110 جاسقا تولعان قاريا

ەل يگىلىگىنە تىلەۋقور بولىپ وتىر وڭتۇستىك قازاقستان وبلىسى, سوزاق اۋدانى, جارتىتوبە اۋىلى, اققولتىق ەلدى مەكەنىندە 110 جاسقا تولعان بەيسەن رىسىمبەتوۆ دەگەن اقساقال تۇرادى. ءبىر عاسىردان استام ءومىر سۇرسە دە, ايتار سوزىنەن جاڭىلماعان قاريانىڭ تۋعان كۇنىنە وراي اۋدان اكىمى ماقسات يساەۆ ارنايى ىزدەپ كەلىپ, يىعىنا شاپان جاپتى. اكىمنىڭ نيەتىنە رازى بولعان ول: «كوزىم ناشارلاپ, قۇلاعىم اۋىرلاسا دا, ەلدىڭ, ەلباسىنىڭ اماندىعىن تىلەپ, مەملەكەتىمىزدىڭ جاقسى تىلەۋقورى بولىپ وتىرمىن. سەن قاريانى سىيلاساڭ, ەل سەنى سىيلاسىن. وركە­نىڭ ءوسسىن», – دەپ باتا بەردى. «قارياسى باردىڭ قازىناسى بار» دەگەن. ۇرپاقتارىڭىزدىڭ بەرەكەسى بولىپ, كوز الدىندا امان-ەسەن جۇرە بەرىڭىز. ەلىمىزدە ءوزى­ڭىزدەي سۇيەگى اسىل, قازىنالى قا­ريا­لارىمىز كوپ بولسىن, جاسى­ڭىزدى ۇرپاقتارىڭىزعا بەر­سىن», – دەدى اۋدان اكىمى. بۇگىندە 110 جاسقا كەلگەن اقسا­قالدىڭ جۇبايى جاقسىقىز بەگمانوۆا 75 جاستا. ەكەۋى ەكى ۇل, بەس قىز ءسۇيىپ, ولاردان 32 نەمەرە, 22 شوپشەك ءسۇيىپ وتىر. جاس ال­شاقتىعىنا كەلسەك, بەيسەن اقساقالدىڭ العاشقى جۇبايى تال­شىبىق تانابايقىزى قۇرساق كوتەرمەگەننەن كەيىن ءوزى رۇقساتىن بەرىپ سول كەزدەگى 16 جاستاعى ءورىم­دەي قىز جاقسىقىزدى الىپ بەرگەن ەكەن. – بيسەكەڭنىڭ جاس كەزىندە سەرى, ايتىسقا تۇسەر اقىندىعى دا بول­عان, – دەيدى جاقسىقىز اپاي. – بايبىشەسى تالشىبىقپەن تاتۋ-ءتاتتى ءبىر شاڭىراقتىڭ استىندا جيىرما جىلعا جۋىق بىرگە تۇردىق. ول كىسى 1975 جىلى دۇنيەدەن ءوتتى. وتاعاسى 1960 جىلدان باستاپ اتتان تۇسپەي, تۇيە باقتى. تەك 1990 جىلدارى تاياعىن ءىنىسى الەنگە وتكىزدى. اۋەلى اللا, سوسىن وسى شالىمنىن ارقاسىندا بالا-شاعالارىمىزبەن اقار-شاقار بولىپ باقىتتى ءومىر ءسۇرىپ جاتىرمىز, – دەيدى. ءجۇز ون جاسقا كەلسە دە, نەمەرە, شوبەرەلەرىنىڭ اتىنان جا­ڭىلىسپايتىن قاريانىڭ دەن­ساۋلىعى مىقتى بولۋىنىڭ سىرىن نەمەرە ءىنىسى, اۋىلدىق اۋرۋ­حانانىڭ باس دارىگەرى ماديار بەي­سەنبەكوۆ قىمىران, شۇباتتىڭ شيپاسىنان دەپ تۇسىندىرەدى. سەكسەن ءتورت جاسقا دەيىن ات ۇستىنەن تۇسپەي, كەڭشاردىڭ تۇيەسىن باققان اقساقالدىڭ ەڭ جاقسى كورەتىن قورەگى شۇبات بولىپتى. تۋعان كۇنىنە ارنايى كەلگەن اۋدان اكىمى باستاعان ازاماتتارعا قاريا باتاسىن بەردى. باقتيار تايجان, «ەگەمەن قازاقستان». وڭتۇستىك قازاقستان وبلىسى.