اۆتوموبيل كلاستەرى جەتەكشى سالاعا اينالماق

سوڭعى جىلدارى قوستانايدىڭ ءوندىرىس سالاسىنا ماشينا شىعارۋ وزەنگە تالماي قۇيار بۇلاق سەكىلدى قوسىلدى. الەمگە تانىمال اتاقتى Ssang Yong, وسى ماركانىڭ قازاقستاندىق NOMAD ۇلگىسىن, Toyoto سەكىلدى برەندتەردى قۇراستىردى. الەمدى قۇرساعان قارجى جانە ساياسي داعدارىستارعا جانە رەسەيدەن اۆتوكولىكتىڭ كوپتەپ كىر­گى­زىلۋىنە بايلانىستى وتكەن جىلى قوس­تانايدا قۇراستىرىلعان اۆتوموبيلدەرگە سۇرانىستىڭ ءتۇسىپ كەتكەنى بەلگىلى. الايدا, بۇل وسى سالانى دامىتۋعا كولدەنەڭ تۇرمايدى. ينۆەستيتسيالار جانە دامۋ مي­نيسترى اسەت يسەكەشەۆ قوستانايعا كەل­گەن سا­پا­رىندا قىتاي, فرانتسيا, يتاليا ينۆەس­تورلارىمەن كەڭەس وتكىزدى. جوبا­لار بويىنشا ەكى جانە ءۇش جاق­تى مەموراندۋمدارعا قول قويىلدى. كەلى­سىمدەر تۇيىندەلەر الدىندا AllurGroup ديرەكتورلار كەڭەسىنىڭ توراعاسى اندرەي لاۆرەنتەۆ مينيسترگە جانە شەتەلدىك ينۆەستورلارعا ماشينا جاساۋ ءىسىنىڭ كەڭەيتىلۋىنە بايلانىستى قايتا جاسالعان جانە جاڭعىرتىلعان وندىرىستىك الاڭدى ارالاتىپ كورسەتتى. وسى جەردە Peugeot, JAC جانە IVECO Stralis, Daily اۋىر جۇك ماشينالارى جاسالادى. جەلىدەن شىققان اۆتوموبيلدەر كورسەتىلدى. ونىڭ ايتۋىنشا, وسى ىسكە 2016 جىلى 8,6 ميلليارد تەڭگە ينۆەستيتسيا قۇيىلادى, جىلىنا 40 مىڭ اۆتوموبيل ساپقا قويىلماق. نەگىزى قوستانايدان وندىرىلەتىن ماشينالار رەسەي نارىعىنا بەيىمدەلەدى. بىراق ەۋرازيالىق ەكونوميكالىق وداق ەلدەرىنىڭ كەدەن شارتتارىنا سايكەس ەكسپورتتالاتىن تاۋارلاردىڭ 50 پايىزى سول ەلدە جاسالۋى ءتيىس. سوعان وراي فرانتسيالىق, قىتايلىق ماشينالاردى قۇراستىرعاندا ولاردىڭ 50 پايىز جۇمىسى تىكەلەي قوستاناي ماشينا قۇراستىرۋ زاۋىتتارىندا اتقارىلۋى ءتيىس. مۇنى شەتەلدىك ينۆەستورلار قۇپ الدى. وسىعان وراي قوستانايدا يندۋس­تريا­لىق ايماق قۇرىلاتىن بولدى. ونىڭ ينفراقۇرىلىمدىق جۇمىستارى بيىل باستالىپ, كەلەسى جىلى اياقتالادى. وعان بارلىعى 2 ميلليارد تەڭگەنىڭ سىرتىندا قارجى بولىنبەك. – يندۋستريالىق ايماققا جەر ءبولۋ, وعان گاز, سۋ, جولدار, تەمىرجول تارتۋ سەكىلدى ينفراقۇرىلىمدىق جۇمىستاردىڭ بارلىعى وبلىس ەنشىسىندە. مۇنىڭ قۇجاتتارى دايىندالۋ ۇستىندە, بيىل جۇمىستى باستايمىز, – دەدى وبلىس اكىمى ارحيمەد مۇحامبەتوۆ. ينۆەستورلارمەن كەزدەسۋ سوڭىندا اتالعان ماسەلەلەر بويىنشا كەلىسىمدەرگە قول قويىلدى. ءنازيرا جارىمبەتوۆا, «ەگەمەن قازاقستان». قوستاناي.