ءوزى – مۇگەدەك, جۇرەگى – جومارت

نياز سۇندەتاليەۆ 5,5 ميلليون تەڭگەنى قايىرىمدىلىق قورىنا اۋداردى ادامزات بالاسىن ءسۇيۋ ءۇشىن ادامنىڭ ون ەكى مۇشەسىنىڭ ساۋ بولۋى ءتىپتى دە مىندەتتى ەمەس ەكەن. مۇنى ءوزىنىڭ مۇباراك ىسىمەن نياز سۇندەتاليەۆ ەسىمدى 26 جاستاعى قاراعاندىلىق جىگىت تاعى ءبىر مارتە دالەلدەپ بەردى. نيازدىڭ ءوزى وسىدان ءتورت جىل بۇرىن اۋىر جاراقات الىپ, مۇگەدەكتەر ارباسىنا تاڭىلعان بولاتىن. سول كەزدە جاپ-جاس جىگىتتىڭ باسىنا تونگەن باقىتسىز جاعدايعا شىن قىنجىلعان دوستارى مەن تۋىس­تارى ءتۇرلى اكتسيالار مەن فلەشموبتار ۇيىمداستىرىپ, قارجى جيناس­تىرعان. ال بۇگىنگى كۇنى نياز بولسا, ەلىمىزدىڭ تۇكپىر-تۇك­پى­­رىندەگى قايىرىمدى جاندار­دان كەلىپ تۇسكەن سول قوماقتى قارجى – 5 ميلليون 584 مىڭ 504 تەڭگەنى ارۋجان سايىننىڭ «مەيى­رىمدىلىك» ەرىكتى قوعامى» قورى­نىڭ ەسەپ-شوتىنا اۋدارىپ جىبەردى. – بۇل اقشانىڭ جاقىن ارادا ءوزىمدى ەمدەۋگە قاجەت ەمەستىگىنە كوزىم جەتتى. ال ونى جامباستىڭ استىنا قۇر باسىپ وتىرۋ ادام­گەرشىلىككە جاتپايتىن قىلىق بولار ەدى. سوندىقتان, مەن بۇل اقشانى ءدال بۇگىنگى كۇندە ەمگە ءزارۋ بالالارعا كومەك رەتىندە ارۋجان سايىننىڭ قورىنا اۋدارۋ جونىندە شەشىم قابىلدادىم. جۇرەگى مەيىرىمگە تۇنعان جاس جىگىت ءوزىنىڭ ەرتەڭىنە سەنىمدى. – مەنى ەمدەيتىن دارىگەر مەن كلينيكا تابىلعان كەزدە, بارلىق ءتۇيىن ءوز رەتىمەن شەشىلەدى دەپ ويلايمىن. مەن بۇعان سەنىمدىمىن. ەڭ باستىسى, كۇنى ەرتەڭ ءوزىمنىڭ ءجۇرىپ كەتەتىنىمە تيتتەي دە كۇمانىم جوق. سوندىقتان, مەن ەشقاشان دا ۇن­جىر­عامدى تۇسىرمەيمىن, – دەيدى نياز. بۇدان بولەك, نياز سۇندەتاليەۆ بيىلعى جىلدىڭ 1 قاڭتارىنان 23 اقپانعا دەيىن جينالعان قايى­رىمدىلىق قارجىسىن قاراعان­دىداعى مۇمكىندىگى شەكتەۋلى با­لالارعا كومەك كورسەتەتىن ورتا­لىق­تىڭ ەسەپ-شوتىنا اۋدارۋعا شەشىم قابىلدادى. ءبىر قىزىعى, نياز ارۋجان سايىنمەن تەلەفون ارقىلى ءسوي­لەس­­كەنىندە ءوزىنىڭ مۇگەدەكتەر ارباسىنا تاڭىلعانى تۋرالى ءتىس جارماعان ەكەن... قايرات ءابىلدينوۆ, «ەگەمەن قازاقستان». قاراعاندى.