سەنىم جۇگى – سالماقتى

نۇرلان نوعاەۆتىڭ ەسىمى باتىسقازاقستاندىقتارعا سوناۋ 2007 جىلدان بەرى جاقسى تانىس. ويتكەنى, ول وسى جىلى وبلىس اكىمىنىڭ ورىنباسارى بولىپ بەكىتىلدى. 2012 جىلدىڭ 20 قاڭتارىندا پرەزيدەنت جارلىعىمەن باتىس قازاقستان وبلىسىنىڭ اكىمى بولىپ تاعايىندالدى. بۇل كۇننەن ەسەپتەگەندە ول كەشە ورال ءوڭىرىنىڭ جۇرتشىلىعىنا ءوزىنىڭ بەسىنشى ەسەبىن بەرگەنىنە كوز جەتكىزەمىز. تالاس جوق, اتالعان ۋاقىت بىرقاتار ىستەردىڭ باسىن قايىرىپ, ءوڭىردى العا دامىتۋدىڭ ستراتەگياسىن بەلگىلەۋگە, ءوزى باستاعان ىستەردىڭ ناتيجەسىن كورۋگە مولىنان جەتەدى. وسى مەرزىم ارالىعىندا وبلىس باسشىسى ءوزىنىڭ العا قويعان ماقساتتارىن تىندىرىمدى ورىنداۋعا, ەل مەن ەلباسى سەنىمىنەن شىعۋعا ۇمتىلعانى كوپشىلىككە بەلگىلى. وسى تۇجىرىمدى ونىڭ سوڭعى ءبىر جىل ىشىندە اتقارعان قىزمەتىنە قاتىستى دا ايتا الامىز. وبلىس باسشىسى رەتىندە وعان ءتان باستى قاسيەت شۇعىل شەشىمىن كۇتىپ تۇرعان ماسەلەلەردى جولعا قويۋعا ۇمتىلىسى دەۋگە بولادى. ەكى ارادا الىس بولاشاقتاعى ءوڭىردىڭ دامۋ پەرس­پەكتيۆالارى دا ۇدايى نازارىندا جۇرەتىنى بايقالادى. ءبىز بىلەتىن وبلىس باسشىسى نۇرلان نوعاەۆقا ءتان تاعى ءبىر جاقسى قاسيەت جىل سايىنعى داستۇرگە اينالعان ەسەپتى ءبىر كۇندىك ءىس دەپ قارامايتىنى. مىسالى, جىل باسىندا اۋدان اكىمدەرى ەسەپ بەرە باستاعان كەزدە ول ارنايى ەلگە شىعىپ, ونىڭ بارىنە قاتىسۋدى ادەتكە اينالدىرعان. ءارى ەل-جۇرتتى تولعاندىرىپ جۇرگەن ماسەلەلەردى جەرگىلىكتى جەردە شەشۋگە ادەتتەنگەن. اۋدان اكىمدەرى ەسەبىنە جال­­عىز بارمايدى. وبلىستاعى جەتەكشى باسقارما, دەپارتامەنت باسشىلارىن ەرتە جۇرەتىنى ماسەلەنىڭ شەشىمى تەز تابىلۋىنا سەپتىگىن تيگىزۋدە. مىسالى, ءبىز بيىل وبلىس اكىمى قا­تىسقان قاراتوبە اۋدانىنىڭ اكىمى اسحات شاحاروۆتىڭ تۇرعىندارعا بەرگەن ەسەبىنە قاتىسقان ەدىك. سوندا ءبىر كۋا بولعانىمىز نۇرلان نوعاەۆتىڭ اتى­نا بىردە-ءبىر ساۋال بەرىلمەدى. بۇل نەنى كورسەتەدى؟ بۇعان دەيىن اقيقات ءتۇيىن رەتىندە ايتىلىپ جۇرگەندەي سۇراق ەكى جاعدايدا بەرىلمەيدى. بىرىنشىدەن, ءبارى دە تۇسىنىكتى بولعان جاعدايدا. ەكىنشىدەن, ەل ىشىندە حالىقتىڭ كوڭىلىنەن شىعاتىن ءبىراز شارالاردىڭ باسى قايىرىلىپ قالعان جاعدايدا. اسىرەسە, الەۋمەتتىك-تۇرمىستىق پروبلەمالار تۇبەگەيلى شە­­­­شى­مىن تاپقان كەزدە. شىنىندا دا رەسپۋبليكانىڭ ەڭ شالعاي اۋداندارىنىڭ ءبىرى – قاراتوبەدە ەلدى مەكەندەردىڭ گاز قۇبىرىنا قوسىلۋ كورسەتكىشى ءجۇز پايىزدى قۇراعانى, بارلىق جولدارعا كۇردەلى جوندەۋلەر جۇرگىزىلگەنى جانە حالىق كۇندەلىكتى تۇتىناتىن ونىمدەر جەرگىلىكتى جەردە ءوندىرىلىپ جاتقانى وسى ءسوزىمىزدىڭ ءبىر دالەلى. وبلىس اكىمى نۇرلان نوعاەۆ ءوز ەسە­بىندە رەسپۋبليكانىڭ باتىستاعى قاق­پاسى – اقجايىقتا وتكەن جىلى ات­قا­رىلعان سان الۋان ىستەرگە جان-جاق­تى, ءارى تەرەڭ تالداۋلار جاسادى. قۇر دە­رەك­تەردى تىزبەلەۋگە ەمەس, سارابدال سا­راپ­تامالار مەن سالىستىرۋلارعا, ورىن العان ولقىلىقتار مەن كەمشىلىكتەردەن سا­باق الۋعا جانە ءوڭىر ەكونوميكاسىنىڭ باستى سيپاتىن ايقىنداۋعا ارنالعان وب­­­لىس باسشىسىنىڭ ەسەبى جونىندە ەل نە دەدى؟ داۋلەتكەرەي قۇسايىنوۆ, باتىس قازاقستان وبلىستىق مادەنيەت باس­قارماسىنىڭ باسشىسى: – بيىلعى وبلىس اكىمىنىڭ ەسەپ بەرۋ جيىنىنا وبلىستىڭ تۇكپىر-تۇكپىرىنەن جانە ورال قالاسىنان ءۇش مىڭعا جۋ­ىق ادام قاتىستى. وسى كەزگە دەيىن رەس­­پۋبليكاداعى وبلىس اكىمدەرىنىڭ ەسەبىنە ءتىزىم بويىنشا الدىن الا بەل­گىلەنگەن مەملەكەتتىك قىزمەتشىلەر مەن «شتاتتاعى ادامدار» عانا بارادى دەگەن تۇسىنىك قالىپتاسقانى جاسىرىن ەمەس. نۇرلان اسقار ۇلى ءوزىنىڭ حالىقتىڭ قالىڭ توبىمەن كەزدەسۋى كەزىندە وسى تۇسىنىكتىڭ تاس-تالقانىن شىعاردى. كەزدەسۋ وتەتىن ورىن جانە ونىڭ وتەتىن ۋاقىتى باق ارقىلى بىرنەشە دۇركىن تۇرعىندارعا حابارلاندى. كىم ەسەپكە كەلەمىن, قاتىسامىن دەسە, ونىڭ جولىن ەشكىم قاققان جوق. بۇل باسشىنىڭ وبلىس حالقىنا دەگەن ۇلكەن سەنىمى دەپ ءتۇسىنۋىمىز كەرەك. ال سەنىم تەك بىرجاقتى بولمايدى. حالىقتىڭ باسشىعا سەنىم جۇكتەيتىنى سەكىلدى باسشىنىڭ حالىققا دەگەن دە سەنىمى بولادى. ايتايىن دە­گەنىمىز, وسى جولى