كەمتار جاندارعا قولۇشىن بەرەتىن ەل – باقىتتى ەل

مۇمكىندىگى شەكتەۋلى ازاماتتارعا كوبىرەك كوڭىل ءبولىنىپ, قامقورلىق كورسەتىلۋگە ءتيىس. بۇل – ءبارىمىزدىڭ قوعام الدىنداعى پارىزىمىز. ۇلى بابامىز ءال-فارابيدەن «قاي ەلدى باقىتتى دەپ ايتامىز؟» دەپ سۇراعاندا «قايىرشىسى جوق, كەمتار جاندارعا قولۇشىن بەرەتىن ەل باقىتتى» دەگەن ەكەن. مەملەكەت باسشىسى نۇرسۇلتان نازارباەۆ «قازاقستان جولى-2050: ءبىر ماقسات, ءبىر مۇددە, ءبىر بولاشاق» اتتى جولداۋىندا: «مۇمكىندىگى شەكتەۋلى ادامدار تۇرمىستىق قىزمەت كورسەتۋ, تاعام ونەركاسىبى, اۋىل شارۋاشىلىعى كاسىپورىندارىندا جۇمىس ىستەي الادى. مەن بارلىق كاسىپكەرلەرگە ولاردى جۇمىسقا ورنالاستىرۋعا كومەكتەسىڭىزدەر دەپ تاعى دا ايتقىم كەلەدى», دەگەن تاپسىرما بەرگەن بولاتىن. ەلباسىنىڭ بەس حالىقتىق رەفورماسىنىڭ 84 قادامىنداعى «الەۋمەتتىك كومەكتى ونىڭ اتاۋلى سيپاتىن كۇشەيتە وتىرىپ وڭتايلاندىرۋ» دەگەن جولدار بارىمىزگە ۇلكەن مىندەت جۇكتەيدى. پرەزيدەنت تاپسىرماسىنا سايكەس ەلى­مىزدە مۇمكىندىگى شەكتەۋلى ازاماتتارعا اۋىز تولتىرىپ ايتارلىقتاي قامقورلىقتار جاسالۋدا. بۇرىن ءبىزدىڭ وبلىسىمىزدا جۇيكە اۋرۋلارىنا شالدىققان ازاماتتار ەسكى عيماراتتا, تار بولمەلەردە سىعىلىسىپ تۇ­راتىن. مەملەكەت باسشىسىنىڭ تاپسىرماسىمەن, ۇكىمەتتىڭ قولداۋىمەن جانە وبلىس باسشىلارىنىڭ بەلسەندىلىگىمەن تارازدا وسىدان ەكى جىل بۇرىن جاڭا جۇيكە اۋرۋلارى ينتەرنات ءۇيىنىڭ قۇرىلىسى قولعا الىنىپ, ول بيىل جىل باسىندا ىسكە قوسىلدى. زاماناۋي ۇلگىدەگى 300 ءتو­سەكتىك عيمارات قۇرىلىسىنا 3 ميلليارد تەڭ­گە جۇمسالدى. كەڭ دە جارىق عيماراتتا اۋ­رۋ­­لاردىڭ قولايلى ءومىر ءسۇرىپ, قالاعان ىستەرىمەن اينالىسۋىنا بارلىق جاعداي جاسالعان. قىزمەت الۋشىلاردىڭ جاعدايىن جاق­سارتۋعا, ولاردى قوعامعا تارتۋعا, الەۋمەتتىك سالادا پسيحولوگ, الەۋمەتتىك قىزمەت كور­سەتۋ ماماندارى, مۇعالىم-دەفەكتولوگ, ەڭبەك تەراپياسى نۇسقاۋ­شىلارى, دەنە­شى­نىقتىرۋ جانە مۋزىكا مۇعالىمدەرى, مادەني ۇيىمداستىرۋشى ماماندار ايانباي ەڭبەك ەتۋدە. تارازداعى №1 جۇيكە اۋرۋلار ينتەرنات ءۇيىنىڭ اۋلاسى گۇلزارمەن كومكەرىلگەن. وسىندا قىزمەت ەتەتىن اق جەلەڭدى ابزال جاندار ناۋقاستارعا ءاردايىم جۇرەك جىلۋىن سىيلايدى. ينتەرناتتا تۇراتىن ازاماتتارعا الەۋمەتتىك سالا بويىنشا بارلىق جاعدايلار