۇلتانوۆ ءسوز سويلەپ, قادىرلى مەيماندار مەن جينالعانداردى ايتۋلى سپورت مەرەكەسىنىڭ باستالۋىمەن قۇتتىقتادى. جەرلەستەرىمىزگە جارقىن جەڭىس تىلەدى.
اتالعان بوكس سەرياسىنىڭ ەكى مارتە جەڭىمپازى استانالىقتاردىڭ شەشۋشى ايقاسقا تىڭعىلىقتى ازىرلىكپەن كەلگەنى بىردەن بايقالدى. ولاي دەيتىنىمىز, 23 قاڭتاردا شىمىلدىعى اشىلعان بايراقتى باسەكەنىڭ العاشقى ويىنىندا كۇشتى كوماندالاردىڭ ءبىرى ازەربايجاننىڭ «باكۋ وتتارىن» تىزە بۇكتىرگەنمەن, دودادا ءبىرىنشى رەت ونەر كورسەتكەن وزبەك قۇراماسىنا ەسە جىبەرىپ العان بولاتىن. وسى جولى جەڭىسكە جەتسە, پلەي-وفف تۋرنيرىنە جولداما الماق.
شارشى الاڭعا ءبىرىنشى بولىپ 49 سالماق دارەجەسى بويىنشا ماردان بەرىكباەۆ پەن دجون ورتيس كوتەرىلدى. قارسىلاسىنان بويى دا, قولى دا ۇزىنداۋ قازاقستاندىق وسى ارتىقشىلىعىن پايدالانىپ, 3:0 ەسەبىمەن جەڭىسكە جەتتى. ەدگاردو وسكار رولون ۆارەلامەن (56 كگ.) قولعاپ تۇيىستىرگەن نۇرسۇلتان كوشەعۇلوۆ ايقىن باسىمدىق تانىتتى. يانكارلوس ريۆەرانىڭ (64 كگ.) كەلمەۋى سەبەپتى كوماندا كاپيتانى سامات باشەنوۆتىڭ ەنشىسىنە ءبىر ۇپاي بۇيىردى. ءابىلحان امانقۇل (75 كگ.) راۋل سانچەس مارتەنىڭ وسال تۇسىن تاپتى. ەركىن مۇحامەدجاننىڭ (91 كگ.) اتان تۇيەنى جالپ ەتكىزەتىندەي كۇرزى سوققىسى يۆان حوەل روسادو توررەستى ەكى رەت نوكداۋنعا ءتۇسىرىپ, ويىن توقتاتىلدى.
جالپى ەسەپ 5:0 بولىپ, ارلاندىقتاردىڭ پايداسىنا شەشىلدى.
كەزەكتى جەكپە-جەك 2 ساۋىردە وسكەمەندە وزبەكستاننىڭ Uzbek Tigers كومانداسىنا قارسى وتەدى.
ءومىر ەسقالي.
دەرەك, فوتو: وبلىستىق دەنە شىنىقتىرۋ جانە سپورت باسقارماسى.