وبلىس باسشىسىنىڭ ءوزى باسقارىپ جۇرگەن تۇرعىندارعا دەگەن سەنىمى ايقىن كورىندى. سەنىم جۇگى قاي تاراپتان العاندا دا سالماقتى ەمەس پە؟! شاھيدوللا ابۋعالي, جاڭاقالا اۋ­دان­دىق قوعامدىق كەڭەستىڭ توراعاسى: – ءبىز شالعايداعى اۋدان تۇرعىندارى وبلىس اكىمىنىڭ ەسەبىنە قاتىستى ءوز وي-پىكىرلەرىمىز بەن ۇسىنىستارىمىزدى الدىن الا جىبەرۋگە نەمەسە ەلەكتروندى پوش­تا ارقىلى جولداۋعا مۇمكىندىك الدىق. بۇعان قوسا وبلىس باسشىسىنىڭ ەل-جۇرت الدىنداعى ەسەپتى بايانداماسىنىڭ تۇجى­رىمدارى وبلىستىق گازەتتەردە جاريالاندى. وسى ارقىلى ايتاتىن ويىمىز بەن بەرەتىن سۇراعىمىزدى الدىن الا قورىتىپ, جيناقتاۋعا مۇمكىندىك الدىق. بۇعان قوسا, كەشە ءوزىمىز تىڭداعان ەسەپتىڭ كەڭ اۋقىمدىلىعى مەن سىندارلى سيپاتى, كوكەيكەستى ماسەلەلەردى اينالىپ وتپەي, وعان قاتىستى وبلىس اكىمىنىڭ ناقتى دا تۇجىرىمدى وي تولعاعانى ءبارىمىزدىڭ كوڭىلىمىزدەن شىقتى. ۆيكتور فومين, باتىس قازاقستان وبلىستىق بالالار مەن جاسوسپىرىمدەر ورتالىعىنىڭ ديرەكتورى: – مەن نۇرلان اسقار ۇلىن ينتەل­لەكتۋالدىق دەڭگەيى جوعارى باسشى دەپ ەسەپتەيمىن. ءوڭىر باسشىسىنا سوقپايتىن, ونى اينالىپ وتەتىن ماسەلەلەر مەن پروبلەمالار بولمايدى. نۇرلان اسقار ۇلى سونىڭ ءبارىن تە­رەڭ زەردەلەپ, سوعان سايكەس قاي كەزدە دە تياناقتى شەشىم قابىلدايتىنىن بايقاپ ءجۇرمىز. ونىڭ بۇگىنگى مىڭداعان وبلىس جۇرتشىلىعىنىڭ الدىندا بەرگەن ەسەبىندە دە وڭىرگە جانى اشيتىنى, ونىڭ باستى پاتريوتى ەكەندىگى, قازىرگى كۇردەلى كەزەڭدە وبلىس ەكونوميكاسىنا قان جۇگىرتىپ داعدارىستان الدىرماي-جۇلدىرماي الىپ شىعۋعا دەگەن تالپىنىسى ايقىن كورىندى. تالپىندى دەۋ از. ويتكەنى, بۇگىنگى ەسەپتەن ۇققانىم – وبلىستا ونىمدەردى وڭدەۋ مەن ۇقساتۋ ىسىندە ءبىراز ىستەر تىندىرىلىپتى. مەن وسىعان قۋاندىم. ال تىكەلەي جاسوسپىرىمدەر مەن بالالار ءتۋريزمى سالاسىنا كەلسەك, مۇندا دا وبلىس باسشىسىنىڭ قولداۋىمەن كوپ ءىس تىندىرىلدى. بۇل جونىندە ءوڭىر رەسپۋبليكاداعى بازالىق دەڭگەيگە كوتەرىلدى. تەمىر قۇسايىن, «ەگەمەن قازاقستان». باتىس قازاقستان وبلىسى.