ەلباسى ورالداعى قادىر مىرزا ءالى اتىنداعى ورتالىقتا بولدى

ورال. 9 ناۋرىز. ەلباسى ورال قالاسىنداعى قادىر مىرزا ءالى اتىنداعى مادەنيەت جانە ونەر ورتالىعىندا بولدى. بۇل تۋرالى akorda.kz حابارلادى. مەملەكەت باسشىسى ونەر مەن مادەنيەت زالىن, كىتاپحانانى جانە مەموريالدىق كابينەتتى قاراپ كوردى. سونداي-اق, نۇرسۇلتان نازارباەۆ وبلىستىڭ شىعارماشىل زيالى قاۋىم وكىلدەرىمەن كەزدەستى. قازاقستان پرەزيدەنتى الەمدىك ەكونوميكانىڭ جاڭارۋىنا عىلىمي جەتىستىكتەر مەن يننوۆاتسيالار نەگىز بولاتىنىن اتاپ ءوتتى. «بىزدەر جانە جاس ۇرپاق مۇلدە باسقا قۇرىلىمداعى ەكونوميكانىڭ كۋاگەرى بولاتىن بولامىز. بۇعان ەڭ الدىمەن ءبىلىم ارقىلى دايىندالۋىمىز كەرەك. بالالاردىڭ بويىنا مەكتەپ ورىندىعىنان باستاپ يننوۆاتسيالىق تۇرعىدان ويلاۋ قاسيەتىن دارىتۋ كەرەك. بولاشاقتا بۇگىنگى ماماندىقتارعا قاجەتتىلىك ازايادى. ويتكەنى, قازىرگى زاماندا عىلىم وتە جىلدام دامىپ جاتىر. قازىر باسقا سيپاتتاعى ءبىلىم قاجەت. بالالاردىڭ ەركىندىگى مەن شىعارماشىلىعىنا كوبىرەك مۇمكىندىك بەرىپ, بەلسەندى ويلاۋ قابىلەتىنە قولداۋ كورسەتۋ كەرەك», – دەدى مەملەكەت باسشىسى. شىعارماشىل زيالى قاۋىم وكىلدەرى نۇرسۇلتان نازارباەۆقا جۇرگىزىپ وتىرعان تاتۋلىق پەن كەلىسىم ساياساتى ءۇشىن, ەلدىڭ ءتۇرلى ەتنوستارىنىڭ مادەنيەتى مەن داستۇرلەرىن ساقتاۋعا قاجەتتى جاعداي جاسالعانى ءۇشىن العىس ايتتى. شىعارماشىلىق ءۇيى ادەبي-شىعارماشىلىق سيپاتتاعى كەزدەسۋلەر مەن كونتسەرتتەردى, بەينەلەۋ ونەرى تۋىندىلارىنىڭ كورمەسىن, وبلىستىڭ جازۋشىلارى مەن اقىندارى شىعارمالارىنىڭ كىتاپحاناسىن ۇيىمداستىرۋ سياقتى ءتۇرلى شارالار وتكىزۋگە ارنالعان. تەمىر قۇسايىن. دەرەك, سۋرەت: akorda.kz.