موڭعوليانىڭ بايان-ولگەي ايماعىندا ەرتەدەن تۇرىپ جاتقان قازاقتار قاۋىمى كوپ جىلداردان بەرى شىعىس حالىقتارىنىڭ جىل باسى – ناۋرىز مەرەكەسىن تويلاپ تۇرۋدى باياعىدان بەرىك داستۇرگە اينالدىرعان. بۇل ءۇردىس, اسىرەسە, ولاردىڭ تاريحي وتاندارى – قازاقستان جەرىندە كوكتەم مەيرامىنىڭ مەملەكەتتىك دەڭگەيدە اتالىپ وتە باستاعان شاعىنان باستاپ, مۇندا دا كەڭ ەتەك الدى.
موڭعوليا قازاقتارى قانشا جىلداردان بەرى بۇل مەرەكەنى جەرگىلىكتى موڭعولدارمەن بىرلەسە تويلاپ كەلەدى. قازاقتار بۇل كۇندى: « ۇلىستىڭ ۇلى كۇنى», دەپ ءاسپەتتەسە, موڭعولدار: «ارد ءتۇمني اگۋ ءودور», دەپ قۇرمەت تۇتادى.
بۇرناعى كۇنى قانداستارىمىزدىڭ ناۋرىز مەرەكەسىن تويلاۋىنىڭ ەڭ شارىقتاۋ شەگى ەلدىڭ استاناسى – ۋلان-باتور قالاسىنداعى شىڭعىس حان الاڭىندا كەرۋەن جايدى. مۇندا جاعالاي تىگىلگەن كيىز ۇيلەردىڭ بارىندە مول داستارقان جايىلىپ, قازاقتىڭ ۇلتتىق تاعامدارىنىڭ بارلىق دەرلىك تۇرلەرى توردەن ورىن الدى. ال مۋزىكا ويناپ تۇرعان الاڭدا قازاقتىڭ ۇلتتىق كيىم كيگەن ۇل-قىزدارى اينالانىڭ ءسانىن كەلتىرىپ ءجۇردى. مۇندا بي بيلەنىپ, ءان سالىندى, الۋان ءتۇرلى سپورتتىق سايىستار كورىك قىزدىردى. البەتتە, كەلگەندەردىڭ ءبارى 7 ءتۇرلى دامنەن جاسالعان ناۋرىز كوجەدەن ءدام تاتىپ كوردى.
موڭعوليا پرەزيدەنتى ەلبەگدورجدىڭ ايتقانىنداي, بۇل كۇنى: «ناۋرىز موڭعول حالقىنىڭ دا قىمبات قازىناسى بولىپ تابىلاتىن مەرەكەگە اينالدى».
مۇرات ايتقوجا.
