كوركەمسوز وقۋ شەبەرلەرى انىقتالدى

تاراز. 24 ناۋرىز. جامبىل وبلىستىق تىلدەردى دامىتۋ باسقارماسىنىڭ ۇيىمداستىرۋىمەن «ورالحان بوكەي اتىنداعى كوركەمسوز وقۋ شەبەرلەرى» وبلىستىق بايقاۋى  وتكىزىلدى. بۇل تۋرالى egemen.kz ءتىلشىسى حابارلادى. بايقاۋعا اۋداندار مەن تاراز قالاسىندا وتكەن ىرىكتەۋ كەزەڭدەرىنىڭ جەڭىمپازدارى اتانعان 16-22 جاس ارالىعىنداعى 11 ۇمىتكەر قاتىسىپ, باقتارىن سىنادى. وبلىستىق بايقاۋ قورداي اۋدانىندا ءوتتى. اۋداندار مەن تاراز قالاسىنان ىرىكتەلىپ كەلگەن ونەرپازدار بايقاۋدىڭ شارتى بويىنشا الدىمەن پروزالىق, درامالىق جانرلار جانە مانەرلەپ وقۋ كەزەڭدەرى  بويىنشا جارىسقا ءتۇستى. بارلىق ۇمىتكەرلەردىڭ بايقاۋعا ەرەكشە دايىندىقپەن كەلگەندىكتەرىن اتاپ وتكەن ءجون. وبلىستىق بايقاۋعا ەلوردامىز استانا قالاسىنان ورالحان بوكەيدىڭ قارىنداسى, قازاقستان رەسپۋبليكاسى ۇلتتىق اكادەميالىق كىتاپحاناسىنىڭ وقىرماندارعا قىزمەت كورسەتۋ جونىندەگى ورىنباسارى عاليا يساقانوۆا ارنايى كەلىپ قاتىستى. وبلىستىق بايقاۋ ورالحان بوكەيدىڭ شىعارمالارىنان الىنعان كومپوزيتسيامەن اشىلدى. العاشقى سىندا قاتىسۋشىلار و.بوكەيدىڭ «قايداسىڭ قاسقا ق ۇلىنىم؟», «اپامنىڭ استاۋى», «ءوز وتىڭدى وشىرمە» ت.ب. شىعارمالارىنان  ءۇزىندىنى جاتقا وقىدى. قاتىسۋشىلار «مۇزتاۋدىڭ مۇزبالاعى» اتانعان, قازاق ادەبيەتىنىڭ كوركەمسوز ونەرىندە ەرەكشە ورىن العان جازۋشىنىڭ شىعارمالارىنا دەگەن قىزىعۋشىلىقتارىن  كورسەتە ءبىلدى. پوەزيا جانرى بويىنشا م.ماقاتاەۆ, ف.وڭعارسىنوۆا, ت.ايبەرگەنوۆ, م.شاحانوۆ ولەڭدەرىن مانەرلەپ, ناقىشىنا كەلتىرە ورىندادى. ال درامالىق نوميناتسيادا شىعارما تاڭداۋعا شەك قويىلماعاندىقتان, ۇمىتكەرلەر م.اۋەزوۆ, ت.احتانوۆ, ع.مۇسىرەپوۆ تۋىندىلارىن ارقاۋ ەتىپ, اكتەرلىق شەبەرلىكتەرىن بارىنشا كورسەتۋگە تىرىستى. بايقاۋ قورىتىندىسى بويىنشا باس جۇلدەنى تاراز قالاسى, اباي اتىنداعى جامبىل گۋمانيتارلىق كوللەدجىنىڭ ستۋدەنتى ءاشىمجان جانىبەك, ءبىرىنشى جۇلدەلى ورىندى شۋلىق بوداۋبەك ايكۇن, ەكىنشى ورىندى جامبىل اۋدانىنان باقىت ۇلى ورىنباسار, ءۇشىنشى ورىندى ت.رىسقۇلوۆ اۋدانىنىڭ ۇمىتكەرى قوجابەرگەن ارۋجان يەلەندى. سونىمەن قاتار, ءار جانر بويىنشا دا ۇمىتكەرلەر نوميناتسيالارمەن ماراپاتتالدى. «پروزا وقۋ ۇزدىگى» نوميناتسياسىندا مويىنقۇمدىق مەلدەش ايگەرىم ۇزدىك اتانسا, درامالىق شىعارمالاردى ورىنداۋداعى شەبەرلىگى ءۇشىن تالاستىق سەيدالى شاپاعاتتىڭ جانە «مانەرلەپ وقۋ شەبەرى» نوميناتسياسى مەركىلىك ىنتىقباي ۆەنەرانىڭ ورىنداۋىندا بولدى. بارلىق قاتىسۋشىلار ۇيىمداستىرۋشىلار تاراپىنان ديپلومدار مەن باعالى سىيلىقتارعا يە بولدى. ورالحان ءداۋىت. دەرەك, سۋرەت: egemen.kz