كەشە قازاقستان رەسپۋبليكاسى ۇلتتىق ۇلانى 5573-اسكەري ءبولىمىنىڭ مادەني ورتالىعىندا ۇلى وتان سوعىسىنداعى ۇمىتىلماس ەرلىكتى ۇلىقتاۋعا ارنالعان ۇلاعاتتى ءىس-شارا ءوتتى.
ەل باسىنا ەكىتالاي كۇن تۋعاندا قولىنا قارۋ الىپ, وتانىن قورعاعان مايدانگەرلەر, تىلدا تىنىم تاپپاعان ەڭبەك ارداگەرلەرى, ءبۇگىندە ازاماتتىق بورىشىن وتەپ جۇرگەن ورىمدەي ساربازدار, سونداي-اق, مەكتەپ وقۋشىلارى تاۋەلسىزدىگىمىزدىڭ 25 جىلدىعىنا وراي ۇيىمداستىرىلعان «بىزگە داڭق پەن تاعزىم مۇراعا قالعان!» اكتسياسى اياسىندا پرەزيدەنت تەلەارديو كەشەنى تۇسىرگەن «وتان ءۇشىن وتقا تۇسكەندەر» جانە «جەڭىستى جاقىنداتقاندار» اتتى دەرەكتى فيلمدەردى تاماشالادى.
اسپان استى, جەر ۇستىندە ادامزات جارالعالى بۇرىن-سوڭدى بولىپ كورمەگەن بۇل قان-قاساپ قىرعىندا ەجەلدەن ەر تۋعان قازاقتار قاھارماندىقتىڭ نەبىر قايتالانباس ۇلگىسىن كورسەتكەنى بەلگىلى. سونىڭ ناتيجەسىندە 500-دەن استام جەرلەسىمىز كەڭەس وداعىنىڭ باتىرى اتاندى.
اتتارى اڭىزعا اينالعان باۋىرجان مومىش ۇلى, تالعات بيگەلدينوۆ, قاسىم قايسەنوۆ, راقىمجان قوشقارباەۆ, ساعادات نۇرماعامبەتوۆ, مانشۇك مامەتوۆا, ءاليا مولداعۇلوۆا, حيۋاز دوسپانوۆا سەكىلدى ۇلتىمىزدىڭ ماڭدايعا باسىپ, ماقتان تۇتار ۇل-قىزدارى تۋرالى تاعىلىمدى سىر شەرتەر تاريحي تاسپالاردى كورگەندە كوزىمىزگە ەرىكسىز جاس كەلگەنىن جاسىرمايمىز. اسىرەسە, ستالينگراد سويقانىندا, حاركوۆ تۇبىندە, رجەۆ – ۆيازماداعى «اجال ايماعىندا» قىرشىندارىنان قيىلعان قانداستارىمىزدىڭ ايانىشتى تاعدىرى ايتىلعان تۇستاردا قابىرعاڭ قايىسا قامىقپاۋ مۇمكىن ەمەس. ەڭ سوراقىسى سول, رجەۆ ءتۇبىندەگى سۇراپىل ۇرىستاردان ءتىرى قالعان سولداتتاردىڭ اۋزىنا قاقپاق قويىلىپ, اقيقاتتى ايتۋعا تىيىم سالىنعان كورىنەدى. اقمولادا جاساقتالىپ, اتار مىلتىقتىڭ ازدىعىنان جاۋعا جالاڭ قىلىشپەن شاپقان اتتى اسكەر ديۆيزياسىنىڭ باقايشاعىنا دەيىن قارۋلانعان فاشيست باسقىنشىلارىنا شىداس بەرە الماي, شىبىنداي قىرىلعانى ازداي, ولار جايىندا شىندىقتىڭ بەتى كۇنى كەشەگە دەيىن بۇركەمەلەنىپ كەلگەنىن قايتەرسىڭ. ەرلىكپەن قازا تاپقان بوزداقتاردىڭ وتباسىنا جىبەرىلگەن «قارا قاعازدا» بۇرمالانعان مالىمەت بەرىلدى. اڭىراعان انالار مەن جىلاعان جەسىرلەر ارىستارىن امالسىز ءىز-ءتۇزسىز كەتكەندەردىڭ قاتارىنا قوسىپ, «كەبەنەك كيگەن كەلەدى» دەگەن اقتالماس ۇمىتكە الدانۋمەن انا دۇنيەگە اتتاندى.