جاسالۋدا. قىزمەت الۋشىلارعا, ولاردى پايدالى قوعامدىق ەڭبەككە تارتۋعا پسيحولوگ, الەۋمەتتىك قىز­مەت كورسەتۋ ماماندارى, مۇعالىم-دەفەك­تولوگ, ەڭبەك تەراپيا نۇسقاۋشىلارى, دەنە­شىنىقتىرۋ جانە مۋزىكا مۇعالىمدەرى جانە مادەني ۇيىمداستىرۋشى ماماندار جوعارى ساپالى قىزمەت كورسەتۋگە كۇش سالۋدا. بىزدە شتاتتىق كەستە بويىنشا 381 ادام جۇمىس ىستەيدى. قىزمەت الۋشىلاردىڭ سانى 500-دەن استام ادامدى قۇرايدى. مەكەمەدە ستان­دارت­تىق 8 باعىت بويىنشا قىزمەت كورسەتىلەدى. ينتەرنات ءۇيىنىڭ قىزمەتكەرلەرى وسىندا تۇراتىن ناۋقاستاردىڭ سپورتپەن شۇعىلدانۋعا دەگەن قۇشتارلىعىن وياتىپ, مادەني-تانىمدىق قاجەتتىلىكتەرى, قىزىعۋشىلىقتارىن, سۇراقتارى مەن قالاۋلارىن بىلدىرۋىنە مۇمكىندىك جاساپ, العان بىلىمدەرىن الەۋمەتتىك ماڭىزدى ماقساتتارعا جۇمساۋعا ۇيرەتىپ كەلەدى. ولاردىڭ قورشاعان ورتانى تانىپ-بىلۋگە شىعارماشىلىق ءىس-ارەكەتتەرگە قاتىسۋعا, جاڭا نارسەنى بىلۋگە دەگەن تالپىنىستارىن قاناعاتتاندىرۋ ءۇشىن مەكەمەدە ستاندارتقا ساي بىرنەشە ۇيىرمەلەر جۇمىس ىستەيدى. ولار – بي, ءان جانە مۋزىكالىق اسپاپتاردا ويناۋ ۇيىرمەلەرى جانە مانەرلەپ وقۋ توبى. قىزمەت الۋشىلار ونەردەگى جەتىس­­تىكتەرىن ۇشتاۋ ءۇشىن وبلىس, قالا كولەمىندەگى جارىستارعا, فەستيۆالدارعا قاتىستىرىلۋدا. قىز­مەتكەرلەرىمىزدىڭ ىزدەنىسى مەن ۇمتىلىستارى ناتيجەسىز ەمەس. بىرقاتار قىزمەت الۋشىلار سپورت جارىستارىندا ۇدايى جۇلدە الىپ ءجۇر. وتكەن جىلدىڭ 21 شىلدە مەن 3 تامىز ارالىعىندا اقش-تىڭ لوس-انجەلەس قالاسىندا وتكەن ارنايى وليمپيادا ويىندارىنا ەل قۇراماسى ساپىندا قاتىسقان تامارا ۆاسيلەۆا ۆولەيبولدان جاقسى ويىن ورنەگىن كورسە­تىپ, الەمدىك دودادا جۇلدەلى بەسىنشى ورىننان كورىندى. بۇل – ءبىزدىڭ ۇجىم ءۇشىن ۇلكەن ماقتانىش. كىشى فۋتبولدان جىل سايىن رەسپۋبليكالىق ينتەرناتارالىق جارىستارعا قاتىسىپ, جۇلدەلى ورىنداردان كورىنۋدەمىز. جارىستىڭ وسى تۇرىنەن 2012 جىلى – ءى, 2013 جىلى – ءىى جانە 2014 جىلى ءى ورىنعا يە بولدىق. حوككەيدەن 2014 جىلى قاراعاندى قالاسىندا وتكەن رەسەي, وزبەكستان, اقش جانە ۋكراينا ەلدەرىنەن كەلگەن كوماندالار اراسىنداعى جارىستا جۇلدەلى ءىى ورىندى جەڭىپ الدىق. مۇنداعى مۇگەدەك جاندار ونەر جانە ەڭبەك تەراپياسى ءىس-شارالارىندا نۇسقاۋشىلاردىڭ كومەگىمەن قولونەرمەن, گۇل, تال, جەمىس اعاشتارىن ەگىپ, وسىرۋمەن