فرانتسيادا ءىرى جول اپاتىنان 12 ادام قازا تاپتى

استانا. 25 ناۋرىز. فرانتسيانىڭ الە دەپارتامەنتىندە بەيسەنبىدەن جۇماعا قاراعان ءتۇنى جول اپاتىنان 12 ادام قازا تاپتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. وقيعا مۋلەن قالاسى مەن مونبەني كوممۋناسىنىڭ اراسىندا بولدى. La Montagne باسىلىمىنىڭ حابارلاۋىنشا, ميكرواۆتوبۋس پەن جۇك كولىگى سوقتىعىسىپ قالعان. مەرت بولعانداردىڭ باسىم بولىگى پورتۋگاليالىقتار. «پورتۋگاليالىقتار مىنگەن ميكرواۆتوبۋس شۆەيتساريادان ءوز ەلدەرىنە كەلە جاتقاندا جۇك كولىگىنە سوقتىعىستى. قازا تاپقانداردىڭ اراسىندا ءبۇلدىرشىن بار», – دەپ اتالعان باسىلىم حابارلادى. ميكرواۆتوبۋس جۇرگىزۋشىسى اۋىر جاراقات الىپ, اۋرۋحاناعا جەتكىزىلدى. ال جۇك كولىگىندەگى ەكى ادام جەڭىل جاراقاتپەن امان قالدى. ولاردىڭ ايتۋىنشا, اۆتوبۋس قارسى بەتكە شىعىپ كەتكەن. قازىرگى كەزدە پوليتسيا قىزمەتكەرلەرى اپات ورنىندا تەرگەۋ امالدارىن جۇرگىزىپ جاتىر. ايان ءابدۋالي. دەرەك: تاسس. سۋرەت: ntv.ru.