پارلامەنت ءماجىلىسىنىڭ جاڭا توراعاسى سايلاندى

استانا. 25 ناۋرىز. پارلامەنتى ءماجىلىسىنىڭ توراعاسى بولىپ باقتىقوجا ىزمۇحامبەتوۆ سايلاندى. بۇل تۋرالى inform.kz-كە سىلتەمە جاساعان egemen.kz ءتىلشىسى حابارلادى. پارلامەنتتىڭ جالپى وتىرىسىندا دەپۋتات نۇرلان ءابدىروۆ ءماجىلىس توراعالىعىنا باقتىقوجا ىزمۇحامبەتوۆتى ۇسىندى. تالقىلاۋ بارىسىندا دەپۋتاتتار ۇسىنىلعان كانديداتتى قولداپ داۋىس بەرۋدە ءبىراۋىزدان ماقۇلدادى. باقتىقوجا سالاحاتدين ۇلى ىزمۇحامبەتوۆ – 1948 جىلى گۋرەۆ وبلىسى (قازىرگى اتىراۋ وبلىسى), تەڭىز اۋدانىندا تۋعان. ۋفا مۇناي ينستيتۋتىن بىتىرگەن. تەحنيكا عىلىمدارىنىڭ دوكتورى. 1971-1991 جىلدارى «ەمبى مۇناي» بىرلەستىگىنىڭ پرورۆا بۇرعىلاۋ كونتورىندا, «قازمۇنايگازبارلاۋ» باسقارماسىندا, قازاق گەولوگيالىق بارلاۋ عىلىمي-زەرتتەۋ مۇناي ينستيتۋتىندا, شەتەلدىك ءىسساپاردا كەڭەس مۇناي بارلاۋ ەكسپەديتسياسىندا جۇمىس ىستەدى. 1991-1992 جىلدارى قازاقستان رەسپۋبليكاسىنىڭ گەولوگيا جانە جەر قويناۋىن قورعاۋ مينيسترلىگىنىڭ ءبولىم باستىعى لاۋازىمىن اتقاردى. 1992-1993 جىلدارى گەولوگيا جانە جەر قويناۋىن قورعاۋ مينيسترلىگىنىڭ مۇناي جانە گاز باسقارماسىنىڭ باستىعى بولعان. 1993 جانە 2003 جىلدار ارالىعىندا – «قازاقتۇرىكمۇناي» بىرلەسكەن كاسىپورنىنىڭ باس ديرەكتورى, «قازمۇنايگاز» ۇلتتىق كومپانياسى جابىق اكتسيونەرلىك قوعامىنىڭ ۇلەستەردى باقىلاۋ جونىندەگى اتقارۋشى ديرەكتورى, «قازمۇنايتەڭىز» تەڭىز مۇناي كومپانياسىنىڭ باس ديرەكتورى, «قازمۇنايگاز» ۇلتتىق كومپانياسى جابىق اكتسيونەرلىك قوعامى بىرىككەن كاسىپورنى ۇلەستەردى باسقارۋ جونىندەگى باسقارۋشى ديرەكتورى لاۋازىمدارىن اتقاردى. 2003 جىلدىڭ جەلتوقسانىنان 2006 جىل ارالىعىندا – ەنەرگەتيكا جانە مينەرالدىق رەسۋرستار ءبىرىنشى ۆيتسە-ءمينيسترى. 2006-2007 جىلدارى – ەنەرگەتيكا جانە مينەرالدىق رەسۋرستار ءمينيسترى. 2007-2012 جىلدار ارالىعىندا – باتىس قازاقستان وبلىسىنىڭ اكىمى. 2012 جىلى پارلامەنت ءماجىلىسىنىڭ V شاقىرىلىمىنىڭ دەپۋتاتى, پارلامەنت ءماجىلىسى توراعاسىنىڭ ورىنباسارى. ايتا كەتەيىك, بۇعان دەيىن باقتىقوجا ىزمۇحامبەتوۆ اتىراۋ وبلىسىنىڭ اكىمى قىزمەتىن اتقارعان. تالعات رايىمبەك. دەرەك: inform.kz. سۋرەت: egemen.kz.