شۇعىلدانادى. قىزمەت الۋشى ايسۇلۋ ەرمەكوۆا مەن يرينا نيكيتينانىڭ بيسەر جانە مونشاقتان توقىلعان ساندىك بۇيىمدارى تالايلاردىڭ تاڭدانىسىن تۋدىرسا, قىلقالام يەسى تالعات شاقاباەۆتىڭ قيال-عاجايىپ ونەردىڭ تۇرلەرىنەن حابار بەرەتىن الۋان كارتينالارى كوزدىڭ جاۋىن الادى. نەسىپكۇل ماحمۋتوۆا, گۇلزا رايىمبەكوۆا جانە يرينا بۋبنەنكولاردىڭ توقىما بۇيىم­دارى دا جوعارى سۇرانىسقا يە. سون­داي-اق, الەكساندر كونونوۆيچ پەن دامير مۇقاشەۆتىڭ اعاشتان قاشاپ جاساعان جانە قۇراستىرمالى جابدىقتارى تالايلاردى تامساندىرۋدا. مۇمكىندىگى شەكتەۋلى ازاماتتارعا قولايلى بولۋى ءۇشىن بىزدەگى بارلىق جاتىن بولمەلەر تالاپقا ساي جاب­دىقتالىپ, قولاربا جۇرەتىن جەرلەرگە پاندۋستار ستاندارتقا ساي سالىنعان. بولىمشە اتاۋلارىن ادامنىڭ كوزىنە جىلى ۇشىرايتىن «مەيىرىم, «قارلىعاش», «ءۇمىت», «شاپاعات», «ىزگىلىك», «اق نيەت» جانە «جانشۋاق» دەپ اتادىق. ينتەرناتقا جاڭادان كەلگەن قىزمەت الۋشىلارعا ستاندارت تالابىنا سايكەس 14 كۇندىك باقىلاۋ جۇرگىزىلەدى. ال «ءۇمىت» بولىمىندە قولارباعا تاڭىلعان 18 قىزمەت الۋشىعا جەكە پالاتالار قاراستىرىلعان. قىزمەتكەرلەرىمىزدىڭ ءوز مىندەتتەرىنە جوعارى جاۋاپكەرشىلىكپەن قاراۋى جانە ۇزدىكسىز ىزدەنىستەرىنىڭ ارقاسىندا بىرقاتار سالالاردا اۋىز تولتىرىپ ايتارلىقتاي جەتىستىكتەرگە قول جەتكىزۋدەمىز. وبلىستاعى ينتەرناتارالىق جارىستاردا ۇدايى جۇلدەلى ورىنداردى جەڭىپ الۋدامىز. 2013 جىلى «ەڭ ۇزدىك مەديتسينالىق-الەۋمەتتىك مەكەمە», وبلىستىق كاسىپوداق ۇيىمىنىڭ «ەڭ ۇزدىك مەكەمە» اتاقتارىنا يە بولدىق. قىزمەتكەرلەرىمىز اپتاسىنا ەكى رەت ۆولەيبول وينايدى. قازاق حاندىعىنىڭ 550 جىلدىق مەرەيتويىنا ارناپ وتكىزگەن كورمەمىز كەلۋشىلەردەن جوعارى باعا الدى. ۇلى جەڭىستىڭ 70 جىلدىعى مەرەكەسىنە وراي قا­زاقستاندىق كەڭەس وداعى باتىرلارى­نىڭ سۋرەتتەرىن ىلدىك. باسشىلارىمىز مەنىڭ كەۋ­دەمە «الەۋمەتتىك سالا قىزمەتكەرلەرىنىڭ ۇزدىگى» توسبەلگىسىن تاقتى. بۇل – ۇجىمعا بەرىلگەن باعا دەپ ەسەپتەيمىن. وبلىستا جۇيكە اۋرۋلارىنا كورسەتىلىپ جاتقان جاعداي, جۇزەگە اسىرىلىپ جاتقان يگىلىكتى ىستەردى كورگەندە ءال-فارابي بابامىزدىڭ جوعارىداعى ءسوزى تۋرا ءبىزدىڭ ەلگە ايتىل­عانداي بولىپ تۇرادى.  مۇرات بەرداليەۆ, تارازداعى №1 جۇيكە اۋرۋلارى ينتەرنات-ءۇيىنىڭ ديرەكتورى. جامبىل وبلىسى.