كورەرمەن كوزايىمىنا اينالعان كينوتۋىندىلاردا حالقىمىزدىڭ باۋىرجان, قاسىم, راقىمجان سىندى تۇلپار ءمىنىپ, تۋ ۇستاعان تۇلعالارىنىڭ كەزىندە باعالانباعان باتىرلىعى, ەلەنبەگەن ەرلىگى بايىبىنا بارا باياندالادى. ءبىر ايتا كەتەرلىگى, بەرليندەگى ساتىمەن اياقتالعان ءبىر اسكەري وپەراتسيا ءۇشىن ءبارىمىز بىلەتىن ساعادات نۇرماعامبەتوۆ ەكىنشى مارتە كەڭەس وداعىنىڭ باتىرى اتاعىنا ۇسىنىلعان ەكەن. بىراق, كەڭەستىك ارميانىڭ كەۋدەمسوق كومانديرلەرى مۇنداي جوعارى مارتەبەنى قاراكوز جىگىتكە قيماعان سىڭايلى.
قازاقتىڭ كورگەن قياناتى جالعىز بۇلار عانا ەمەس. ايتىپ تاۋىسا المايسىڭ, ءبارىن سانامالاي بەرسەڭ. ەگەمەن ەلمىز عوي, وتكەن وكىنىشتەردىڭ ەسەسى ەندى تولار.
القالى جيىننىڭ اياعىندا بۇعان دەيىن رەسەيدە, ۋكراينادا قازاقستاننىڭ ەلشىسى بولىپ تۇرعانىندا يگى يدەيالارىمەن وسىناۋ فيلمدەردىڭ تۋىنا تىكەلەي سەبەپكەر بولعان قازىرگى «نۇر وتان» پارتياسىنىڭ حاتشىسى زاۋىتبەك تۇرىسبەكوۆ سالماقتى ءسوز ساباقتاپ, ەلباسىنىڭ ءتول تاريحىمىزدىڭ ءتورت قۇبىلاسىن تۇگەندەۋ باعىتىنداعى يگى باستامالارىن جۇزەگە اسىرۋ ماقساتىندا بىلەك سىبانا جۇمىسقا كىرىسكەنىن العا تارتا وتىرىپ, رەسەيدىڭ پودولسك قالاسىنداعى اتاقتى ءاسكەري ءارحيۆتى اقتارۋ بارىسىندا ءوزدەرىنىڭ وتە قۇندى دەرەكتەر مەن دايەكتەرگە قول جەتكىزگەندەرىن, ونىڭ ءبىرسىپىراسى مىنا كينولاردا كورىنىس تاپقانىن اتاپ ءوتتى. بۇل رەتتە ەلشىلىك قىزمەتكەرلەرىنىڭ ەكىنشى دۇنيەجۇزىلىك سوعىستاعى قازاقستاندىقتار ەرلىگىن ەستە قالدىرۋعا قوماقتى ۇلەس قوسقاندارىنا قىسقاشا توقتالىپ, جالىندى جىلدار وقيعالارىن قايتا جاڭعىرتۋ ارقاسىندا قازىرگى جاستارىمىزدى اعا ۇرپاق داڭقىنا ساي تاربيەلەۋگە مۇمكىندىك تۋاتىنىن جەتكىزدى.
ال ۇلتتىق ۇلاننىڭ باس قولباسشىسى, گەنەرال-لەيتەنانت رۋسلان جاقسىلىقوۆ مۇنداي ماڭىزدى اكتسيانىڭ كەيىنگى تولقىن وكىلدەرىن, ونىڭ ىشىندە وتان الدىنداعى پارىزىن اتقارۋشى بوزبالالاردىڭ بويىنداعى پاتريوتتىق سەزىمدى بارىنشا ۇشتاۋعا قىزمەت ەتەتىنىنە ەكپىن ءتۇسىرىپ, شاپاعاتى مول شاراعا قاتىسۋشىلارعا رياسىز ريزاشىلىعىن ءبىلدىردى.
تالعات باتىرحان,
«ەگەمەن قازاقستان».
